Pisalema ya 61

₁We Xikwembu, yingisa ku huwelela ka mina,

u amukela ku khongela ka mina.

₂Ndza ku vitana ndzi ri emakun'wini ya misava,

hikuva mbilu ya mina yi herile ntamu.

Ndzi fikise ekhokholweni

leri ndzi nga ta hlayiseka eka rona,

₃hikuva hi wena muhlayisi wa mina,

u xihondzo xa mina lexi tsandzaka valala.

₄Ndzi navela ku tshama endlwini ya wena hilaha ku nga heriki,

ndzi tumbela ehansi ka timpapa ta wena.

₅We Xikwembu, u yingisile xikombelo xa mina,

hikuva u ndzi nyikile ndzhaka, va nga vanhu lava chavaka vito ra wena.

₆Andzisela mufumi wa tiko masiku ya yena ya ku hanya,

a a hanye malembe layo tala.

₇A a fume hilaha ku nga heriki emahlweni ka wena, we Xikwembu;

n'wi hlayise hi rirhandzu ra wena ni ku tshembeka ka wena.

₈Siku rin'wana ni rin'wana ndzi ta yimbelela ndzi dzunisa vito ra wena;

ndzi ta ku humesela magandzelo lawa ndzi ku tshembiseke wona hi ku hlambanya.