Pisalema ya 80

₁We murisi wa Israele, yingisa,

rhiya ndleve wena u fambisaka va ka Yosefa kukota ntlhambi;

wena u tshameke exiluvelweni ehenhla ka tikerubu,

komba ku vonakala ka wena.

₂Hlavutela matimba ya wena emahlweni ka va ka Efrayimi ni va ka Benjamini ni va ka Manase,

tana u ta hi ponisa.

₃Tlhela u hi pfuxa we Xikwembu,

u hi amukela hi tintswalo, kutani hi ta ponisiwa.

₄We HOSI Xikwembu xa matimba hinkwawo,

xana u ta hlundzuka ku fikela rini,

u ala ku yingisa swikhongelo swa hina vanhu va wena xana?

₅Mahlomulo i swakudya leswi u hi phamelaka swona,

u hi nwisile mihloti hi xinwelo lexi khapaka.

₆Vaakelani va hina va lwetana hi tiko ra hina,

valala va hina va le ku sandzeni.

₇Xikwembu xa matimba hinkwawo, tlhela u hi pfuxa,

u hi amukela hi tintswalo, leswaku hi pona.

₈U tsuvurile murhi wa vhinya etikweni ra Egipta,

u ya wu byala etikweni leri u hlongoleke vamatiko va suka eka rona.

₉U khulerile xivandla u wu byala eka xona,

kutani wu mila timitsu, wu kula wu funengeta tiko hinkwaro.

₁₀Tintshava a ti ri endzhutini wa wona;

a wu namarhela mirhi leyikulu ya mikedari,

₁₁wu phaka marhavi ma fika eLwandle ra Mediteraniya,

man'wana ma fika enambyeni wa Yufrata.

₁₂U tshovele yini rihlampfu ra nsimu leyi ya vhinya ke?

Vahundzi va ndlela hinkwavo va yiva mihandzu ya kona.

₁₃Tinguluve ta nhova ta wu kandziyela,

swiharhi swa le mananga swi dya eka wona.

₁₄We Xikwembu xa matimba hinkwawo, ha kombela, vuya!

Languta u ri etilweni, u vona leswi humelelaka;

sirhelela murhi lowu wa vhinya,

₁₅ximila lexi u xi byaleke hi voko ra wena,

a nga n'wana loyi u nga tiwundlela yena.

₁₆Valala va hina lava tsemeke ni ku hisa murhi lowu,

va tshinye u va herisa hi vukari bya wena,

₁₇kambe u katekisa hosi ya tiko leyi u yi hlawuleke,

leyi u yi tiyiseke hi matimba ya wena,

₁₈kutani hi nga ka hi nga ku fularheli;

tlhela u hi nyika vutomi, kutani hina hi ta gandzela wena ntsena.

₁₉Tlhela u hi pfuxa, we HOSI Xikwembu xa matimba hinkwawo,

u hi amukela hi tintswalo, kutani hi ta ponisiwa.