Pisalema ya 88

₁We HOSI, Xikwembu xanga ni muponisi wanga,

vusiku ni nhlekanhi ndzi huwelela ka wena ndzi kombela ku pfuniwa.

₂Amukela xikhongelo xa mina,

u ndzi yingisa loko ndzi huwelela.

₃Makhombo ma ndzi talele ngopfu,

ndzo vona sirha ri ahlamile emahlweni ka mina.

₄Ndzi hlayiwa exikarhi ka lava yaka exivandleni xa vafi,

a ndza ha ri na matimba niswitsanana.

₅Ndzi cukumetiwile exikarhi ka vafi,

ndzi fana ni lava dlayiweke va hoxiwa esirheni,

lava ni ku va anakanya u nga ha va anakanyiki,

hikuva va susiwile emavokweni ya wena.

₆U ndzi wisele ekheleni leri enteke,

endhawini ya xinyami lexikulu.

₇Vukari bya wena bya ndzi tshikelela,

magandlati ya wena hinkwawo ma ndzi khubumetile.

₈U ndzi hambanisile ni tintangha ta mina,

hikuva u ndzi hundzurile xilo xa manyala eka vona.

Ndzi pfaleriwile laha ndzi tsandzekaka ku baleka.

₉Mahlo ya mina ma fehla hikuva ndzi le ku rileni.

We HOSI, masiku hinkwawo ndza ku khongela,

ndzi tlakusile mavoko.

₁₀Xana mahlori ya wena u ta ma komba vafi xana?

Lava nga masirheni va nga pfuka va ku dzunisa xana?

₁₁Xana esirheni ka ha vulavuriwa hi rirhandzu ra wena xana?

Lava nga xivandleni xa vafi va nga ha vulavula hi ku tshembeka ka wena xana?

₁₂Xana mintirho ya wena leyo hlamarisa ya ku hi lwela,

yi tiviwa hi mani exinyamini xa rifu, etikweni ra lava rivariweke, xana?

₁₃Kambe mina ndzi huwelela eka wena we HOSI,

xikhongelo xa mina xi ta eka wena ka ha ri mixo.

₁₄We HOSI, u ndzi cukumetela yini xana,

hikwalaho ka yini u ndzi fularhela xana?

₁₅Ndzi tsongahatiwile ku sukela evuntshweni bya mina, ndzi pona ri ahlamile;

leswi u ndzi bisaka swona swa chavisa, swi ndzi heta ntamu.

₁₆Vukari bya wena byi le henhla ka mina,

ndlela leyi u ndzi hlaselaka ha yona ya ndzi vavisa.

₁₇Maxangu lawa ma ndzi rhendzela siku hinkwaro ku fana ni ndhambi,

ma ndzi tela ma ta ndzi khubumeta.

₁₈U ndzi hambanisile ni vanghana kumbe vaakelani va mina,

kutani sweswi ntangha ya mina i xivandla xa vafi!