Pisalema ya 92

₁We HOSI, a hi ku tsakisa ka swona ku ku nkhensa

ni ku twarisa vito ra wena hi tinsimu, wena la nge henhla-henhla;

₂swa tsakisa ku twarisa rirhandzu ra wena nimixo

ni ku tshembeka ka wena nimadyambu,

₃ku ri karhi ku chayiwa tiharipa letikulu ni letitsongo,

ku chayiwa ni switende.

₄Ntirho wa wena we HOSI, wa ndzi tsakisa,

ndzi ba nkulungwana ndzi tlangela mintirho ya mavoko ya wena.

₅We HOSI, mintirho ya wena a hi ku kula ka yona!

Miehleketo ya wena yi entile ngopfu!

₆Mhaka leyi, mintlunya a yi nga yi tivi,

ni swiphunta a swi nga yi twisisi.

₇Lavo homboloka va nga rhumbuka kukota byanyi,

hinkwavo lava endlaka leswo biha va nga humelela,

kambe eku heteleleni va ta herisiwa va nyamalala.

₈We HOSI, hi wena u fumaka minkarhi hinkwayo.

₉Valala va wena hi lava we HOSI, va ta hela,

hinkwavo lava endlaka leswo biha va ta hangalasiwa.

₁₀Kambe mina u ndzi nyikile matimba ya nyarhi,

u ndzi totile mafurha layo nun'hwela enhlokweni.

₁₁Valala va mina, ndzi va langutela hansi;

makungu ya lavo biha lava va ndzi hlaselaka, a ndzi ma chavi ni loko ndzi nga ma twa hi tindleve ta mina.

₁₂Lavo lulama va ta mila kukota ncindzu,

va ta kula ku fana ni murhi wa kedari wa le Lebanoni.

₁₃Va simekiwile endlwini ya HOSI Xikwembu xa hina,

va phaka marhavi eswivaveni swa Tempele ya xona.

₁₄Va ha veka mihandzu hambi va dyuhele,

va ha tsakama, va tshama va tiyile.

₁₅Leswi swi komba ku lulama ka HOSI Xikwembu;

hi xona ribye ra mina, ku hava leswo homboloka eka xona.