Nhlavutelo 13

₁Kutani ndzi vona xivandzana xi tangunuka hi le lwandle, xi huma xi ri ni khume ra timhondzo ni tinhloko ta 7, ni harhi ya vuhosi erimhondzweni rin'wana ni rin'wana ra xona, ni vito leri sandzaka Xikwembu ri tsariwile etinhlokweni ta xona. ₂Xivandzana lexi ndzi xi voneke, a xi fana ni yingwe, milenge ya xona a yi fana ni ya bere, ni nomo wa xona a wu fana ni nomo wa nghala. Kutani dragona yi nyika ntamu wa yona eka xivandzana lexi, yi xi nyika ni xiluvelo xa yona ni matimba lamakulu. ₃Yin'wana ya tinhloko ta xivandzana yi vonaka yi ri ni mbanga leyi yisaka eku feni, kambe mbanga ya kona yi hola, kutani misava hinkwayo yi landza xivandzana lexi, yi xi hlamala. ₄Vanhu va gandzela dragona hikuva yi nyikile xivandzana ematimba ya yona, va gandzela xivandzana va ku: “Loyi a fanaka ni xivandzana i mani, naswona i mani loyi a nga lwaka na xona xana?”

₅Kutani xivandzana xi nyikiwa nomo wo humesa marito yo tikurisa ni yo sandza, xi pfumeleriwa ku tirha ku ringana tin'hweti ta 42. ₆Hiloko xi pfula nomo wa xona ku sandza Xikwembu, ni ku sandza vito ra Xikwembu ni laha xi tshamaka kona, ni ku sandza lava akeke etilweni. ₇Naswona, xi pfumeleriwa ku lwa ni vahlawuriwa va Xikwembu ni ku va hlula. Xi nyikiwa ni matimba ehenhla ka vanhu va tinxaka hinkwato, ni va swivongo hinkwaswo, ni va tindzimi hinkwato, ni va matiko hinkwawo. ₈Kutani vaaki hinkwavo va laha misaveni va ta xi gandzela; hileswaku un'wana ni un'wana loyi vito ra yena ri nga tsariwangiki khale, hi mpfhuka misava yi tumbuluka, ebukwini ya vutomi ya Xinyimpfana lexi dlayiweke, ú ta gandzela xivandzana.

₁₁Kutani ndzi vona xivandzana xin'wana lexi humaka hi le misaveni, xi ri ni timhondzo timbirhi ku fana ni Xinyimpfana, kambe xi vula-vula kukota dragona. ₁₂Emahlweni ka xivandzana lexo rhanga, lexa vumbirhi xi ni matimba hinkwawo yo tirha, kukota lexo rhanga; xi sindzisa misava ni vaaki va yona ku gandzela xivandzana lexo rhanga lexi mbanga ya xona yo yisa eku feni yi nga hola. ₁₃Xi endla masingita lamakulu, hambi wu ri ndzilo xi wu xikisa hi le tilweni, wu wela emisaveni vanhu va ri karhi va swi vona. ₁₄Kutani hi masingita lawa xi pfumeleriwaka ku ma endla emahlweni ka xivandzana lexo rhanga, xi kanganyisa vaaki va misava, xi va lerisa ku endla xifaniso va endlela xivandzana lexi a xi tsemiwile hi banga kambe xi tiya xa ha hanya. ₁₅Kutani xivandzana xa vumbirhi xi pfumeleriwa ku nghenisa ku hefemula eka xifaniso xa xivandzana lexo rhanga, leswaku xifaniso xa kona xi kota ni ku vulavula, ni ku endla leswaku lava alaka ku xi gandzela, va dlawa. ₁₆Naswona, xivandzana lexi xi lerisa leswaku vanhu hinkwavo, lavakulu ni lavatsongo, vafumi ni swisiwana, vantshunxeki ni mahlonga, va funghiwa evokweni ra xinene kumbe emombyeni, ₁₇ku endlela leswaku ku nga vi na un'we loyi a kotaka ku xava kumbe ku xavisa, loko a nga ri ni mfungho, hileswaku vito ra xivandzana, kumbe nhlayo leyi vulaka vito ra xona. ₁₈Leswi swi lava vutlhari: Loyi a nga ni ku twisisa a a kume nhlayo yoleyo ya xivandzana, hikuva i nhlayo leyi vulaka vito ra munhu. Nhlayo ya kona i 666.