Varhoma 16

₁Ndzi mi tivisa Manana Febe, makwerhu eHosini la tirhelaka kereke ya le Kenikreya; ₂n'wi amukeleni hi vito ra Hosi, hilaha vahlawuriwa va Xikwembu va fanelaka ku amukeriwa hakona; kutani mi n'wi pfuna hi xin'wana ni xin'wana lexi a nga kombelaka leswaku mi n'wi pfuna ha xona, hikuva ú pfunile lavo tala, na mina ú ndzi pfunile.

₃Ndzi runguleleni Prisila na Akwila, vatirhi-kulorhi entirhweni wa Kriste Yesu, ₄lava nyiketeke vutomi bya vona ku ndzi ponisa; a hi mina ntsena loyi a va nkhensaka, kambe na tona tikereke hinkwato ta vamatiko ta va nkhensa. ₅Ndzi runguleleni na yona kereke leyi hlanganaka endlwini ya vona.

Ndzi runguleleni na Epayineto, murhandziwa wanga, a nga yena wo sungula ku pfumela eka Kriste le Asiya. ₆Ndzi runguleleni Mariya la tirheke ngopfu exikarhi ka n'wina. ₇Ndzi runguleleni Androniko na Yuniya, va nga Vayuda va ka hina lava a ndzi ri na vona ekhotsweni; va tiveka swinene exikarhi ka vaapostola, naswona va ndzi rhangele ku va va ka Kriste.

₈Ndzi runguleleni Ampliyato, murhandziwa wanga eHosini. ₉Ndzi runguleleni Urbano, mutirhi-kulorhi entirhweni wa Kriste, na Stako, murhandziwa wanga. ₁₀Ndzi runguleleni Apele, munhu la tshembekeke evukristeni. Ndzi runguleleni va ndyangu wa Aristobulo. ₁₁Ndzi runguleleni Herodiyoni, Muyuda wa ka hina. Ndzi runguleleni lava nga vakriste endyangwini wa Narkiso.

₁₂Ndzi runguleleni Trifena na Trifosa, vamanana lava tirhelaka Hosi. Ndzi runguleleni Persida, manana la rhandziwaka, la tirheleke Hosi hi leswo tala. ₁₃Ndzi runguleleni Rhufasi, mukriste la tivekaka swinene, mi rungula ni mana wa yena, loyi a nga manana ni le ka mina. ₁₄Ndzi runguleleni Asinkrito na Filego, na Hermesi, na Patroba, na Hermasi, ni vamakwavo eHosini lava nga na vona. ₁₅Ndzi runguleleni Filologo, na Yuliya, na Neriya, ni makwavo wa xisati, na Olimpa, ni vahlawuriwa va Xikwembu hinkwavo lava nga na vona.

₁₆Xewetanani hi ku ntswontswana ka vukwavo. Tikereke hinkwato ta Kriste ta mi rungula.

₁₇Ndza mi khongotela vamakwerhu, ndzi ri: Mi tivonela eka lava pfuxaka ku avana, ni swikhunguvanyiso, lava va mi humesaka etidyondzweni leti mi ti kumeke; hambanani na vona; ₁₈hikuva lavo tano a va tirheli Hosi ya hina Kriste, kambe va tirhela ku navela ka vona ntsena; hi ku nandzihisa marito ni ku sasekisa mavulavulele, va hambukisa mianakanyo ya lava nga tiviki nchumu. ₁₉Ku yingisa ka n'wina ku twakele eka vanhu hinkwavo; ndzi tsaka hi n'wina emhakeni leyi; kambe ndzi lava leswaku mi va lavo tlhariha hi tlhelo ra leswinene, ni lava nga tiviki nchumu hi tlhelo ra leswo biha. ₂₀Xikwembu lexi nyikaka ku rhula, xi ta hatla xi pfotlosela Santhana ehansi ka milenge ya n'wina.

Tintswalo ta Hosi ya hina Yesu, a ti ve na n'wina!

₂₁Mutirhi-kulorhi Timotiya, wa mi rungula; na vona Vayuda va ka hina va Lukiyo na Yasoni na Sosipatro, va mi rungula.

₂₂Mina Tertiyo, mutsari wa papila leri, ndza mi rungula hi vito ra Hosi.

₂₃Gayo, loyi a nga tshama a rhurhela mina ni kereke hinkwayo, wa mi rungula. Erasto, mutameri wa nkwama wa muti, na Kwarto makwerhu, va mi rungula. [ ₂₄Tintswalo ta Hosi ya hina Yesu Kriste a ti ve na n'wina hinkwenu. Amen!]