I Tikronika 13

₁Davhida a vitana vafambisi hinkwavo va mavuthu, ti nga tindhuna ta masocha ya 1 000 ni ta masocha ya 100, a tsundzuxana na vona. ₂Kutani a hlengeleta Vaisraele hinkwavo, a ku ka vona: “Loko mi nkhensa ni loko HOSI Xikwembu xi nga hi pfulela tindlela, a hi ta vitana va ka hina hinkwavo lava nga sala etindhawini tin'wana ta tiko ra Israele, hi vitana ni vaprista ni Valevhi lava akeke emitini leyi nga ni madyelo ya swifuwo, kutani hinkwavo va ta, va ta hlangana na hina haleno. ₃Hi ni makungu ya ku landza Areka ya Xikwembu xa hina hi vuya na yona, hikuva enkarhini wa ku fuma ka Sawulo hi yi tshikile hi nga yi hlayisi.” ₄Nhlengeletano yi nkhensa mhaka yoleyo, hikuva vanhu hinkwavo a va yi vona yi twala swinene.

₅Hiloko Davhida a hlengeleta Vaisraele hinkwavo, ku sukela endzilekaneni wa Egipta edzongeni ku ya fika exiphandzeni xa Hamata en'walungwini, leswaku va ya teka Areka ya Xikwembu eKiriyata-Yeyarimi. ₆Kutani Davhida ni vavanuna hinkwavo va Israele va tlhandlukela eBaala, wu nga muti wa Kiriyata-Yeyarimi etikweni ra va ka Yuda, va ya teka Areka ya Xikwembu va vuya na yona. Hi yona Areka leyi thyiweke vito ra HOSI, Xikwembu lexi tshamaka exiluvelweni ehenhla ka tikerubu. ₇Kutani va tlakula Areka leyi ya Xikwembu, va huma na yona endlwini ya Abinadaba va yi veka ehenhla ka golonyi leyintshwa, Uza na Ahiyo va va vona lava fambisaka golonyi ya kona. ₈Davhida ni Vaisraele hinkwavo va cina hi ku tsaka emahlweni ka Xikwembu va nga titsetseleri, va ri karhi va yimbelela, va chaya switende ni tiharipa ni swingomana, va bananisa swiphambati swa nsimbhi, va chaya ni tinanga.

₉Kambe loko va fika exivuyeni xa Kidoni, tihavi ti khuguka ti lava ku wisa Areka, kutani Uza a hatla a yi khoma. ₁₀Hiloko HOSI Xikwembu xi hlundzukela Uza xi n'wi ba a wela hansi, hikuva a a khomile Areka, kutani a fela kwalaho emahlweni ka Xikwembu. ₁₁Davhida a khunguvanyeka ngopfu loko a vona hilaha HOSI Xikwembu xi hlundzukeleke Uza hakona, xi n'wi ba. Kutani ndhawu ya kona ni namuntlha ya ha vuriwa Perese-Uza (hileswaku: “Ku-hlundzukeriwa-ka-Uza”). ₁₂Kutani hi siku rero Davhida a khomiwa hi ku chava, a chava Xikwembu a ku: “Xana ndzi nga swi kotisa ku yini ku amukela Areka ya Xikwembu ekaya ka mina?” ₁₃Kutani Davhida a tshika makungu ya ku nghenisa Areka emutini wa yena. A yi hambukisa a ya yi veka emutini wa Obede-Edomu wa le Gati, ₁₄kutani Areka ya Xikwembu yi tshama emutini wa Obede-Edomu tin'hweti tinharhu; kutani HOSI Xikwembu xi katekisa Obede-Edomu ni va ndyangu wa yena, kun'we ni hinkwaswo leswi a a ri na swona.