I Tihosi 13

₁Munhu wa Xikwembu a tshuka a humelela eBetele, a ta hi le Yuda a lerisiwile hi HOSI Xikwembu. Yerobuwamu a a yimile etlhelweni ra alitari a ri karhi a hisa magandzelo. ₂Kutani hi ku lerisiwa hi HOSI Xikwembu, munhu loyi a huwelela a ri karhi a sandza ni alitari, a ku: “We alitari, we alitari, HOSI Xikwembu xi ni rito eka wena leri nge: ‘Yingisa! Ku ta velekiwa n'wana wa mufana erixakeni ra Davhida. Vito ra yena ri ta va Yosiyasi. Ú ta dlaya vaprista va switsunga leswo hlawuleka ehenhla ka wena, vona lava hisaka magandzelo eka wena. Hambi ma ri marhambu ya vanhu ma ta hisiwa ehenhla ka wena.’ ” ₃Kutani munhu loyi a nyika xikombiso siku rero, a ku: “Xikombiso xa leswaku ku vulavurile HOSI Xikwembu hi lexi: Mi ta vona alitari yi hlanhleka, ni nkuma lowu nga ni mafurha, lowu nga henhla ka yona, wu hangalasiwa.” ₄Loko hosi Yerobuwamu a twa rito leri munhu wa Xikwembu a ri huwelelaka, leri sandzaka alitari ya le Betele, a kombetela hi voko ra yena a ri alitarini, a lerisa a ku: “Khomani munhu yoloye!” Kambe voko leri a kombeteleke munhu loyi ha rona, ri omisa sweswo, a tsandzeka ni ku ri vuyisela endzhaku. ₅Alitari na yona yi hlanhleka, ni nkuma lowu nga ni mafurha, lowu a wu ri ehenhla ka yona, wu hangalasiwa, hi ku landza xikombiso lexi munhu wa Xikwembu a xi vuleke, loko a lerisiwa hi HOSI Xikwembu. ₆Kutani hosi Yerobuwamu a ku eka munhu wa Xikwembu: “Kombela leswaku HOSI Xikwembu xa wena xi ndzi twela vusiwana, u ndzi khongelela leswaku voko ra mina ri vuyela etshamelweni ra rona.” Hiloko munhu wa Xikwembu a xi kombela ku twela Yerobuwamu evusiwana, kutani voko ra yena ri vuyela etshamelweni ra rona, ri va leswi a ri ri swona eku sunguleni. ₇Kutani hosi yi ku ka munhu wa Xikwembu: “A hi fambe swin'we ekaya ka mina, u ta wisanyana kona, naswona ndzi ta ku nyika xanchumu.” ₈Kambe munhu loyi wa Xikwembu a hlamula a ku: “Hambiloko u nga ndzi nyika hafu ya yindlu ya wena, a ndzi nga pfumeli ku rhurheriwa eka yona swin'we na wena. Naswona ndzi nga ka ndzi nga dyi vuswa hambi ku ri ku nwa mati endhawini leyi, ₉hikuva ndzi lerisiwile hi HOSI Xikwembu lexi nga te eka mina: ‘U nga tshuki u dya vuswa kumbe ku nwa mati kona, naswona u nga vuyi hi ndlela leyi u fambeke ha yona.’ ” ₁₀Kutani a tlhela hi ndlela yin'wana, a nga ha tlheli hi leyi a nga ta ha yona eBetele.

₁₁Eminkarhini yoleyo, eBetele a ku tshama muprofeta loyi a a dyuharile. Vana va yena va xinuna va ta eka yena, va ta n'wi rungulela hinkwaswo leswi munhu wa Xikwembu a swi endleke siku rero eBetele. Va n'wi rungulela ni marito lawa a ma vuleke eka hosi Yerobuwamu. ₁₂Hiloko tata wa vona a va vutisa a ku: “Xana ú khomile ndlela yihi xana?” Vana va n'wi komba ndlela leyi munhu wa Xikwembu la teke hi le Yuda a yi khomeke. ₁₃Hiloko a lerisa vana lava a ku: “Bohelelani xitshamu embhongolweni.” Va endlisa sweswo, kutani a gada mbhongolo, ₁₄a landza munhu wa Xikwembu hi le ndzhaku. A ya n'wi kuma a tshamile endzhutini wa murhi wa nkuhlu. Kutani a n'wi vutisa a ku: “Xana a hi wena munhu wa Xikwembu loyi a humaka eYuda ke?” Yena a ku: “Ina hi mina.” ₁₅Kavaloko muprofeta a n'wi rhamba a ku: “A hi fambe swin'we, hi ya kaya, u ya phemanyana swakudya.” ₁₆Yena a hlamula a ku: “A ndzi pfumeleriwi ku tlhela na wena kumbe ku rhurheriwa emutini wa wena; naswona ndzi nga ka ndzi nga dyi vuswa, hambi ku ri ku nwa mati swin'we na wena, endhawini leyi, ₁₇hikuva ndzi lerisiwile hi HOSI Xikwembu, lexi nga te eka mina: ‘U nga tshuki u dya vuswa, hambi ku ri ku nwa mati, endhawini yoleyo, naswona u nga tshuki u tlhela hi ndlela leyi u nga ta hi yona.’ ”

₁₈Kutani muprofeta wo dyuhala a ku ka yena: “Na mina ndzi muprofeta ku fana na wena. Kutani, hi ku lerisiwa hi HOSI Xikwembu, ntsumi yi vulavurile na mina yi ku: ‘Tlhelela na yena ekaya ka wena, leswaku a ta dya vuswa ni ku nwa mati kona.’ ” Kasi muprofeta wo dyuhala a a kanganyisa munhu wa Xikwembu hi mavunwa. ₁₉Kutani munhu wa Xikwembu a tlhela na muprofeta, va ya dya vuswa ni ku nwa mati emutini wolowo.

₂₀Loko va ha ri eku dyeni, rito ra HOSI Xikwembu ri ta eka muprofeta loyi a a yengile munhu wa Xikwembu wo huma eYuda. ₂₁Kutani muprofeta a tshinya n'wendzi wa yena a ku: “HOSI Xikwembu xi vurisa sweswo xi ri: ‘A wu yingisanga leswi humaka enon'weni wa mina HOSI, naswona a wu hlayisanga nawu lowu mina HOSI Xikwembu xa wena ndzi ku leriseke wona. ₂₂Ematshan'wini ya sweswo, u tlherile u vuya u ta dya vuswa ni ku nwa mati, endhawini leyi mina HOSI ndzi ku leriseke leswaku u nga tshuki u dya vuswa, hambi ku ri ku nwa mati eka yona. Hikokwalaho, ntsumbu wa wena a wu nga lahliwi emasirheni ya vakokwa wa wena.’ ”

₂₃Loko munhu wa Xikwembu a hetile ku dya vuswa ni ku nwa mati, muprofeta lowo dyuhala loyi a a n'wi yengile, a n'wi bohelelela xitshamu embhongolweni. ₂₄Loko munhu wa Xikwembu a ri karhi a tlhela, a hlangana ni nghala endleleni, yi n'wi dlaya, ntsumbu wu sala endleleni wu lo vúmbúlú! Mbhongolo ni nghala hi vumbirhi bya swona a swi yimile hi le matlhelo ka wona. ₂₅Vahundzi va ndlela va vona ntsumbu lowu tlatlalatiweke endleleni, va vona ni nghala leyi yimeke etlhelo ka wona. Kutani va ya rungula mhaka leyi emutini, laha muprofeta wo dyuhala a a tshama kona.

₂₆Muprofeta loyi a a yengile munhu wa Xikwembu endleleni ya yena, a ehleketa a ku: “Loyi i munhu wa Xikwembu, loyi a nga yingisangiki rito ra HOSI Xikwembu; hikokwalaho, xona xi n'wi nyiketile eka nghala. Nghala leyi yi n'wi kakatlurile, yi n'wi dlaya, leswaku rito ra HOSI Xikwembu eka munhu wa xona loyi, ri hetiseka.” ₂₇Kutani a ku ka vana va yena: “Bohelelani xitshamu embhongolweni.” Va endlisa sweswo. ₂₈Kutani a suka, a ya kuma ntsumbu wa munhu luya endleleni wu lo tlátlálálá. Mbhongolo ni nghala swi lo tiyimela hi le matlhelo ka wona. Nghala a yi nga dyanga ntsumbu lowu, hambi ku ri ku kakatlula mbhongolo. ₂₉Kutani muprofeta a rhwala ntsumbu wa munhu wa Xikwembu, a wu tlhandleka embhongolweni, a vuya na wona emutini, a ta wu lahla ni ku rila nkosi wa kona. ₃₀A lahla ntsumbu esirheni leri a ri ri ra yena n'wini. Kutani va n'wi rila va ku: “Yo! Makwerhu!” ₃₁Loko muprofeta a hetile ntirho wa yena wo lahla, a lerisa vana va yena a ku: “Siku ndzi nga ta fa, ndzi lahleni esirheni leri munhu wa Xikwembu a latiweke eka rona. Vekani marhambu ya mina swin'we ni marhambu ya yena. ₃₂Swilo leswi a lerisiweke hi HOSI Xikwembu ku swi boxa, hakunene swi ta humelela, ma nga marito lawa a nga ma huwelela loko a sandza alitari ya laha Betele, ni loko a sandza tindlu leti akiweke eswitsungeni leswo hlawuleka swa miti ya Samariya.”

₃₃Endzhaku ka sweswo, Yerobuwamu a nga hundzukanga emikhuveni ya yena leyo biha. Ú yile emahlweni ni ku hlawula vaprista va switsunga leswo hlawuleka exikarhi ka vanhu vahi ni vahi. Munhu un'wana ni un'wana loyi a a tsakela ntirho lowu wa vuprista eswitsungeni leswo hlawuleka, a a nyikiwa wona hi Yerobuwamu. ₃₄Maendlele lawa hi wona lama dyohiseke ndyangu wa Yerobuwamu, lero kala wu heriseriwa makumu ni ku nyamalala laha misaveni.