Nyimpi ni matiko ya le kusuhi
1Vanhu va matiko ya le kusuhi na Israele va twa leswaku alitari yi akiwile hi vuntshwa ni leswaku Xivandla lexo hlawuleka xi tlhele xi va leswi a xi ri xiswona khale, kutani va hlundzuka ku tlula mpimo. 2Va tiyimisela ku dlayetela swihluke swa va ka Yakobo leswi a swi tshama exikarhi ka vona. Hiloko va sungula ku dlaya Vayuda ni ku va herisa.
3Yudasi a lwa ni Vaedomu, a hlasela ni Akrabatena etikweni ra Idumeya, hileswi Vaedomu a va bvutamela Vaisraele. A va hlula, a va chacharhisa ni ku va phangha. 4A tsundzuka ni ku homboloka ka Vabayani lava minkarhi hinkwayo a va fana ni xirimbana eka Vaisraele, va va bvutamela emagondzweni. 5Yudasi a va rhendzela, a hlambanya ku va herisa, a hisa makhokholo ya vona ni hinkwavo lava a va ri endzeni ka wona. 6Ku suka kwalaho a khupuka a ya hlasela Vaamoni, laha a nga kuma ku ri ni mavuthu yo tala ya tinhenha ni vanhu lavo tala, va rhangeriwe hi Timotiya. 7Yudasi a lwa tinyimpi to tala na Vaamoni, a va hlula ni ku va dlaya. 8A teka na Yazere ni swimitana swa wona, kutani a tlhelela eYudiya.
9Kavaloko vamatiko lava a va ri eGiliyadi va hlengeletana, va kungela ku lwa ni ku dlayetela Vaisraele lava a va ri etikweni ra vona; kambe Vaisraele va tsutsumela ekhokholweni ra Datema. 10Kutani va rhumela Yudasi ni vamakwavo epapila leri nge: “Vamatiko lava nga aka na hina va hlengeletanile ku hi pfukela ni ku hi herisa. 11Va tilulamisele ku ta ta hlasela khokholo leri hi nga tsutsumela eka rona, va rhangeriwe hi Timotiya. 12Tanani, mi ta hi kutsula emavokweni ya vona, hikuva lavo tala va hina va file, 13ni vamakwerhu hinkwavo lava a va ri exifundzheni xa Tobi va dlayiwile; valala va khome vasati va vona, ni vana, ni swilo hinkwaswo swa vona, va dlayile vavanuna va kwalomu ka 1 000 kona.”
14Loko papila leri ri ri karhi ra ha hlayiwa, ku humelela varhumiwa lava a va handzurile swiambalo swa vona hi gome, va huma eGaleliya, va tisa xiviko xo fana ni lexi a xi ri epapileni leri. 15Va vula leswaku va rhendzeriwile hi masocha lama humaka ePitolemayi, ni le Tiri, ni le Sidoni, va ku: “Vamatiko hinkwavo va Galeliya va hlengeletanile ku ta hi herisa.”
16Loko Yudasi ni vanhu va twa marungula lawa, va rhamba ntshungu lowukulu wa Vayuda ku ta kanela leswi a va fanele ku swi endla ku pfuna vamakwavo lava a va ri ekhombyeni, va hlaseriwa hi valala. 17Kavaloko Yudasi a ku eka Simoni makwavo: “Hlawula masocha man'wana lama u nga ta famba na wona ku ya kutsula vamakwerhu eGaleliya; mina na makwerhu Yonatani hi ta ya eGiliyadi.” 18Kutani a veka Yosefa n'wana Zakariya, na Azariya un'wana wa varhangeri va vanhu, leswaku va va vafambisi va mavuthu lama saleke, va sirhelela Yudiya ha wona. 19A va lerisa leswi a ku: “Mi va vafambisi va mavuthu lawa, kambe mi nga tshuki mi lwa ni vamatiko hi nga si vuya.” 20Kutani Simoni a nyikiwa masocha ya 3 000 ku ya na wona eGaleliya, Yudasi yena a nyikiwa 8 000 ku ya na wona eGiliyadi.
21Kavaloko Simoni a ya eGaleliya, kutani a lwa tinyimpi leto tala ni vamatiko, a va hlula ni ku va dlaya. 22A va hlongorisa ku ya fika enyangweni ya Pitolemayi, a dlaya vavanuna va kwalomu ka 3 000 exikarhi ka vona, kutani a phangha hinkwaswo swa vona. 23Kavaloko a teka Vayuda va le Galeliya na Aribata, ni vasati va vona, ni vana, ni hinkwaswo swa vona, a va yisa eYudiya hi ntsako lowukulu.
24Enkarhini wolowo Yudasi Makabiya na Yonatani makwavo va pela nambu wa Yordani, kutani va famba masiku manharhu emananga. 25Kavaloko va hlangana ni Vanabatiya. Vona va komba Vayuda xinakulobye, va va rungulela hinkwaswo leswi humeleleke Vayuda lavan'wana eGiliyadi, va ku: 26“Va ka n'wina lavo tala va pfaleriwile emitini ya Bosira, na Bosori, na Alema, na Kasifo, na Makedi, na Karnayimi, yi nga miti leyikulu leyi tiyisiweke hi rirhangu. 27Van'wana va pfaleriwile emitini yin'wana ya le Giliyadi. Naswona valala va n'wina va tilulamisile ku ya hlasela makhokholo ya Vayuda mundzuku, leswaku va va tshumba ni ku va dlaya hinkwavo hi siku rin'we.”
28Kavaloko Yudasi ni mavuthu ya yena va hatlisa va tlhela hi ndlela ya le mananga, va kongoma eBosira. Va teka muti lowu, kutani va dlaya vanhu va xinuna hinkwavo hi banga, va phangha muti va wu hisa. 29Va suka kwalaho nivusiku, va kongoma ekhokholweni ra Datema va ya fika kona. 30Hi mahlamba-ndlopfu, Yudasi ni mavuthu ya yena, va te va languta, va vona ntshungu lowukulu wa valala va ntsandza-vahlayi, va rhwele maphandze ni swa ku faya rirhangu, va tilulamisele ku mbundzumuxa khokholo ni ku hlasela Vayuda lava a va ri endzeni ka rona. 31Kakuloko Yudasi a vona leswaku nyimpi yi sungurile ni ku twa ku huwelela ni mpfumawulo lowukulu wa tinanga leswi a swi huma emutini, 32a ku: “Lwelani vamakwenu namuntlha!”
33Kutani Vayuda va ya emahlweni va avanyisiwile hi mintlawa minharhu, va ri karhi va chaya tinanga ni ku khongela hi rito leri tlakukeke, va ya hlasela valala hi ku ta hi le ndzhaku ka vona. 34Kakuloko mavuthu ya Timotiya ma vona leswaku ma tela hi Yudasi Makabiya, ma baleka, kutani Yudasi a ma dlayetela. Hi siku rero, ku fa vamatiko va kwalomu ka 8 000.
35Kavaloko Yudasi a hambuka a ya hlasela muti wa Alema, a lwa na wona a wu teka, a dlaya vavanuna hinkwavo lava a va ri eka wona, a wu phangha ni ku wu hisa. 36Ku suka kwalaho a ya emahlweni, a teka miti ya Kasifo, na Makedi, na Bosori, ni miti yin'wana ya le Giliyadi.
37Endzhaku ka sweswo, Timotiya a hlengeleta mavuthu man'wana, a ya dzima mixaxa ya yena ku langutana na Rafoni, entsungeni wa xinambyana. 38Yudasi a rhumela tinhlori ku ya valanga mixaxa ya Timotiya, kutani ti vuya ti ta n'wi byela ti ku: “Vamatiko hinkwavo va xifundzha xelexo va hlengeletane eka Timotiya, i mavuthu layo tala. 39Va thole ni Maarabu ku ta ta va pfuna, va dzimile mixaxa ya vona entsungeni wa xinambyana, va tilunghisela ku ta lwa na hina.” Kutani Yudasi a ya a ya lwa na vona.
40Kakuloko Yudasi ni mavuthu ya yena va tshinelela xinambyana, Timotiya a ku eka tindhuna ta mavuthu ya yena: “Loko Yudasi a rhanga a khupuka a hi hlasela, hi nge n'wi koti, ú ta hi hlula. 41Kambe loko a komba ku chava, a dzima mixaxa ya yena entsungeni wa xinambyana, hi ta pela hi ya n'wi hlasela, kutani hi ta n'wi hlula.” 42Loko Yudasi a fika exinambyaneni, a yimisa tindhuna ta mavuthu ya yena kwalaho, a ti lerisa a ku: “Mi nga pfumeleri munhu ku sala ndzhaku, kambe vonani leswaku hinkwavo va nghena enyimpini.” 43Kavaloko Yudasi a rhanga a pela xinambyana, a kongoma valala, kutani mavuthu hinkwawo ya yena ma n'wi landza. Vamatiko hinkwavo va hluriwa, va cukumeta matlhari ya vona, va tsutsumela etempeleni ya swikwembu swa vona eKarnayimi. 44Kambe Yudasi a hlasela muti lowu, a hisa tempele ya wona kun'we ni hinkwavo lava a va ri endzeni ka yona. Hi ndlela leyi Karnayimi wu hluriwa, vamatiko va nga ha swi koti ku tiyela Yudasi nakambe.
45Kavaloko Yudasi a hlengeleta Vaisraele hinkwavo va le Giliyadi. A va ri vanhu va swiyimo swo hambana-hambana, ni vasati va vona, ni vana, ni swilo hinkwaswo swa vona, wu endla ntshungu lowukulu, kutani a ya na vona eYudiya, 46va ko va fika le Efroni. Muti lowu a wu ri wukulu, wu tiyisiwile hi rirhangu, kutani a ku ri hava laha a va ta hundza hakona handle ka ku hundza hi le xikarhi ka wona. 47Kambe vanhu va Efroni va va sivela, va pfala tinyangwa ta wona hi maribye. 48Yudasi a va rhumela rito ra xinakulobye a ku: “Hi pfumeleleni ku hundza hi le tikweni ra n'wina, hi tlhelela etikweni ra hina. Ku hava loyi a nga ta mi endla xo biha; hi ta hundza ntsena exikarhi ka muti wa n'wina.” Kambe va ala ku n'wi pfulela tinyangwa ta muti.
49Kavaloko Yudasi a lerisa vanhu hinkwavo lava a a ri na vona leswaku va gova kwalomu a va ri kona. 50Kambe Yudasi ni masocha ya yena va ya hlasela muti wa Rafoni siku rorero hinkwaro ni vusiku bya kona, kutani va wu hlula. 51Va dlaya vavanuna hinkwavo va Rafoni, va phangha muti ni ku wu herisa. Kutani va hundza hi le xikarhi ka wona, va famba ehenhla ka mintsumbu ya lava dlayiweke. 52Va pela Yordani va ya fika erivaleni lerikulu leri langutanaka na Beta-Xani. 53Eku fambeni ka vona hinkwako, Yudasi a a ri karhi a hlengeleta lava va nyengaka ni ku nyika vanhu matimba, ku kondza va ya fika etikweni ra Yudiya. 54Kutani va tlhandlukela entshaveni ya Siyoni hi ku tsaka lokukulu. Va humesa magandzelo ya vona, hikuva a ku ri hava ni un'we wa vona la nga dlawa endleleni.
55Kakuloko Yudasi na Yonatani va ha ri eGiliyadi, ni loko Simoni makwavo a ha ri eGaleliya kusuhi ni le Pitolemayi, 56Yosefa n'wana Zakariya, na Azariya, lava a va fambisa mavuthu laman'wana ya Vaisraele, va twa ta swiendlo swa vunhenha swa varikwavo ni tinyimpi leti va nga ti hlula. 57Kutani va ku: “A hi tiendleleni vito na hina, a hi yeni hi ya lwa ni vamatiko lava nga kusuhi na hina.” 58Hiloko vona ni mavuthu lama a va ri na wona va ya hlasela Yamina. 59Kavaloko Gorgiya ni masocha ya yena va huma emutini lowu va ya lwa na vona. 60Kutani Yosefa na Azariya va hluriwa, va hlongorisiwa ku ya fika endzilekaneni wa Yudiya. Hi siku rero, ku dlayiwa Vaisraele vo ringana 2 000. 61Hi ndlela leyi mavuthu lawa ma hluriwa, hikuva vafambisi va wona a va naverile ku endla xiendlo xa vunhenha, naswona va ala ku landza xileriso xa Yudasi ni vamakwavo. 62Yosefa na Azariya a va nga ri va ndyangu lowu a wu hlawuriwile leswaku wu ta kutsula Vaisraele.
63Yudasi ni vamakwavo va xiximiwe ngopfu exikarhi ka Vaisraele ni le xikarhi ka vamatiko. Loko vanhu va twa ndhuma ya vona, 64a va hlengeletana hi xitalo ku va dzunisa.
65Kavaloko Yudasi ni vamakwavo va huma va ya lwa ni Vaedomu etikweni leri nge dzongeni. Yudasi a hlasela muti wa Hebroni ni swimitana swa wona, a mbundzumuxa makhokholo ya wona, a hisa ni swihondzo leswi a swi wu rhendzerile. 66Kutani a tsemakanya hi le Marisa, a nghena etikweni ra Vafilista. 67Hi siku rorero ku dlayiwa vaprista van'wana va Vaisraele lava nga lwa hi matlotlo hi ku lava ku komba vunhenha. 68Kavaloko Yudasi a kongoma emutini wa Azoto etikweni ra Vafilista; a hindzimuxa tialitari ta vona, a hisa ni swikwembu swa vona leswi vatliweke; a phangha miti ya vona, kutani a tlhelela etikweni ra Yudiya.
