I Petro 4

₁Hikokwalaho, leswi Kriste a tweke ku vava enyameni, na n'wina hlomani matlhari hi ku va ni mianakanyo yo fana ni ya yena, hikuva un'wana ni un'wana loyi a nga twa ku vava enyameni, ú tshikile ku dyoha. ₂Kutani enkarhini wa n'wina lowu saleke wa ku hanya laha misaveni, mi nga ha fambisiwi hi ku navela ku titsakisa, kukota vanhu van'wana, kambe mi fambisiwa hi leswi Xikwembu xi rhandzaka swona. ₃Tshikani ku endla leswi tsakeriwaka hi vamatiko, hikuva swi ringene loko mi swi endlile eminkarhini leyi hundzeke. Khale a mi hanya hi ku endla swa manyala, hi ku navela ku titsakisa, hi ku pyopyiwa, ni makolo, ni ku va swilovekelo, ni ku gandzela swikwembu swa hava leswi nga lavekiki. ₄Va hlamala loko va mi vona sweswi mi nga ha fambi na vona, evusopfeni lebyi bya ku tlurisa mpimo, kutani va mi sandza. ₅Kambe vanhu lava va ta tihlamulela emahlweni ka loyi a tilunghiseleke ku avanyisa lava hanyaka ni lava feke. ₆Hi swona leswi nga endla leswaku Evhangeli yi twarisiwa ni ka lava feke: Vona lava va avanyisiweke ku fana ni vanhu van'wana, va ha ri emisaveni, sweswi va hanya emoyeni ku fana ni Xikwembu.

₇Ku hela ka swilo hinkwaswo ku le kusuhi. Hikokwalaho, tlharihani mi tikhoma, mi ta kota ku khongela. ₈Ku tlula leswi hinkwaswo, tiyani eku rhandzaneni, hikuva rirhandzu ri funengeta swidyoho leswo tala. ₉Titoloveteni ku amukela vaendzi mi rhurhelana, ehandle ka ku vilerisana. ₁₀Leswi un'wana ni un'wana a nyikiweke nyiko ya yena, tirhisani tinyiko leti mi pfunana ha tona, mi va valanguteri lavanene va tinyiko ta Xikwembu ta tinxaka-xaka. ₁₁Loko un'wana a nyikiwile ku vulavula, a a vulavule hi ku landza marito ya Xikwembu; loko un'wana a nyikiwile ku tirhela vanhu, a a swi endle tanihi loyi a swi tirhaka hi matimba lawa Xikwembu xi n'wi nyikaka wona, leswaku eswilweni hinkwaswo Xikwembu xi dzunisiwa ha Yesu Kriste. Ku dzuneka ni matimba swi le ka xona hilaha ku nga heriki. Amen.

₁₂Varhandziwa, mi nga hlamaleni loko mi wela hi miringo leyi pfurhaka ku fana ni ndzilo ku ta ringa ku tiya ka n'wina, onge hi loko mi humeleriwa hi swin'wana leswi nga riki swona. ₁₃Kambe tsakani hileswi mi averiwaka ku vaviseka ka Kriste, leswaku siku a humelelaka eku kwetsimeni ka yena, na n'wina mi ta tsaka mi tsakisisa. ₁₄Loko mi soriwa hikwalaho ka vito ra Kriste, mi katekile, hikuva Moya lowu kwetsimaka, lowu nga wa Xikwembu, wu le ka n'wina. ₁₅Ntsena ku nga vi na un'we wa n'wina loyi a twisiwaka ku vava hileswi a nga mudlayi, kumbe khamba, kumbe xigevenga, kumbe muvangi wa leswo karhata. ₁₆Kambe loko munhu a twisiwa ku vava hikwalaho ka leswi a nga Mukriste, a nga tshuki a khomiwa hi tingana, kambe a a dzunise Xikwembu, hi mhaka ya vito leri ra “Mukriste”. ₁₇Hikuva nkarhi wu fikile wa ku avanyisiwa loku nga ta sungula hi va yindlu ya Xikwembu. Kutani, loko ku sungula hi hina, xana makumu ya lava nga yingisiki Evhangeli ya Xikwembu ma ta va layo yini xana? ₁₈Naswona, va te:

₁₉Hikokwalaho, lava twisiwaka ku vava hilaha Xikwembu xi rhandzaka hakona, a va endle leswo lulama, kutani va veka mimoya ya vona emavokweni ya Muvumbi loyi a tshembekaka.