Ta ku hlawulekisiwa ka Tempele
1Kavaloko Yudasi ni vanghana va yena, hi ku rhangeriwa hi Xikwembu, va ya teka Tempele ni muti wa Yerusalema. 2Va hindzimuxa tialitari leti a ti akiwile erivaleni ra Yerusalema hi vamatiko, va tlhela va mbundzuxa swivava leswo hlawuleka swa swikwembu swa hava. 3Va basisa Xivandla lexo hlawuleka, va aka alitari yin'wana ya magandzelo. Hiloko va tshivela ndzilo hi ku ba ribye, kutani endzhaku ka malembe mambirhi va tlhelela va humesa magandzelo, va hisa mirhi ya risuna, va lumeka timboni ni ku xaxameta Xinkwa lexo hlawuleka. 4Endzhaku ka swona, va nkhinsama ni ku khongela HOSI Xikwembu leswaku va nga tshuki va wela nakambe emakhombyeni lawa va ma voneke. Va kombela leswaku, loko va tlhelela eku dyoheni, xi va tshinya hi musa, ku nga ri hi ku va nyiketa emavokweni ya vamatiko lava sandzaka, va tihanyi. 5Va basisa Xivandla lexo hlawuleka hi siku rorero vamatiko a va xi nyamisile ha rona, ri nga siku ra vu-25 ra n'hweti ya Kislevhi. 6Va tlangela nkhuvo lowu masiku ya 8 hilaha a va tlangela hakona nkhuvo wa Mintsonga, va ri karhi va tsundzuka leswaku ku nga ri khale, enkarhini wa nkhuvo wa Mintsonga, a va ha tsendzeleka etintshaveni ni le mabakweni tanihi swiharhi. 7Kavaloko va tamela switluka swa mincindzu ni tinhonga to tsondzeriwa hi swiluva swa rihlaza, va xaxamela ni ku yimbelela tinsimu ta ku nkhensa Xikwembu lexi xi endleke leswaku Tempele ya xona yi basisiwa. 8Kutani hinkwavo va twanana leswaku nkhuvo lowu wu ta tlangeriwa etikweni hinkwaro ra vona lembe rin'wana ni rin'wana.
Pitolemi Makroni a tidlaya
9Antiyoko Epifani a fa hi ndlela leyi. 10Sweswi ndzi ta hlamusela leswi humeleleke enkarhini wa hosi Antiyoko Yupatoro, loyi a a ri n'wana wa muhomboloki Antiyoko Epifani, naswona ndzi ta tivisa hi ku komisa makhombo lamakulu lama vangiweke hi tinyimpi ta yena. 11Loko a sala a fuma, Antiyoko Yupatoro a hlawula Lisiya ku va mulanguteri wa hinkwaswo swa mfumo wa yena ni murhangeri lonkulu wa Siriyankulu na Fenikiya 12ematshan'wini ya Pitolemi la vuriwaka Makroni. Makroni ú ringetile ku twanana na Vayuda ni ku va endlela leswo lulama, hikuva va xanisekile ngopfu. 13Hikokwalaho, a hehliwa emahlweni ka Antiyoko Yupatoro hi “Vanghana va hosi”. Hinkwako a twa va n'wi vita muxengi, hikuva a a tshikile Kipra, xihlala lexi Filometori hosi ya le Egipta a a n'wi vekile ku va murhangeri wa xona, kutani a ya yima na Antiyoko Epifani. Hikokwalaho, a tsandzeka ku fundzhiwa hilaha xiyimo xa yena a xi lava hakona, kutani a tidlaya hi ku nwa chefu.
Yudasi Makabiya a hlula Vaedomu
14Loko Gorgiya a vekiwa ku va murhangeri wa xifundzha xa Vaedomu, a rhangela mavuthu ya masocha yo thoriwa, kutani a hlasela Vayuda minkarhi hinkwayo. 15Handle ka yena, Vaedomu lava a va fuma makhokholo lamakulu va ri karhi va xanisa Vayuda, va amukela lava a va hlongoriwile eYerusalema, kutani va hamba va huma nyimpi va ya hlasela Vayuda minkarhi hinkwayo. 16Kavaloko Yudasi Makabiya ni masocha ya yena va khongela hi ku titsongahata ku pfuniwa hi Xikwembu, kutani va tsutsuma va ya hlasela makhokholo ya Vaedomu. 17Va hlula lava a va lwa va ri ehenhla ka makhumbi ya makhokholo lawa, kutani va dlaya Vaedomu lava lavaka ku tlula 20 000.
18Kambe valala va kwalomu ka 9 000 va tumbela eswihondzweni swimbirhi swo tiya leswi a swi nga hluleki. 19Kavaloko Yudasi a suka endhawini leyi, a kongoma lomu a a laveka kona hi xihatla. Kutani a siya Simoni na Yosefa kun'we na Zakiya ni masocha ya yena kona, va ringene ku rhendzela swihondzo leswi. 20Kambe vavanuna van'wana va Simoni va rhandza ngopfu mali, kutani loko va nyikiwile silivhere ya 420 kg, va pfumelela van'wana va valala ku huma eswihondzweni ni ku baleka. 21Loko Yudasi a twa leswi humeleleke, a tshinya vavanuna lava emahlweni ka nhlengeletano ya varhangeri va Vayuda, hikuva a va xavisile varikwavo, va ntshunxile valala va vona va ta kota ku ya lwa nakambe. 22Hiloko Yudasi a dlaya vaxengi lava, kutani a hatlisa a ya hlasela ni ku teka swihondzo leswimbirhi. 23Minkarhi hinkwayo Yudasi a a hlula enyimpini, kutani eku hlaseleni ka swihondzo leswi, ú dlayeterile valala lava lavaka ku tlula 20 000.
Yudasi a hlula Timotiya
24Timotiya loyi a a hluriwile hi Vayuda eku sunguleni, a hlengeleta masocha layo tala yo thoriwa ni vagadi va tihanci lavo tala vo huma hi le Asiya, a hamba a huma nyimpi a ya hlasela Yudiya. 25Loko mavuthu ya valala va tshinela kusuhi, Yudasi na masocha ya yena va tichela misava etinhlokweni, va ambala leswo khwaxa, kutani va khongela Xikwembu. 26Va pavalala ehenhla ka swikhandziyo swa alitari, va kombela leswaku Xikwembu xi va pfuna loko va ya lwa ni valala va vona hilaha xi va tshembiseke hakona enawini wa xona.
27Loko va heta ku khongela, va hloma matlhari, va suka Yerusalema va kongoma kule, va ya fika kusuhi ni valala, kutani va govela kona vusiku hinkwabyo. 28Loko vurhonga byi tsuvuka, mavuthu lamambiri ma sungula ku lwa. Vayuda a va ehleketa leswaku va ta hlula ku nga ri hi vunhenha bya vona, kambe hi ku pfuniwa hi Xikwembu, kasi valala va vona a va kholwa leswaku va ta hlula hi vunhenha bya vona ntsena. 29Loko nyimpi yi ya yi hisa, valala va vona xivono xa vavanuna va 5 vo saseka swinene, va gadile tihanci leti a ti havaxerile swa nsuku, va rhangerile Vayuda enyimpini. 30Va rhendzela ni ku sirhelela Yudasi hi switlhangu ni matlhari leswaku a nga vavisiwi, va hoxetela valala hi miseve ni tindlati. Hiloko valala va khomiwa hi mpfilumpfilu ni ku pfaleka mahlo, kutani va hangalaka. Vayuda va va dlayetela, 31va dlaya masocha ya milenge ya 25 000 ni vagadi va tihanci va 600.
32Timotiya a balekela ekhokholweni ra Gazara leri a ri sirheleriwa hi tinhenha leti rhangeriweke hi makwavo Kereya. 33Mhaka leyi yi tsakisa Yudasi ni masocha ya yena, kutani va ya rhendzela ni ku hlasela khokholo leri masiku ya 4. 34Vavanuna lava a va ri ekhokholweni va tshemba ku tiya ka rona, hikokwalaho va sandza Xikwembu ni ku rhukana Vayuda ku tlula mpimo. 35Hi siku ra vu-5 nimpundzu swinene, vavanuna va Yudasi va 20 lava hlundzukeke swinene hi ku twa valala lava sandzaka Xikwembu, va ya hlasela rirhangu ra khokholo hi vunhenha lebyikulu, kutani hi ku leva lokukulu va dlaya hinkwavo lava lwaka na vona. 36Vayuda van'wana va hatlisa va va landzelela, va ya hlasela khokholo hi tlhelo rin'wana, va hlula vasirheleri va rona, va hisa ni swihondzo swa rona. Van'wana va ya faya tinyangwa ta khokholo, va nghenisa eka rona Vayuda lava saleke handle, va ri teka. 37Timotiya a a tumberile ekheleni ra mati, kambe va n'wi kuma ni ku n'wi dlaya. Va tlhela va dlaya Kereya makwavo wa yena na Apolofani.
38Endzhaku ka swona, Vayuda va tlangela nkhuvo hi ku yimbelela ni ku nkhensa Xikwembu lexi kombisaka Vaisraele tintswalo letikulu ni ku va pfuna ku hlula valala va vona.
