II Vamakabiya 12

₁Loko Vayuda na Vasiriya va hetile ku phahlelana mariyeta, Lisiya a tlhelela ehosini, kutani Vayuda va tlhelela eku rimeni ka masimu ya vona. ₂Kambe varhangeri va swifundzha swin'wana ku fana na Timotiya, na Apoloniya n'wana Genayo, na Hironimo, na Demofoni, na Nikanoro murhangeri wa Kipra, a va nga pfumeli leswaku Vayuda va hanya hi ku rhula.

₃Enkarhini lowu, vanhu va le Yopa va endlela Vayuda lava tshamaka exikarhi ka vona leswo biha. Va xisa Vayuda lava hi ku va kombisa xinakulobye. Va va rhamba swin'we ni vasati va vona ni vana ku ya tluta elwandle etingalaveni leti va ti lunghiseke. ₄Vanhu hinkwavo va Yopa a va twananile ku endla sweswo, hikokwalaho Vayuda va va tshemba, va nga kanganyisiwi hi nchumu, kutani va pfumela ku ya tluta na vona. Kambe loko va fika exikarhi ka lwandle, vanhu va le Yopa va ndzondzometa Vayuda lava lavaka ku va 200 ematini.

₅Loko Yudasi a twa hi ta ku biha loku ku endliweke eka varikwavo, a lerisa masocha ya yena ku tilunghisela ku huma nyimpi. ₆Hiloko a khongela Xikwembu muavanyisi la lulameke, kutani a ya hlasela vadlayi lava. Vayuda va ya hisa hlaluko ra Yopa nivusiku ni tingalava hinkwato leti a ti ri kona, va tlhela va dlayetela hinkwavo lava a va tumberile kona. ₇Hileswi tinyangwa ta Yopa a ti pfariwile, Yudasi a suka kwalaho, a kungele leswaku ú ta tlhela a vuya a ta herisa vaaki hinkwavo va muti lowu.

₈Yudasi a twa leswaku vanhu va le Yamina na vona va lava ku dlaya Vayuda lava tshamaka emutini wa vona. ₉Kutani a ya hlasela Yamina nivusiku, a hisa hlaluko ra wona ni tingalava hinkwato leti a ti ri kona. Malangavi ya ndzilo lowu ya vonaka ni le Yerusalema; mpfhuka wa kona a wu ri kwalomu ka 45 km.

₁₀Kavaloko Yudasi ni masocha ya yena va suka Yamina va ya hlasela Timotiya. Loko va fambile mpfhuka wa kwalomo ka 2 km, va hlaseriwa hi masocha ya milenge ya Maarabu ya 5 000 ni vagadi va wona va tihanci va 500. ₁₁Nyimpi yi ya yi hisa, kutani Yudasi ni masocha ya yena va hlula valala hi ku pfuniwa hi Xikwembu. Maarabu lama hluriweke ma kombela Yudasi ku endla xinakulobye na wona, ma n'wi tshembisa ku n'wi nyika tihomu ni ku pfuna Vayuda hi tindlela to hambana-hambana. ₁₂Yudasi, hi ku ehleketa leswaku ma ta n'wi pfuna hi tindlela to tala, a pfumela ku phahlelana mariyeta na wona. Loko Yudasi a endlile xinakulobye na wona, Maarabu ma tlhelela emitsongeni ya wona.

₁₃Yudasi a tlhela a ya hlasela muti wa Kaspini, khokholo lero tiya swinene, laha a ku tshama vamatiko va tinxaka-xaka kona. ₁₄Vamatiko lava a va tshemba ku tiya ka rirhangu ra kona ni ku tala ka tinhundzu ta vona, kutani va vungunya Yudasi ni masocha ya yena, va va rhuketela, va rhukana ni Xikwembu. ₁₅Kambe Yudasi ni masocha ya yena va khongela N'wini wa tilo ni misava, loyi a a hlurile Yeriko enkarhini wa Yoxuwa handle ka ku tlhoma timhandze to hlanhla rirhangu ha tona kumbe ku yimisa swilo swo balesa ha swona, kutani va hatla va ya hlasela rirhangu hi vukari. ₁₆Hileswi a ku ri ku rhandza ka Xikwembu, Vayuda va teka Kaspini, va dlayetela vanhu vo tala kona, lero tiva leri a ri ri kusuhi ni muti lowu leri a ri anamile kwalomu ka 400 m, a ri vonaka onge ri khuluka ngati.

₁₇Kavaloko Yudasi ni masocha ya yena va suka Kaspini va famba kwalomu ka 145 km va ya fika eKarakisi leyi nga ndhawu ya Vayuda kusuhi ni muti wa Tubi. ₁₈Kambe a va kumanga Timotiya kona, hikuva a a sukile. A a nga endlanga nchumu kona handle ka ku siya tinhenha leto tala ku sirhelela khokholo rin'wana ra ndhawu leyi. ₁₉Dositeyo na Sosipatro vafambisi va mavuthu ya Yudasi va huma nyimpi va ya hlasela khokholo leri, kutani va hlula ni ku dlaya tinhenha hinkwato ta 10 000 leti nga kona. ₂₀Kambe Yudasi a avanyisa masocha ya yena, ma endla mintlawa, a veka varhangeri va mintlawa leyi, kutani a hatla a ya hlasela Timotiya, loyi a a ri ni masocha ya milenge ya 120 000 ni vagadi va tihanci va 2 500. ₂₁Loko Timotiya a twa leswaku Yudasi a ri karhi a ta ku ta n'wi hlasela, a rhumela vavasati ni vana ni tinhundzu ta mavuthu ya yena emutini wa Karnayimi. A swi nonoha swinene ku ya hlasela muti lowu, hambi ku ya fika eka wona, hikwalaho ka swiphandze leswo khuma leswi yisaka eka wona. ₂₂Loko ntlawa wo sungula wa masocha ya Yudasi wu va tshinela, valala va khomiwa hi ku chava lokululu hi ku vona xivono lexi Xikwembu lexi vonaka hinkwaswo xi va kombiseke xona. Eku chaveni ka vona va sungula ku baleka, va tsutsuma hala ni hala hi mpfilumpfilu, lavo tala va vavisiwa hi vanghana va vona. ₂₃Vayuda va va hlongorisa hi matimba, va dlaya valala va kwalomu ka 30 000. ₂₄Timotiya yena a khomiwa hi vavanuna va Dositeyo na Sosipatro. Kambe hi vukanganyisi lebyikulu a va pfumerisa leswaku maxaka yo tala ya vona a va ri vakhotsiwa va yena ni leswaku va ta dlayiwa loko yena a vavisiwa. ₂₅Eku heteleleni a va tshembisa ku va tlherisela maxaka ya vona ma hlayisekile, kutani va n'wi ntshunxa a famba.

₂₆Kavaloko Yudasi a ya hlasela Karnayimi ni tempele ya Atarigate, kutani a dlaya vanhu va 25 000 kona. ₂₇Loko a hlurile ni ku mbundzumuxa muti lowu ni tempele leyi, a ya hlasela Efroni, khokholo [leri Lisiya a a tshama eka rona] swin'we ni vanhu vo tala lava humaka ematikweni yo hambana-hambana. Majaha ya xivindzi ma xaxamela emahlweni ka makhumbi ya muti lowu ma wu sirhelela hi vunhenha lebyikulu. Endzeni ka muti a ku ri ni swilo swo tala swo balesa ha swona ni swo tala swo copa ni ku hoxa. ₂₈Kambe Vayuda va khongela N'wini wa vona loyi a herisaka matimba ya valala va yena, kutani va teka Efroni, kutani va dlayetela vanhu va kona va 25 000. ₂₉Endzhaku ka swona, va suka Efroni va hatlisa va ya fika eSikitapoli, mpfhuka wa kona ku suka eYerusalema a wu ri 113 km. ₃₀Vayuda lava tshamaka eSikitapoli va tivisa Yudasi leswinene leswi vanhu va kona va va endleleke swona ngopfu-ngopfu eminkarhini ya makhombo. ₃₁Hikokwalaho Yudasi ni masocha ya yena va nkhensa vanhu va Sikitapoli, va tlhela va va khongotela ku endlela Vayuda leswinene ni le minkarhini leyi taka. Kutani Yudasi ni masocha ya yena va suka kwalaho va kongoma eYerusalema, va ya fika kona loko nkhuvo wa Ntshovelo wu ri kusuhi.

₃₂Loko Nkhuvo lowu wa Ntshovelo, lowu vuriwaka wa Pentekosta hi Xigriki, wu hundzile, Yudasi ni masocha ya yena va huma nyimpi va hatlisa va ya hlasela Gorgiya murhangeri wa xifundzha xa Idumeya, ₃₃loyi a a jamelana na vona a ri ni masocha ya milenge ya 3 000 ni vagadi va tihanci va 400. ₃₄Mavuthu ya Yudasi ni mavuthu ya Gorgiya ma huma nyimpi ma sungula ku lwa, kutani Vayuda vo ka va nga talanga va dlayiwa. ₃₅Kambe Dositeyo, un'wana wa vavanuna va Bakenoro, loyi a a ri munhu wa xivindzi wo gada hanci, a ya khoma Gorgiya, a n'wi koka hi nkancu wa yena a famba na yena, a lava ku khoma muhomboloki loyi a ha hanya. Kambe un'wana wa vagadi va tihanci va Vatrakiya a hatlisa a ya hlasela Dositeyo, a n'wi tsema voko. Kutani Gorgiya a baleka, a ya fika eMarisa.

₃₆Kavaloko masocha ya Vayuda lava rhangeriweke hi Esidiyasi a va karhele, hileswi a va ri eku lweni nkarhi wo leha. Hikokwalaho Yudasi a khongela HOSI Xikwembu ku va seketela ni ku va rhangela enyimpini. ₃₇A yimbelela risimu ra nyimpi hi ririmi ra ka vona, kutani Vayuda va ya hlasela mavuthu ya Gorgiya ma nga langutelanga nchumu, va ma hlula ni ku ma hlongorisa.

₃₈Endzhaku ka swona, Yudasi ni mavuthu ya yena va suka kwalaho, va ya fika emutini wa Adulama. Hileswi siku ra vu-7 ra vhiki a ri ri kusuhi, va tibasisa hi ku landza mikhuva ya ka vona, kutani va hlayisa Savata kona. ₃₉Siku leri tlhandlamaka a swi fanerile leswaku va ya teka mintsumbu ya varikwavo lava dlayiweke enyimpini, va ya va yi lahla emasirheni ya vatata wa vona. ₄₀Hiloko endzeni ka swiambalo swa un'wana ni un'wana wa lava feke va kuma swifaniso leswitsongo leswi vatliweke swa swikwembu swa muti wa Yamina, leswi nawu wa Xikwembu a wu lerisa leswaku Vayuda va nga tshuki va swi ambala. Kutani ke, hinkwavo va tiva leswaku hikwalaho ka yini vavanuna lava va dlayiwile. ₄₁Hikokwalaho Vayuda hinkwavo va dzunisa mintirho ya Xikwembu muavanyisi wo lulama, loyi a humeselaka erivaleni swilo leswi fihliweke; ₄₂kutani va khongela leswaku xidyoho lexi xi rivaleriwa hakunene. Kavaloko Yudasi la chavisekaka a khongotela vanhu ku tshika swidyoho hinkwaswo, hikuva va vonile leswi humeleleke eka lava dyoheke hi ku ambala swifaniso leswi vatliweke swa swikwembu swa hava. ₄₃A tlhela a hlengisa masocha hinkwawo ya yena enhlengo wa silivhere ya 12 kg, a wu rhumela eYerusalema ku lunghisela mhamba yo susa swidyoho. Yudasi a endla ntirho lowunene lowu wo chavisekaka, hikuva a pfumela leswaku vafi va ta pfuka. ₄₄Loko a nga pfumelanga leswaku vafi va ta pfuka, ku va khongelela a ku ta va ku vile vuphukuphuku ntsena, a swi nga pfunanga nchumu. ₄₅Kambe leswi a a langutela hakelo yo hlamarisa leyi lulamiseriweke eka lava feleke eHOSINI, ku va khongelela ku vile ntirho wa ripfumelo lerikulu. Kutani ke, Yudasi a humesela lava feke mhamba yo susa swidyoho, leswaku va ta rivaleriwa swidyoho swa vona.