II Vamakabiya 15

₁Loko Nikanoro a twa leswaku Yudasi ni masocha ya yena a va ri exifundzheni xa Samariya, a endla makungu yo ya va hlasela hi siku ra Savata, hikuva a a tiva leswaku siku leri ú ta va a hlayisekile. ₂Kavaloko Vayuda lava sindzisiweke ku famba na yena, va n'wi byela va ku: “U nga va dlayeteli hi ndlela leyi ya tihanyi ni yo leva, kambe xixima siku leri Xikwembu lexi vonaka hikwaswo xi ri katekiseke ni ku ri hlawulekisa ku tlula masiku hinkwawo.” ₃Kambe muhomboloki lonkulu Nikanoro a va vutisa loko N'wini wa hinkwaswo etilweni a ri yena loyi a va leriseke ku hlayisa siku ra Savata. ₄Va n'wi hlamula va ku: “Ina! Xikwembu lexi hanyaka lexi fumaka etilweni, hi xona lexi xi hi leriseke ku hlayisa Savata.”

₅Kavaloko Nikanoro a va hlamula a ku: “Na mina ndzi loyi a fumaka emisaveni, kutani ndzi mi lerisa ku hloma matlhari ni ku ya hetisa ntirho wa hosi.” Kambe, a nga swi kotanga ku hetisa makungu lawa ya yena ya tihanyi.

₆Eku tikukumuxeni lokukulu ka yena Nikanoro a a tiyimisela ku aka xitsundzuxo lexi nga ta tsundzuxa tiko ta ku hluriwa ka Yudasi. ₇Kambe Yudasi a nga tshikanga ku tshemba hi mbilu ya yena hinkwayo leswaku Xikwembu xi ta n'wi pfuna. ₈Kutani a khongotela masocha va yena leswaku ma nga chavi ku hlaseriwa hi vamatiko, kambe a ma tsundzuxa minkarhi leyi hundzeke, loko ma pfuniwile hi Xikwembu xa matimba hinkwawo, ni ku langutela ku hlula valala va vona ni le nkarhini wa sweswi, hi ku pfuniwa ka xona. ₉A ma tiyisa hi ku ma hlayela nawu wa Xikwembu ni vaprofeta ni ku ma tsundzuxa ku nonon'hweriwa loku ma ku hluleke. ₁₀Loko a vona leswaku masocha ma titwa ma tiyile, Yudasi a xaxameta mavuthu ya yena a tilulamisela nyimpi, a ma tsundzuxa vukanganyisi bya valala va vona lava a va tshova minkarhi hinkwayo mintwanano leyi va yi endleke ni vanhu van'wana. ₁₁A ma tiyisa nhlana ku nga ri hi ku ma byela ku tshemba matimba ya switlhangu ni matlhari, kambe hi ku vulavula marito ya vunhenha, a ma nyika matimba hi ku ma tivisa norho wa yena, lowu a wu ri xivono lexi khorwisaka.

₁₂Hiloko Yudasi a ma tivisa leswaku enorhweni ú vonile Oniya loyi a a ri Muprista lonkulu, wanuna wo chaviseka ni wo lulama, wo tikhoma, ni wa musa, ni wa matimba eku vulavuleni, loyi a dyondzisiweke ku hanya hi ku tenga ku sukela evuhlangini bya yena, a ri karhi a tlakusa mavoko a khongelela Vayuda hinkwavo. ₁₃Yudasi a vona ni wanuna wa ndzhuti ni vuhosi ni matimba layo hlamarisa, loyi misisi ya nhloko ya yena a yi basile. ₁₄Kutani Oniya a vulavula a ku: “Loyi i Yeremiya muprofeta wa Xikwembu, loyi a rhandzaka varikwavo ni loyi a khongelelaka Vayuda na Yerusalema ngopfu.”

₁₅Kutani Yeremiya a tlakusa voko ra yena ra xinene a nyika Yudasi fumu ra nsuku a ku ka yena: ₁₆“Fumu lero hlawuleka leri i nyiko leyi humaka eka Xikwembu. Ri teke, kutani u ya dlayetela valala va wena ha rona.”

₁₇Marito lawa ya matimba ya Yudasi ma tiyisa hinkwavo ku lwa hi vunhenha, ma nyika vafana matimba ya ku lwa tanihi vavanuna. Ntsindza wa vona ni vukhongeri bya vona ni Tempele ya vona a swi ri ekhombyeni, hikokwalaho Vayuda va twanana leswaku xikan'we va fanele ku ya hlasela valala va vona hi vunhenha ni ku nyiketa vutomi bya vona hi ku lwa hi xivindzi. ₁₈A va vilelanga ngopfu hikwalaho ka vasati va vona, ni vana va vona, ni varikwavo, ni maxaka ya vona. Va vilela swinene hikwalaho ka Tempele ya vona leyo hlawuleka. ₁₉Vayuda lava saleke eYerusalema a va yimayimeka hikwalaho ka leswi a swi humelela enyimpini ya le rivaleni.

₂₀Hinkwavo a va langutela ku tiva lava nga ta hlula enyimpini. Masocha ya milenge ya valala a ma ri karhi ma huma nyimpi ma xaxamerile, ma famba ma ri exikarhi ka mintlawa mimbirhi ya vagadi va tihanci, ni tindlopfu ta wona ti famba na wona ti ri etindhawini leti faneleke. ₂₁Yudasi a languta mavuthu yo tala ya valala, ni matlhari ya vona yo hambana-hambana, ni tindlopfu to leva ta vona. Kutani a tlakusela mavoko ya yena ehenhla, a khongela Xikwembu lexi endlaka mahlori, hikuva a a tiva leswaku Xikwembu xi nyika ku hlula eka lava swi va fanelaka, ku nga ri eka lava va nga ni mavuthu ya tinhenha. ₂₂Kutani Yudasi a khongela a ku: “We HOSI, loko Hezekiya a ri karhi a fuma Yuda, u rhumerile ntsumi ya wena ku ya dlaya vavanuna va Senakeribi va 185 000. ₂₃We N'wini wa tilo, rhumela ni sweswi ntsumi ya wena leyinene ku ta rhurhumerisa valala va hina hi ku chava. ₂₄Hi matimba lamakulu ya wena herisa vanhu lava va ku sandzeke, lava lweke ni vanhu va wena vo hlawuleka.” Hi marito lawa Yudasi a heta ku khongela.

₂₅Kavaloko Nikanoro ni masocha ya yena va ya hlasela Vayuda hi ku chaya tinanga ni ku yimbelela tintsimu ta nyimpi. ₂₆Kutani Yudasi ni masocha ya yena va ya lwa ni valala va ri karhi va kombela ku pfuniwa hi Xikwembu. ₂₇Hi ku lwa hi mavoko ni ku khongela Xikwembu etimbilwini ta vona, Vayuda va dlayetela valala lava lavaka ku tlula 35 000, kutani va tsaka swinene hikuva a va pfuniwa hi Xikwembu. ₂₈Loko nyimpi yi herile, kutani Vayuda va ri karhi va muka va tlangela ku hlula ka vona, va vona Nikanoro erivaleni ra nyimpi, a a file kona a ambele tinguvu ta yena ta nyimpi. ₂₉Hiloko Vayuda va huwelela ni ku dzunisa N'wini wa hinkwaswo hi ririmi ra ka vona.

₃₀Kavaloko Yudasi Makabiya, loyi a a nyiketa vutomi bya yena hinkwabyo ku lwela varikwavo ni ku va endlela leswinene ku sukela evuhlangini bya yena, a lerisa masocha ya yena ku ya tsema voko ra xinene ra Nikanoro ni nhloko ya yena ni ku swi yisa eYerusalema. ₃₁Loko va fika eYerusalema, Yudasi a hlengeleta vanhu hinkwavo, a yimisa vaprista emahlweni ka alitari, kutani a rhuma vanhu ku ya vitana lava a va ri ekhokholweni. ₃₂A va komba nhloko ya mubihi Nikanoro ni voko leri wanuna loyi wa tihanyi eku tikuriseni ka yena a tlakusile ehenhla ku sandza Tempele leyo hlawuleka ya Xikwembu xa matimba hinkwawo. ₃₃Kutani a tsema ririmi ra muhomboloki Nikanoro, a hlambanya leswaku a ta ri tsemelela a ri phakela tinyanyana hi swichupuchupu ni leswaku a ta hayeka nhloko ya yena emahlweni ka Tempele ku va xikombiso xa leswi Nikanoro a a tivangerile swona hi vuphukuphuku bya yena. ₃₄Kuteloko hinkwavo va languta ehenhla, va dzunisa HOSI Xikwembu lexi a xi kombile matimba ya xona va ku: “A ku dzunisiwe loyi a endleke leswaku Tempele ya yena yi nga nyamisiwi.” ₃₅Kutani Yudasi a hayeka nhloko ya Nikanoro erirhangwini ra khokholo ku va xikombiso lexikulu xa ku pfuniwa ka Xikwembu eka vanhu hinkwavo. ₃₆Vayuda hinkwavo va twanana ni ku tiboha leswaku siku leri ri nga ka ri nga rivariwi, kambe ri ta hlayisiwa lembe rin'wana ni rin'wana, ri rhangela siku ra Mordekayi ti nga ti 13 ta n'hweti ya vu-12. N'hweti ya kona, yi vuriwa “ya Adara” hi Xiaramu.

₃₇Timhaka ta Nikanoro ti heta hi ndela leyi. Ku sukela nkarhi lowu muti wa Yerusalema wu vile emavokweni ya Vaheveru. Hikokwalaho na mina ndzi ta heta timhaka ta mina kwala. ₃₈Loko ti tsariwile hi vutlhari ni hi ndlela leyinene, ndzi tsakile. Loko ti nga tsariwanga kahle, ti nga tsakisi vahlayi va tona, hi swona leswi ndzi koteke ku swi endla. ₃₉Hi tiva leswaku swa vavisa ku nwa vhinyo yi ri yoxe kumbe mati ma ri woxe, kasi vhinyo loko yi hlanganisiwile na mati yi endla swakunwa swo tsokombela swo nandziha swinene, leswi swi tsakisaka lava va swi nwaka. Swi tano ni timhaka leti tsariweke hi vutshila, ti tsakisa lava va ti hlayaka. Kutani ke, ndzi heta kwala.