Mintirho 10

₁Emutini wa Khezariya a ku ri ni munhu loyi a va ku i Korneliyo; a a ri ndhuna ya dzana ra masocha entlaweni lowu vuriwaka “wa Italiya”; ₂a a ri munhu wa vukhongeri, a chava Xikwembu kun'we ni va yindlu ya yena hinkwavo; a a pfuna vanhu va tiko hi swihanano swo tala, a nga rhuteli ku khongela Xikwembu. ₃Siku rin'wana, loko ku lava ku va nkarhi wa 3 nindzhenga, a vona swinene ntsumi ya Xikwembu hi xivono, yi ri karhi yi nghena ka yena, yi ku: “Korneliyo!” ₄Loko a yi langutile swinene, a khomiwa hi ku chava, kutani a ku: “I ncini, Hosi?” Yi ku ka yena: “Mikhongelo ya wena ni swihanano swa wena swi amukeriwile eka Xikwembu, kutani xi ku anakanyile. ₅Sweswi ke rhuma vavanuna le Yopa, va ya vitana munhu loyi va nge i Simoni kumbe Petro. ₆Ú rhurheriwile eka Simoni un'wana wa mutlhuvutsi, loyi yindlu ya yena yi nga kusuhi ni lwandle.” ₇Kuteloko ntsumi leyi vulavuleke na yena yi sukile, Korneliyo a vitana vambirhi exikarhi ka malandza ya yena, a vitana ni socha rin'we leri chavaka Xikwembu exikarhi ka masocha lama n'wi tirhelaka. ₈Loko a va hlamuserile timhaka hinkwato, a va rhuma eYopa.

₉Siku leri tlhandlamaka, loko va ha ri ndleleni, va ri karhi va tshinelela muti wa Yopa, Petro a khandziya ehenhla ka lwangu hi nkarhi wa nhlekanhi, a ya khongela. ₁₀Kutani a twa ndlala, a navela ku dya. Loko va ha n'wi lunghisela swakudya, a ngheniwa hi moya. ₁₁A vona tilo ri pfulekile, ni xilo lexi fanaka ni nguvu leyikulu yi ri karhi yi xika, yi nembeletiwa emisaveni hi tinhla ta mune; ₁₂endzeni ka nguvu a ku ri ni swivumbiwa hinkwaswo swa misava leswi fambaka hi milenge ni mavoko, ni leswi kokovaka, ni leswi hahaka empfhukeni. ₁₃Kutani rito ri fika ka yena, ri ku: “Petro! Suka u yima, u tlhava u dya!” ₁₄Kambe Petro a ku: “E-e, Hosi, ndzi nga ka ndzi nga swi endli, hikuva a ndzi si dya xilo lexi yilaka, hambi xi ri lexi nga tengangiki.” ₁₅Rito ri tlhela ri ku ka yena ra vumbirhi: “Swilo leswi Xikwembu xi nga vula leswaku swi tengile, u nga vuli leswaku swa yila.” ₁₆Swilo leswi, swi humelela kanharhu, kutani hi nomu lo, nguvu yi tlhela yi tlakuleriwa etilweni.

₁₇Loko Petro a ha hlamala ngopfu xivono lexi a xi voneke, leswaku xi nga va xi vula yini, ku humelela vavanuna lava rhumiweke hi Korneliyo, va vutisa laha muti wa Simoni wu nga kona, kutani va ya fika enyangweni. ₁₈Va vitana vanhu ni ku vutisa loko Simoni wo vuriwa Petro a nga va a rhurheriwile kona. ₁₉Loko Petro a ha anakanya xivono lexi, Moya wu ku ka yena: “Vona, ku ni vavanuna vambirhi, lava va ku lavaka. ₂₀Suka u yima, u rhelela, u famba na vona u nga kanakani, hikuva hi mina ndzi va rhumeke.” ₂₁Kutani Petro a rhelela, a ku ka vavanuna lava: “Munhu loyi mi n'wi lavaka hi mina loyi; mi tisiwa hi mhaka yihi ke?” ₂₂Va ku: “Hi rhumiwile hi Korneliyo, ndhuna ya dzana ra masocha, wanuna wo lulama la chavaka Xikwembu, la nkhensiwaka hi tiko hinkwaro ra Vayuda; ú lerisiwile hi ntsumi leyo hlawuleka ku ku vitana u ta emutini wa yena, leswaku a ta yingisa leswi u nga ta n'wi byela swona.” ₂₃Hiloko Petro a va amukela, a va rhurhela ndlwini.

Loko ri xa, Petro a suka a famba na vona; van'wana va vamakwavo eHosini va le Yopa va famba na yena. ₂₄Siku leri tlhandlamaka, a nghena eKhezariya. Korneliyo a a va languterile, a vitanile na maxaka ya yena ni vanakulobye. ₂₅Loko Petro a nghena, Korneliyo a ya n'wi hlanganisa, a tiwisela emilengeni ya yena, a n'wi nkhinsamela. ₂₆Kambe Petro a n'wi pfuxa, a ku: “Pfuka u yima, na mina ndzi munhu ntsena.” ₂₇Kavaloko Petro a nghena, a ri karhi a vulavula na Korneliyo; kutani a kuma vanhu lavo tala va hlengeletene kona. ₂₈A ku ka vona: “Ma swi tiva swinene leswaku swa yila eka Muyuda ku endzela munhu wa rixaka rin'wana kumbe ku tshama na yena; kambe Xikwembu xi ndzi kombisile leswaku ndzi nga tshuki ndzi vula munhu leswaku wa yila, kumbe a nga tenganga. ₂₉Hikokwalaho, loko ndzi vitaniwile, ndzi tile ndzi nga kanakani; kutani sweswi ndzi lava ku tiva leswaku xana mi ndzi vitanele yini ke?”

₃₀Hiloko Korneliyo a hlamula, a ku: “Sweswi ku hundzile masiku manharhu, a ndzi ri karhi ndzi khongela endlwini ya mina hi nkarhi wa 3 nindzhenga; kutani ndzi vona munhu a yimile emahlweni ka mina, a ambele leswo vangama, ₃₁a ku: ‘Korneliyo, ku khongela ka wena ku yingisiwile, ni swihanano swa wena swi anakanyiwile emahlweni ka Xikwembu. ₃₂Sweswi ke rhuma vanhu va ya eYopa, va ya vitana Simoni, loyi va nge i Petro; ú rhurheriwile endlwini ya Simoni, mutlhuvutsi wa madzovo, kusuhi ni lwandle.’ ₃₃Hikokwalaho ndzi hatlisile ku rhuma vanhu eka wena; kutani u endlile swona loko u tile; sweswi ke hinkwerhu hi tshamile swin'we, laha mahlweni ka Xikwembu, ku yingisa hinkwaswo leswi Hosi yi ku leriseke swona.”

₃₄Kutani Petro a sungula ku vulavula a ku: “Ndza twisisa swinene sweswi leswaku Xikwembu a xi yi hi nghohe; ₃₅kambe, ematikweni hinkwawo, loyi a xi chavaka a vuya a endla leswi lulameke, xa n'wi tsakela. ₃₆Rito leri xi ri rhumeleke Vaisraele, ma ri tiva, ri nga rito leri twarisaka mahungu lamanene ya ku rhula ha Yesu Kriste, yena Hosi ya vanhu hinkwavo. ₃₇Mi tiva ni timhaka leti humeleleke etikweni hinkwaro ra Yudiya, ti nga leti sunguleke hi le Galeliya, endzhaku ka nkhuvulo lowu twarisiweke hi Yohane; ₃₈mi tiva ni ta Yesu wa Nazareta, ni hilaha Xikwembu xi cheleke hakona Moya lowo Kwetsima ni matimba ehenhla ka yena. A a famba-famba hinkwako, a ri karhi a endla leswinene, a horisa hinkwavo lava xanisiwaka hi Diyavulosi, hikuva Xikwembu a xi ri na yena. ₃₉Loko hi ri hina, hi timbhoni ta hinkwaswo leswi a swi endleke etikweni ra Vayuda, ni le Yerusalema; hi yena loyi va n'wi dlayeke hi ku n'wi hayeka emhandzeni. ₄₀Kambe Xikwembu xi n'wi pfuxile eku feni hi siku ra vunharhu, kutani xi n'wi kombile, ₄₁ku nga ri ka tiko hinkwaro, kambe eka timbhoni leti xi ti hlawuleke ka ha ri ku sunguleni, hi nga hina lava hi nga dya na yena, hi nwa na yena, endzhaku ka loko a pfukile eku feni. ₄₂Kutani ú hi lerisile ku twarisa Evhangeli etikweni, ni ku tiyisa vumbhoni bya leswaku hi yena loyi a vekiweke hi Xikwembu ku va muavanyisi wa lava hanyaka ni lava feke. ₄₃Hi yena loyi vaprofeta hinkwavo va vuleke vumbhoni ehenhla ka yena loko va te: ‘Un'wana ni un'wana la pfumelaka ka yena, ú ta kuma ku rivaleriwa ka swidyoho hi vito ra yena.’ ”

₄₄Loko Petro a ha vulavula hi timhaka teto, Moya lowo Kwetsima wu xikela ehenhla ka hinkwavo lava yingisaka Rito. ₄₅Kutani vapfumeri va Vayuda lava teke na Petro, va hlamala ngopfu, loko va vona leswaku nyiko ya Moya lowo Kwetsima yi averiwa na vona vamatiko. ₄₆Hikuva a va va twa va vulavula hi tindzimi tin'wana, va ri karhi va dzunisa Xikwembu. Kutani Petro a ku: ₄₇“I mani la nga alaka sweswi leswaku vanhu lava va khuvuriwa hi mati, leswi va amukeleke Moya lowo Kwetsima kukotisa hina ke?” ₄₈Kutani a lerisa leswaku va khuvuriwa hi vito ra Yesu Kriste. Vona va n'wi kombela leswaku a xwa na vona masiku ma nga ri mangani.