Baruku 1

₁Lawa i marito ya buku leyi tsariweke hi Baruku, n'wana Neriya, wa Maaseya, wa Sedekiyasi, wa Hasadiya, wa Hilkiya. Baruku ú tsarile buku leyi a ri eBabilona, ₂hi lembe ra vu-5 hi siku ra 7 ra n'hweti, hi nkarhi lowu Vakalediya va hlaseleke muti wa Yerusalema va wu hisa. ₃Kutani Baruku ú hlayile marito ya kona emahlweni ka Yekoniya, n'wana Yoyakimi hosi ya Yuda ni le mahlweni ka vanhu hinkwavo lava teke ku ta twa timhaka leti. ₄Naswona lava tweke ta buku leyi i tinhenha, ni tinganakana, ni vakulukumba, ni vanhu hinkwavo lavakulu ni lavatsongo, lava tshamaka eBabilona kusuhi ni nambu wa Sudu.

₅Loko buku leyi yi ri karhi yi hlayiwa, vanhu va sungula ku rila, va titsona swakudya ni ku khongela emahlweni ka HOSI Xikwembu; ₆kutani va hlenga mali, un'wana ni un'wana a humesa hilaha a swi kotaka hakona. ₇Va rhumela mali leyi eYerusalema eka Yoyakimi muprista lonkulu, n'wana Hilkiya, wa Xalumi, ni le ka vaprista ni le ka vanhu hinkwavo lava a va ri na Yoyakimi eYerusalema.

₈Hi nkarhi wolowo, hi siku ra 10 ra n'hweti ya Sivani, Baruku a teka swibya swa yindlu ya HOSI, leswi a swi susiwile eTempeleni, a swi tlherisela etikweni ra Yuda. Swibya swa kona swa silivhere a swi ri leswi Sedekiyasi n'wana Yosiya hosi ya Yuda, a swi endleke ₉endzhaku ka loko Nebukadnetsara a rhurhisile Yekoniya, ni tinganakana, ni vabohiwa, ni tinhenha, ni vanhu van'wana va tiko eYerusalema, a va yisa eBabilona.

₁₀Ku tsariwile ni papila leri nge: “Laha hi mi rhumela mali; hikokwalaho xavani ha yona swa magandzelo yo hisiwa ni ya swidyoho ni ya mirhi ya risuna. Lulamisani mapa hi swa le masin'wini, mi humesa magandzelo ha wona alitarini ya HOSI Xikwembu xa hina. ₁₁Naswona khongelelani Nebukadnestsara hosi ya Babilona, na Belxatsara n'wana wa yena, leswaku masiku ya vona emisaveni ma engeteleleka, tilo ri ko ri hundza. ₁₂Hikokwalaho, HOSI Xikwembu xi ta hi nyika matimba, xi hi voningela, kutani hi ta hanya ehansi ka mfumo wa Nebukadnetsara hosi ya Babilona, ni le hansi ka mfumo wa Belxatsara n'wana wa yena, hi ta kota ku va tirhela masiku yo tala, kutani vona va ta hi twela vusiwana. ₁₃Naswona mi hi khongelela eka HOSI Xikwembu xa hina, hikuva hi xi dyoherile, kutani ku fikela namuntlha ku hlundzuka ka xona ni vukari bya xona a swi hi sukelanga. ₁₄Mi fanele ku hlaya buku leyi hi mi rhumelaka yona, leswaku mi ta tivula swidyoho endlwini ya HOSI Xikwembu hi masiku ya minkhuvo ni ya tinguva leti ti vekiweke.

₁₅“Mi ta vula mi ku: ‘Ku lulama i ka HOSI Xikwembu xa hina, kasi namuntlha tingana ti le ka hina, ni le ka vanhu va Yuda, ni le ka vaaki va Yerusalema, ₁₆ni le ka tihosi ta hina, ni le ka tinganakana ta hina, ni le ka vaprista va hina, ni le ka vaprofeta va hina, ni le ka vatata wa hina, ₁₇hikuva hi dyohile emahlweni ka HOSI Xikwembu, ₁₈a hi xi yingisanga. Naswona a hi endlanga hilaha HOSI Xikwembu xa hina xi vuleke hakona, a hi fambanga hi milawu leyi xi hi vekeleke yona. ₁₉Ku sukela siku leri HOSI Xikwembu xa hina xi humeseke vatata wa hina etikweni ra Egipta ku fikela namuntlha, a hi yingisanga ku lerisa ka xona, hi honisile rito ra xona. ₂₀Hikokwalaho ku fikela namuntlha, hi weriwa hi makhombo ni ndzhukano lowu HOSI Xikwembu xi wu vuleke ha Muxe nandza wa xona, hi nkarhi lowu xi humeseke vatata wa hina etikweni ra Egipta, leswaku xi ta hi nyika tiko leri khulukaka hi ntswamba ni vulombe. ₂₁A hi yingisanga rito ra HOSI Xikwembu xa hina, leri vuriweke hi vaprofeta hinkwavo, lava xi va rhumeke eka hina. Un'wana ni un'wana wa hina ú endlile leswi rhandzaka hi mbilu ya yena ya tihanyi, a gandzela swikwembu swin'wana ni ku endla leswo homboloka emahlweni ka HOSI Xikwembu xa hina.