Baruku 2

₁“ ‘Kutani HOSI Xikwembu xi tiyisa rito ra xona, leri xi ri vuleke ku kaneta hina ni vaavanyisi va hina etikweni ra Israele, ni tihosi ta hina, ni tinganakana ta hina, ni vanhu va Israele na Yuda. ₂Ehansi ka tilo a ku si tshama ku endliwa swo fana ni leswi HOSI Xikwembu xi swi endleke eYerusalema, hi ku ya hi leswi tsariweke enawini wa Muxe. ₃Hi dyohile hinkwerhu, lero a hi dya nyama ya vana va hina va xinuna kumbe va xisati. ₄Hikokwalaho, HOSI Xikwembu xi endlile vanhu va hina ku va mahlonga ya mimfumo hinkwayo leyi yi hi rhendzeleke, leswaku va va xisandzu ni nhlomulo exikarhi ka vanhu va matlhelo hinkwavo laha xi va hangalaseke kona. ₅Va tsongahatiwile, a va kurisiwanga, hikuva hi dyohele HOSI Xikwembu xa hina hi ku honisa vito ra xona.

₆“ ‘Ku lulama i ka HOSI Xikwembu xa hina, kambe tingana ti le ka hina ni le ka vatata wa hina ku fikela namuntlha. ₇Makhombo hinkwawo lawa HOSI Xikwembu xi hi chaviseke ha wona, ma hi werile. ₈Kambe a hi kombelanga tintswalo eka xona, a ku na un'we wa hina la nga hundzuka emiehleketweni ya mbilu ya yena leyo homboloka. ₉Kutani HOSI Xikwembu xi hi lunghisele makhombo, xi hi vangela wona, hikuva xi lulamile emintirhweni hinkwayo ya xona leyi xi hi lerisaka ku yi endla. ₁₀Kambe a hi yingisanga rito ra xona, a hi fambanga hi milawu leyi xi hi vekeleke yona.

₁₁“ ‘Kutani sweswi we HOSI Xikwembu xa Israele, hi wena u humeseke vanhu va wena etikweni ra Egipta hi voko ra matimba, hi swikombiso ni swihlamariso ni matimba lamakulu ni voko leri tshambulutiweke, kutani u tiendlele vito leri dzunisiwaka ku fikela namuntlha. ₁₂Kasi hina hi dyohile, a hi ku chavanga, hi endlile leswo biha, we HOSI Xikwembu xa hina, a hi fambanga hi milawu ya wena. ₁₃Vukari bya wena a byi hi sukele, hikuva hi sele hi ri nhlayo leyitsongo exikarhi ka matiko lawa u hi hangalaseke eka wona. ₁₄We HOSI Xikwembu xa hina, yingisa swikhongelo ni swikombelo swa hina, u hi kutsula hi tintswalo ta wena, u hi pfuna emahlweni ka lava hi tiseke evukhumbini. ₁₅Kutani misava hinkwayo yi ta tiva leswaku u HOSI, Xikwembu xa hina, hikuva rixaka hinkwaro ra Vaisraele ri vitiwa hi vito ra wena.

₁₆“ ‘We HOSI, languta ehansi u ri vutshan'wini bya wena lebyo hlawuleka, kutani u hi tsundzuka. Rhiya ndleve ya wena we HOSI, u hi yingisa. ₁₇Pfula mahlo ya wena, u languta; lava nga rhelela va ya exivandleni xa vafi, lava moya wa vona wu susiweke emirini ya vona, a hi vona va nga ta vula leswaku ku dzuneka ni ku lulama i ka wena. ₁₈Kambe munhu la nga le ku vavisekeni lokukulu, la famba-fambaka a korhamile a nga riki ni matimba, loyi mahlo ya yena ma karhaleke, la twaka ndlala, hi yena la nga ta vula leswaku ku dzuneka ni ku lulama i ka wena, we HOSI.

₁₉“ ‘A hi khongeleli tintswalo ta wena hikwalaho ka ku lulama ka mintirho ya vatata wa hina kumbe ya tihosi ta hina, we HOSI Xikwembu xa hina. ₂₀Hikuva u rhumerile ku hlundzuka ka wena ni vukari bya wena eka hina, hilaha u vuleke hakona hi malandza ya wena, ku nga vaprofeta, siku u nga te: ₂₁“Mina hosi ndzi ri: korhamisani tinhamu ta n'wina mi tirhela hosi ya le Babilona, kutani mi ta tshama etikweni leri ndzi ri nyikeke vatata wa n'wina. ₂₂Loko mi nga yingisi rito ra mina HOSI Xikwembu, ni loko mi nga tirheli hosi ya le Babilona, ₂₃tiko leri ndzi ta ri hundzula mananga layo chavisa, ku nga ha tshami munhu eka rona: tinsimu ta ntsako ni ta minkhuvo ya vukati a ti nga ha twiwi emitini ya Yuda ni le magondzweni ya Yerusalema.”

₂₄“ ‘Kambe a hi yingisanga rito leri ra wena. A hi tirhelanga hosi ya le Babilona; kutani u endlile hilaha u vuleke hakona hi malandza ya wena ku nga vaprofeta. Hikokwalaho marhambu ya tihosi ta hina ni marhambu ya vatata wa hina ma yimburiwile ma humesiwa emasirheni, ₂₅kutani ma hangalasiwile erivaleni, ma tshwa hi mumu ninhlekanhi, ma wela hi gwitsi nivusiku. Vatatana va lovile eku xanisekeni lokukulu, hi ndlala ni matlhari ni mintungu. ₂₆Kutani Tempele leyi vitiwaka hi vito ra wena u yi endle leswi yi nga xiswona namuntlha, hikwalaho ka ku homboloka ka vanhu va Israele ni va Yuda.

₂₇“ ‘Hambiswiritano u hi endlile hi tintswalo ni nsovo lowukulu, we HOSI Xikwembu xa hina, ₂₈hilaha u vuleke hakona hi nandza wa wena Muxe siku leri u n'wi leriseke ku tsala nawu wa wena emahlweni ka vanhu va Israele. U vurile we HOSI, u ku: ₂₉“Loko mi nga yingisi rito ra mina, ntshungu lowukulu lowu wu ta hundzuka lowutsongo exikarhi ka matiko laha ndzi nga ta wu hangalasela eka wona. ₃₀Ndza swi tiva leswaku a va nga ndzi yingisi, hikuva i vanhu va tinhamu to sihalala. Hambiswiritano, loko va yisiwile evukhumbini, va ta tlhela va tianakanya. ₃₁Va ta swi tiva leswaku hi mina HOSI Xikwembu xa vona. Ndzi ta va nyika mbilu leyi twisisaka ni tindleve leti yingisaka. ₃₂Kutani va ta ndzi dzunisa etikweni ra vukhumbi bya vona, naswona va ta tsundzuka vito ra mina. ₃₃Kutani va ta hundzuka eku tinonon'hwiseni ka vona ni le mintirhweni ya vona leyo homboloka, hikuva va ta tsundzuka tindlela ta vatata wa vona lava va ndzi dyoheleke mina HOSI. ₃₄Ndzi ta va tlherisela etikweni leri ndzi hlambanyeke ku ri nyika vatata wa vona, eka Abrahama na Isaka na Yakobo, kutani va ta ri fuma; ndzi ta va andzisa, va nga ka va nga ha hungutiwi. ₃₅Ndzi ta endla ntwanano lowu nga heriki na vona, ndzi va Xikwembu xa vona, kutani vona va va vanhu va mina. Vanhu va mina va Israele, ndzi nga ka ndzi nga ha va susi nakambe etikweni leri ndzi va nyikeke rona.”