Daniele 4

₁Hosi Nebukadnetsara ú rhumela mahungu eka vanhu va tinxaka hinkwato lava akeke emisaveni, lava vulavulaka tindzimi to hambana-hambana a ku ka vona: “Ku rhula a ku ve na n'wina! ₂Ndzi vone swi lulamile eka mina ku mi komba mahlori hinkwawo lawa Xikwembu xa le henhla-henhla xi ndzi endleleke wona.

₄“Mina Nebukadnetsara a ndzi ri endlwini ya mina ya le ntsindza, ndzi titshamerile hi ku rhula. ₅Kutani loko ndzi etlele, ndzi lorha norho lowu wu nga ndzi chavisa, ndzi twa nhloko ya mina yi pfuma hikwalaho ka xivono lexi ndzi xi voneke. ₆Hiloko ndzi veka nawu lowu nge, tintlhari hinkwato ta Babilona, ti fanele ku ta eka mina, ti ta ndzi hlamusela leswi norho lowu wu vulaka swona. ₇Kutani vangoma, ni vavhumbhi, ni Vakalediya, ni lava tivaka tinyeleti va ta eka mina, leswaku ndzi ta va tivisa norho wa mina, kambe vona a va kotanga ku ndzi hlamusela leswi wu vulaka swona. ₈Kutani eku heteleleni, ku ta fika Daniele loyi a nga thyiwa vito ra Beltexatsara, ri nga vito ra xikwembu xa mina; naswona moya wa swikwembu leswo hlawuleka wu le henhla ka yena. Kutani ndzi n'wi tivisa norho wa mina, ndzi ku: ₉We Beltexatsara, wena ndhuna ya vangoma, ndza swi tiva leswaku moya wa swikwembu leswo hlawuleka wu le henhla ka wena; ku hava xihundla lexi u tumbeteriweke xona. Norho lowu ndzi wu lorheke hi lowu, kutani wena ndzi byele leswi wu vulaka swona. ₁₀Loko ndzi etlele, ndzi vonile xivono lexi: Ndzi vone murhi wo leha swinene wu mirile emisaveni. ₁₁Murhi wa kona wu ya wu kula, wu tiya, wu ya dliva ni le tilweni hi ku leha ka wona, wu voniwa emisaveni hinkwayo. ₁₂Matluka ya wona a ma sasekile, ni mihandzu ya wona a yi tele; vanhu hinkwavo a va kuma swakudya eka wona, swiharhi swi vundza endzhutini wa wona, tinyanyana ti phatsama emarhavini ya wona; swivumbiwa hinkwaswo a swi hanyisiwa hi wona.

₁₃“Loko ndza ha etlele, ndzi vona mulanguteri wo hlawuleka a xika hi le tilweni. ₁₄A huwelela a ku: ‘Tsemani murhi, mi khutulela marhavi; hundlani matluka, mi hangalasa ni mihandzu ya kona; swiharhi leswi vundzeke hansi ka wona a swi suke, na tona tinyanyana leti phatsameke emarhavini ya wona a ti hahe ti nyamalala. ₁₅Kambe mi siya xikundzu ni timitsu ta xona emisaveni, mi xi boha hi nketani ya nsimbhi ni koporo, mi xi tshika xi funengetiwa hi nhova, xi wela hi mberha, kutani xi dya byanyi ku fana ni swiharhi. ₁₆Miehleketo ya xona a yi hundzuke yi fana ni ya swiharhi. A swi ve tano ku ringana malembe ya 7. ₁₇Lawa i makungu ya valanguteri lavo hlawuleka ni xiboho xa vona. Hikokwalaho, vanhu hinkwavo va fanele ku tiva leswaku Loyi a nga henhla-henhla ú fuma tihosi hinkwato; a nga teka vuhosi hilaha a rhandzaka hakona, a nyika swikamba byi va bya swona.’ ₁₈Lowu hi wona norho lowu ndzi wu lorheke mina hosi Nebukadnetsara. Kutani wena Beltexatsara ndzi hlamusele leswi wu vulaka swona, hikuva tintlhari hinkwato ta tiko ra mina ti tsandzekile. Kambe wena u nga swi kota, hikuva moya wa swikwembu leswo hlawuleka wu le henhla ka wena.”

₁₉Kutani Daniele la thyiweke vito ra Beltexatsara, a miyela nkarhi wo leha a chava ku boxa mhaka. Kutani hosi Nebukadnetsara a ku: “We Beltexatsara, norho ni nhlamuselo ya wona swi nga ku pfilunganyisi miehleketo.” Daniele a hlamula a ku: “N'wini wanga, norho lowu a wu kongome eka lava va ku vengaka, ni nhlamuselo ya wona a yi kongomisiwe eka valala va wena! ₂₀U vonile murhi lowu a wu kula wu tiya, wu ya dliva ni le tilweni hi ku leha ka wona, wu voniwa emisaveni hinkwayo. ₂₁Matluka ya wona a ma sasekile ni mihandzu ya wona a yi tele; vanhu hinkwavo a va kuma swakudya eka wona, swiharhi swi vundza endzhutini wa wona, ni tinyanyana ti phatsama emarhavini ya wona. ₂₂Norho lowu wu vula wena, we hosi. Vukosi bya wena i byikulu, byi tiyile, byi fika ni le tilweni; misava hinkwayo yi fumiwa hi wena. ₂₃Kutani we hosi, u vonile mulanguteri lowo hlawuleka a huma hi le tilweni, a ku: ‘Tsemani murhi mi wu herisa, kambe mi siya xikundzu ni timitsu ta xona emisaveni, mi xi boha hi nketani ya nsimbhi ni koporo, mi xi tshika xi funengetiwa hi nhova, xi wela hi mberha, xi fana ni swiharhi swa nhova, ku kondza ku hundza malembe ya 7.’ ₂₄Lawa i makungu ya Loyi a nga henhla-henhla, lama fanelaka ku hetiseka eka wena, we n'wini wanga; kutani we hosi, norho wa wena wu vula leswi: ₂₅U ta hlongoriwa u suka exikarhi ka vanhu, u ya hanya ni swiharhi swa nhova, u dya byanyi ku fana ni homu, u wela hi mberha, ku kondza ku hundza malembe ya 7. Hikona u nga ta tiva leswaku Loyi a nga henhla-henhla ú fuma tihosi hinkwato, ni leswaku ú teka vuhosi a byi nyika loyi a n'wi tsakelaka. ₂₆Xileriso xa leswaku xikundzu ni timitsu ta xona swi siyiwa, xi vula leswaku u ta tlheriseriwa vuhosi bya wena, loko u ta va u tivile leswaku Loyi a nga henhla-henhla, hi yena la fumaka. ₂₇Kutani we hosi, amukela switsundzuxo swa mina: Tshika swidyoho swa wena, u endla leswo lulama; herisa ni ku homboloka ka wena, u komba tintswalo eka lava xanisiwaka; kumbexana, u nga engeteleriwa malembe ya ku tsaka.”

₂₈Timhaka leti hinkwato ti humelerile eka hosi Nebukadnetsara. ₂₉Loko ku hundzile tin'hweti ta 12, Nebukadnetsara a a ri karhi a famba-famba elwangwini ra yindlu ya le ntsindza le Babilona. ₃₀Kutani a ku: “Muti lowukulu lowu wa Babilona, ndzi wu akile hi matimba ya mina ntsena, leswaku wu va ntsindza wa mina, wu dzunisa vukulukumba bya mina!” ₃₁Loko hosi ya ha vulavula, ku twala rito leri humaka etilweni, ri ku: “We Nebukadnetsara, tiva leswaku vuhosi bya wena, u tekeriwile byona. ₃₂U ta hlongoriwa u suka exikarhi ka vanhu, u ya tshama ni swiharhi swa nhova, u dya byanyi ku fana ni homu. Swi ta va tano malembe ya 7, u kondza u tiva leswaku Loyi a nga henhla-henhla ú fuma tihosi hinkwato, ni leswaku ú teka vuhosi a byi nyika loyi a n'wi tsakelaka.” ₃₃Marito lawa ma hatle ma hetiseka eka Nebukadnetsara. Ú hlongoriwile a suka exikarhi ka vanhu, a ya dya byanyi ku fana ni homu, miri wa yena wu wela hi mberha, misisi ya yena yi kula yi leha ku fana ni tinsiva ta gama, ni min'wala ya yena yi leha ku fana ni ya tinyanyana.

₃₄Nebukadnetsara a ku: “Loko nkarhi lowu vekiweke wu hundzile, mina Nebukadnetsara ndzi tlakusile mahlo ndzi languta ehenhla, kutani miehleketo ya mina yi vuya, ndzi dzunisa ni ku tlangela ni ku twarisa Loyi a nga henhla-henhla, Loyi a hanyaka hilaha ku nga heriki, ndzi ku:

₃₆“Enkarhini wolowo, loko miehleketo ya mina yi vuyile, ndzi tlhele ndzi kuma ku dzuneka ka mfumo wa mina ni vukulukumba bya mina lebyo hlamarisa. Tindhuna ta mina ni vatsundzuxi va mina va ndzi tekile, va ndzi tlherisela evuhosini bya mina, kutani ndzi kombiwa xichavo ku tlula eminkarhini leyi hundzeke. ₃₇Kutani sweswi mina Nebukadnetsara, ndzi dzunisa Hosi ya matilo, ndzi yi tlangela ni ku yi komba xichavo, hikuva mintirho ya yona hinkwayo i yinene, ni tindlela ta yona ti lulamile; lava tikurisaka, ya swi kota ku va tsongahata.”