Duteronoma 3

₁“Kutani hi suka etikweni ra Sihoni, hi tlhandluka hi ndlela leyi kongomaka eBaxani; hiloko Ogo hosi ya le Baxani ni mavuthu ya yena hinkwawo va huma ku ta lwa na hina le Edreyi. ₂Kambe HOSI Xikwembu xi ku ka mina: ‘Mi nga n'wi chavi, hikuva ndzi n'wi nyiketile emavokweni ya n'wina, yena ni vanhu va yena hinkwavo, ni tiko ra yena. Mi ta n'wi endla leswi mi swi endleke Sihoni hosi ya Vaamori loyi a a tshama eHexiboni.’ ₃Kutani HOSI Xikwembu xi nyiketa na yena Ogo hosi ya le Baxani emavokweni ya hina, yena ni vanhu va yena hinkwavo, hi va dlaya ku nga sali na un'we wa mhamba. ₄Enkarhini wolowo, le xifundzheni xa Arigobi laha a ku fuma Ogo hosi ya le Baxani, a ku ri ni miti ya 60, kutani hi yi tekile hinkwayo hi nga siyi na wun'we. ₅Miti ya kona hinkwayo a yi ri makhokholo, yi biyeleriwile hi rirhangu lero leha, yi ri ni timbanti leti gogiwaka. Kusuhi na yona, a ku ri ni swimitana leswo tala leswi nga biyeleriwangiki. ₆Hi herisile miti leyi hinkwayo, vaaki va yona hi va endla leswi hi swi endleke Sihoni hosi ya le Hexiboni, hi herisa vavanuna, ni vana ni vavasati. ₇Hi lo teka ntsena swifuwo, ni swilo leswi hi swi phangheke emitini loko hi yi hlasela.

₈“Enkarhini wolowo, hi tekile tiko hinkwaro ra le vuxeni bya nambu wa Yordani, leri a ri fumiwa hi tihosi letimbirhi ta Vaamori, ku sukela enkoveni wa Arinoni ku ya fika entshaveni ya Hermoni. ₉(Ntshava ya Hermoni, va le Sidoni va yi vula ‘Siriyoni’, Vaamori vona va yi vula ‘Seniri’.) ₁₀Hi tekile miti hinkwayo leyi a yi ri erivaleni ra Baxani, laha a ku fuma Ogo; hi tekile ni tindhawu hinkwato ta Giliyadi, ku ya fika emitini ya Saleka na Edreyi.”

₁₁(Va ka Refayimi a va herile, a ku lo sala ntsena Ogo hosi ya le Baxani; mubedwa wa yena a wu ri wa nsimbhi, wu lehile 4,50 m wu anamile 2 m, hi mimpimo leyi toloveriweke hi vanhu hinkwavo, kutani wa ha ri kona ni namuntlha emutini wa Rabata etikweni ra Vaamoni.)

₁₂“Enkarhini lowu hi tekeke tiko ri va ra hina, va ka Rhuveni ni va ka Gadi ndzi va nyikile tindhawu en'walungwini wa muti wa Arowere egangeni ra nkova wa Arinoni, ni hafu ya maganga ya Giliyadi ni miti ya kona. ₁₃Hafu ya va ka Manase ndzi va nyikile tindhawu leti saleke ta tiko ra Giliyadi, ni tiko hinkwaro ra Baxani leri a ri fumiwa hi Ogo, leri katsaka xifundzha hinkwaxo xa Arigobi. (Tindhawu leti hinkwato ta Baxani ti vuriwa tiko ra va ka Refayimi. ₁₄Yayiro n'wana Manase, ú tekile xifundzha hinkwaxo xa Arigobi, ri nga tiko ra Baxani ku ya fika endzilekaneni wa Vagexuri ni Vamaakati; kutani Yayiro a thya miti ya kona hinkwayo evito ra yena, ninamuntlha ya ha tiviwa hi vito ra ‘Havhota-Yayiro’.) ₁₅Va ka Makiri vona, ndzi va nyikile tiko ra Giliyadi. ₁₆Va ka Rhuveni ni va ka Gadi, ndzi va nyikile ndhawu leyi sukelaka eGiliyadi yi ya fika enkoveni wa Arinoni. Nkova lowu a wu ri ndzilekana hi tlhelo ra dzonga, kasi en'walungwini ndzilekana a wu ri nambu wa Yaboko, lowu nga ndzilekana wa Vaamoni hi tlhelo ra le vuxeni. ₁₇Hi tlhelo ra vupeladyambu, tiko ra vona a ri katsa Nkova wa Yordani, lowu sukelaka eka Tiva ra Galeliya, wu ya fika eLwandle-ra-Araba, ri nga Lwandle-ra-ku-fa, leri nga hansi ka swinkobyana swa ntshava ya Pisga, hi tlhelo ra vuxa.

₁₈“Enkarhini wolowo, ndzi va lerisile ndzi ku: ‘HOSI Xikwembu xa n'wina xi mi nyikile tiko leri ri va ra n'wina. Masocha ya n'wina hinkwawo ma fanele ku pela nambu wa Yordani ma hlomile, ma rhangela Vaisraele, vona vamakwenu. ₁₉Kambe vasati va n'wina ni vana va ta sala emitini leyi ndzi mi nyikeke yona; hambi swi ri swifuwo swa n'wina swi ta sala; ndza swi tiva leswaku mi ni swifuwo leswo tala. ₂₀Mi ta pfuna vamakwenu ku kondza HOSI Xikwembu xa n'wina xi va wisisa, va teka tiko leri xi va nyikeke rona entsungeni wa nambu wa Yordani. Kutani un'wana ni un'wana exikarhi ka n'wina ú ta tlhelela endhawini leyi ndzi n'wi nyikeke yona.’ ₂₁Kutani enkarhini wa kona ndzi lerisile Yoxuwa, ndzi ku: ‘Hinkwaswo leswi HOSI Xikwembu xa wena xi swi endleke tlhosi letimbirhi, u swi vonile hi mahlo. Kutani matiko hinkwawo lawa u nga ta nghena eka wona, HOSI Xikwembu xi ta ma endla sweswo. ₂₂Wena u nga ma chavi, hikuva HOSI Xikwembu xa wena hi xona lexi xi nga ta ku lwela.’

₂₃“Enkarhini wolowo, ndzi khongerile HOSI Xikwembu hi matimba, ndzi ku: ₂₄‘We HOSI N'wini wanga, leswi u ndzi kombeke swona i masungulo ntsena ya mintirho leyikulu yo hlamarisa leyi u lavaka ku yi endla. A ku na xikwembu xin'wana etilweni ni laha misaveni lexi kotaka ku endla mintirho ya matimba ku fana na wena! ₂₅Ndzi kombela leswaku u ndzi pfumelela ku pela nambu wa Yordani, ndzi ya vona tiko leriya ro saseka ra maganga lamanene, ni tintshava ta Lebanoni.’ ₂₆Kambe HOSI Xikwembu a xi ndzi hlundzukerile hikwalaho ka n'wina, kutani xi ala xikombelo xa mina, xi ndzi hlamula xi ku: ‘Miyela! Mhaka leyi, u nga ha vulavuli hi yona. ₂₇Tlhandlukela entshaveni ya Pisga, u ya yima enhlohlorhini ya yona, u languta evuxeni ni le vupeladyambu, u languta edzongeni ni le n'walungwini: Tiko ra kona, u to ri vona kunene, hikuva nambu lowu wa Yordani, a wu nga wu peli! ₂₈Kambe lerisa Yoxuwa, u n'wi tiyisa nhlana ni ku n'wi nyika matimba, hikuva hi yena loyi a nga ta rhangela vanhu lava emahlweni, a ya va nghenisa etikweni leri u ri vonaka, ri va ra vona.’ ₂₉Kwalaho, hi tshamile enkoveni lowu langutaneke ni muti wa Beta-Peyori.