Estere (Xigriki) F

₁Loko ku hundze masiku manharhu, Estere a heta ku khongela, kutani a hluvula leswi a a ambale swona loko a khongela Xikwembu, a tibombisa hi leswo saseka. ₂Endzhaku ka xikhongelo xa yena xo kombela ku pfuniwa hi Xikwembu, Muponisi la vonaka hinkwaswo, a tibombisa hi swiambalo swa vunkosikazi, kutani a teka malandza ya yena ya xisati mambirhi, ₃a famba a tiseketele hi un'we wa vona, ₄lon'wana yena a n'wi sale ndzhaku a khomelele makumu ya nceka wa yena leswaku wu nga khumbi hansi wu tola thyaka. ₅Estere a a lo khasáá hi ku saseka, naswona a a languteka a tsakile no rhandzeka, kambe mbilu ya yena a yi tele hi ku chava. ₆Loko a nghenile etinyangweni hinkwato, Estere a yima emahlweni ka hosi. Ahasuwerusi a a tshamile exiluvelweni xa yena, a ambarile swiambalo swa yena swa vuhosi leswi a swi sasekisiwile hi nsuku ni maribye ya nkoka, a a chavisa swinene. ₇Xikandza xa yena a xi vuvumela hi ntikelo wa vuhosi, kambe loko a tlakusa mahlo a vona Estere, xikandza xa yena xi visingana hi ku hlundzuka loku chavisaka. Nkosikazi a hela matimba, a kwalala, kutani a titivala, a wela ehenhla ka nandza wa xisati loyi a a tiseketela hi yena.

₈Kutani Xikwembu xi rhulisa mbilu ya hosi Ahasuwerusi, moya wa yena wu rhelela. Hi ku tshuka a tlula xikan'we a ya angarha Estere ku kondza a sisimuka; kutani a n'wi chavelela hi marito yo rhulisa mbilu, a ku: ₉“Swi lo yini, Estere? Ndzi makwenu! Tiya mbilu. ₁₀U nga ka u nga fi, hikuva nawu lowu wu kongomisiwe eka vanhu ntsena. Tshinela haleno.” ₁₁Kavaloko Ahasuwerusi a tlakusa nhonga ya nsuku ya vuhosi, a khumba nhamu ya Estere hi yona, ₁₂a n'wi angarha, a ku: “Ndzi byele.”

₁₃Kutani nkosikazi a ku ka yena: “Hosi yanga, ndzi ku vonile u fana ni ntsumi ya Xikwembu, kutani mbilu ya mina yi tshukisiwile hi ku dzuneka ka wena. ₁₄Wa hlamarisa wena n'wini wanga, naswona xikandza xa wena xi tele nsovo.”

₁₅Kambe loko Estere a ha vulavula, a tlhela a titivala. ₁₆Ahasuwerusi a karhateka ngopfu, kutani malandza ya yena hinkwawo ma ringeta ku rhulisa Estere.