Nawu wo seketela Vayuda
1Leri hi rona tsalwa ra nawu wa kona:
“Eka vafambisi va swifundza swa 127, ku sukela le Indiya ku ya fika le Etiyopiya, ni le ka hinkwavo lava hlayisaka nawu wa mfumo wa mina, mina hosi leyikulu Ahasuwerusi, ndzi ri: ‘Xewani!’
2“Vanhu lava fundzhiwaka ngopfu hi hina vapfuni va vona va tala ku tikukumuxa ku tlula mpimo. 3A va lavi ntsena ku xanisa vanhu va hina, kambe hi ku pyopyiwa hi rifuwo va tshama hina vapfuni va vona exikungu! 4A va nkhensi leswi vanhu va va endlelaka swona, kambe va yengiwa hi lavo homboloka lava va va dzunisaka; kutani va ehleketa leswaku va nga baleka ku avanyisa lokunene ka Xikwembu lexi xi vonaka hinkwaswo.
5“Hakanyingi lava nga tlakusiwa emfun'weni va tala ku kumeka exikarhi ka vahalati va ngati yo pfumala nandzu. Va twanana ni vaonhi va swilo leswi nga ta ka swi nga ha lulamiseki, hikwalaho ko kuceteriwa hi vanghana va vona lava vekiweke ku fambisa timhaka ta tiko. 6Hi vuxisi bya vona va hombolokisa vunene bya vafumi va vona.
7“Mhaka yo soleka ya lava tirhisaka mfumo hi ndlela leyi yo homboloka a yi kumeki ntsena eka matimu ya khale ya tiko ra hina. Kambe loko hi xiyaxiya swinene, hi yi kuma yi humelela ni sweswi.
8“Eka nkarhi lowu taka ndzi ta vona leswaku mfumo wa mina wu va ni ku rhula, ni leswaku vanhu hinkwavo va wona va va ni ku hlayiseka. 9Hikokwalaho, ndzi ta hundzuluxa tindlela ta mina ta mafumele, ndzi avanyisa hi ku lulama timhaka leti ndzi vikeriwaka tona.
10“Ku ni ta Hamani n'wana Hamedata, munhu wa le Makedoniya, loyi a nga riki wa ngati ya Vaperesi, naswona a nga faneriwiki hi tintswalo ta mina. Hamani loyi ú amukeriwile ka mina. 11Ú tiphinile hi musa lowu ndzi wu kombaka vanhu va tinxaka hinkwato, lero a vitaniwa tata wa mina. Naswona vanhu hinkwavo a va n'wi nkhinsamela, hileswi a a ri ndhunankulu emfun'weni wa mina.
12“Kambe hikwalaho ka ku tikukumuxa ka yena, ú sungurile ku ndzi dyelela emfun'weni ni le vutomini bya mina. 13Hi vukanganyisi ni vuxisi lebyi enteke ú komberile leswaku ku dlayiwa Mordekayi, muponisi ni mupfuni wa mina minkarhi hinkwayo, na Estere loyi a nga riki na xisolo emfun'weni wa mina, xikan'we ni rixaka ra vona hinkwaro. 14Hi ndlela leyi a a ehleketa leswaku ndzi ta pfumala vasirheleli, kutani swi ta n'wi olovela ku teka mfumo wa hina Vaperesi, a wu nyiketa eka Vamakedoniya. 15Kasi ndzi kumile leswaku Vayuda lava a va lunghiseriwe ku herisiwa hi wanuna lowo homboloka loyi, a hi vanhu va tihanyi, kambe va fumiwa hi milawu leyi lulameke. 16Naswona i vanhu va Xikwembu lexi nge henhla-henhla, Xikwembu lexi hanyaka xa matimba hinkwawo, lexi nga xona xi rhangelaka mfumo wa mina ni wa vatata wa mina hi ndlela leyi hetisekeke swinene.
17“Loko swi ri tano mi ta va mi endla swinene loko mi nga ha landzi xileriso xa mapapila lama rhumeriweke hi Hamani n'wana Hamedata, 18hikuva yena Hamani la endleke swilo leswi ú hayekiwile enyangweni ya Susa, kun'we ni va ndyangu wa yena hinkwavo. Hakunene Xikwembu lexi fumaka swilo hinkwaswo xi hatlisile ku n'wi ba hi nkhavi lowu wu n'wi faneleke.
19“Hikokwalaho namarhetani tsalwa ra papila leri hinkwako-kwako lomu ri nga ta voniwa hi vanhu, naswona mi pfumelela Vayuda ku hanya hi milawu ya vona. 20Mi fanele ku va pfuna, leswaku hi siku ra vu-13 ra n'hweti ya vu-12, yi nga n'hweti ya Adara, va ta tisirhelela eka lava nga ta va hlasela hi siku ra ku xaniseka ka vona. 21Hikuva Xikwembu lexi fumaka swilo hinkwaswo xi hlawurile siku leri leswaku ri va ra ntsako eka vahlawuriwa va xona, ku nga ri siku ra ku herisiwa ka vona.
22“Hikokwalaho mi fanele mi hlayisa siku leri hi ntsako lowu hetisekeke, mi ri hlawulekisa eka masiku hinkwawo ya minkhuvo ya n'wina ya switsundzuxo. 23Ku sukela sweswi ni le ka minkarhi leyi taka, ri ta va siku ra ku ponisiwa eka mina ni ka Vaperesi hinkwavo lava tshembekaka. Kambe ri va xitsundzuxo xa ku herisiwa, eka lava va ndzi tshamaka xikungu.
24“Vanhu va muti wun'wana ni wun'wana ni va tiko rin'wana ni rin'wana, handle ko hlawula, loko va tlula xileriso lexi, va ta kariheriwa, va herisiwa hi matlhari ni ndzilo. Ku hava munhu ni un'we la nga ta tlhela a nghena etindhawini teto. Ti ta nyenyemukiwa hambi hi swiharhi ni tinyanyana hilaha ku nga heriki.”
