Eksoda 10

₁Kutani HOSI Xikwembu xi ku ka Muxe: “Yana u ya nghena emutini wa Faro. Ndzi nonon'hwisile mbilu ya yena ni timbilu ta malandza ya yena, leswaku ndzi ta humesa swikombiso swa mina exikarhi ka vona, ₂kutani wena u ta rungulela vana va wena ni vatukulu va wena hilaha ndzi tlangeke hi Vaegipta hakona; u ta va hlayela ni swikombiso leswi ndzi swi humeseke exikarhi ka Vaegipta, kutani mi ta tiva leswaku hi mina HOSI Xikwembu.”

₃Kavaloko Muxe na Aroni va ya nghena emutini wa Faro, va fika va ku: “HOSI Xikwembu, xi nga Xikwembu xa Vaheveru, xi vurisa sweswo xi ku: ‘Xana u ta ala ku titsongahata emahlweni ka mina ku fikela rini ke? Tshika vanhu va mina va famba, va ya ndzi gandzela. ₄Loko u ala ku tshika vanhu va mina va famba, tiva leswaku mundzuku ndzi ta tisa tinjiya ematlhelweni hinkwawo ya tiko ra wena. ₅Tinjiya leti ti ta funengeta hinkwako laha hansi, ku sala ku nga ha vonaki; ti ta dya swilo swa n'wina leswi poneke xihangu, ti dya ni mirhi ya n'wina hinkwayo leyi hlukeke enhoveni. ₆Tindlu ta wena, ni ta malandza ya wena, ni ta vanhu hinkwavo va Egipta, ti ta tala hi tinjiya leti hambi va ri vatata wa wena ni vakokwa wa wena va nga si ti vonaka, hi mpfhuka va velekiwa ku fikela namuntlha!’ ” Kutani Muxe a hundzuluka, a huma eka Faro.

₇Hiloko malandza ya Faro ma ku ka yena: “Xana wanuna loyi ú ta hi vangela makhombo ku fikela rini xana? Pfumela leswaku ku famba vavanuna, va ya gandzela HOSI Xikwembu xa vona. Xana ni sweswi a wu si swi vona leswaku tiko ra Egipta ra lova, xana?” ₈Kavaloko Muxe na Aroni va tlhela va vitaniwa eka Faro, kutani a ku ka vona: “Mi nga ya mi ya humesela HOSI Xikwembu emagandzelo; kambe i vamani lava faneleke ku famba xana?” ₉Muxe a hlamula a ku: “Hi fanele ku famba hinkwerhu, hambi va ri lavatsongo kumbe lavakulu. Hambi va ri vana va hina va majaha kumbe vanhwana, hi ta famba na vona; na tona timbuti ni tinyimpfu ni tihomu ta hina, a ti nga sali, hikuva hi ta va ni nkhuvo wo tlangela HOSI Xikwembu.” ₁₀Kutani Faro a ku ka vona: “Loko ndzo mi tshika mi famba ni mindyangu ya n'wina, swi ta vula leswaku HOSI Xikwembu xi na n'wina! Swa vonaka leswaku mi le ku lukeni ka makungu layo biha. ₁₁E-e, loko ku ri leswaku mi tsakela ku ya humesela HOSI Xikwembu emagandzelo, a ku fambe vavanuna ntsena!” Kwalaho, Muxe na Aroni va hlongoriwa, va suka emahlweni ka Faro.

₁₂Kutani HOSI Xikwembu xi ku ka Muxe: “Tlakusela voko ra wena ehenhla ka tiko ra Egipta, leswaku tinjiya ti ta haha ti nghena etikweni, ti herisa swimilana hinkwaswo leswi poneke xihangu, ematlhelweni hinkwawo ya tiko.” ₁₃Hiloko Muxe a tlakusela nhonga ya yena ehenhla ka tiko ra Egipta; kutani HOSI Xikwembu xi hungisa moya wo huma evuxeni; wu hunga siku ra kona hinkwaro ni vusiku hinkwabyo. Loko ri xa, moya lowu a wu nghenisile tinjiya. ₁₄Kutani tinjiya ti haha ti nghena etikweni ra Egipta, ti phatsama ematlhelweni hinkwawo ya rona. Tinjiya to tarisa sweswo a ti nga si tshama ti voniwa, naswona ti nga ka ti nga ha voniwi; ₁₅ti funengeta hinkwako laha hansi, ku sala ku lo tshwukelana hi tona. Ti dyetetela swimilana hinkwaswo etikweni, ti dya ni mihandzu hinkwayo ya mirhi leyi poneke xihangu; a ti siyanga ni xilo ni xin'we xa rihlaza ematlhelweni hinkwawo ya tiko ra Egipta, ti dya hambi yi ri mirhi kumbe swimila-milani emasin'wini.

₁₆Kutani Faro a hatla a vitana Muxe na Aroni, a ku ka vona: “Ndzi dyohele HOSI Xikwembu xa n'wina, ndzi dyohele na n'wina. ₁₇Hikokwalaho, ndzi kombela leswaku mi ndzi rivalela swidyoho swa mina, kan'we ntsena; naswona ndzi khongeleleni eka HOSI Xikwembu xa n'wina, leswaku xi bakanyela kule na mina khombo leri ra tinjiya.”

₁₈Kutani Muxe a huma eka Faro, a ya khongela HOSI Xikwembu. ₁₉Hiloko HOSI Xikwembu xi tlherisa moya, xi wu hungisa wu huma evupeladyambu, wu vunga tinjiya wu ya ti chela eka Lwandle-ro-Tshwuka; ematlhelweni hinkwawo ya tiko ra Egipta, a ku salanga ni njiya ni yin'we. ₂₀Kambe HOSI Xikwembu xi nonon'hwisa mbilu ya Faro, a nga tshiki vanhu va Israele va famba.

₂₁Kutani HOSI Xikwembu xi ku ka Muxe: “Tlakusela voko ra wena ehenhla, u vanga xinyami etikweni ra Egipta, lexi nga ta endla leswaku vanhu va gugurhuteka kunene.” ₂₂Hiloko Muxe a tlakusela voko ra yena ehenhla, kutani ku va ni xinyami lexo chavisa masiku manharhu, etikweni hinkwaro ra Egipta. ₂₃Masiku manharhu lawa, vanhu va Egipta a va nga ha koti ni ku vonana; ni ku huma etindlwini a va nga ha humi; kambe hinkwako laha vanhu va Israele a va tshama kona a ku ri ni ku vonakala.

₂₄Kutani Faro a vitana Muxe na Aroni, a ku ka vona: “Yanani mi ya humesela HOSI Xikwembu emagandzelo; mindyangu ya n'wina yi nga famba na n'wina, kambe timbuti ni tinyimpfu ni tihomu ta n'wina, tona ta sala!” ₂₅Kambe Muxe a hlamula a ku: “Xana u ta hi nyika swo humesa magandzelo lama dyiwaka ni lama hisiwaka, hi gandzela HOSI Xikwembu ha swona, xana? ₂₆Swifuwo swa hina, hi fanele ku famba na swona; a ku nga sali ni xinyondzwana xa swona ni xin'we, hikuva hi ta pambula swifuwo swin'wana exikarhi ka swona, hi tlhavela HOSI Xikwembu xa hina; naswona a hi si tiva leswaku hi ta xi humesela yini, swi ta tiveka ntsena loko hi fikile kwale.”

₂₇Hambiswiritano, HOSI Xikwembu xi nonon'hwisa mbilu ya Faro, a ala ku va tshika va famba. ₂₈Kwalaho Faro a ku ka Muxe: “Suka mahlweni ka mina u famba! Tivonele leswaku ni siku ni rin'we ndzi nga ha ku voni; loko ndzo ku vona, u file!” ₂₉Kutani Muxe a ku: “Tanihilaha u vulaka hakona, u nga ka u nga ha ndzi voni, ni siku ni rin'we!”