Ezekiele 30

₁HOSI Xikwembu xi vulavula na mina xi ku: ₂“Wena munhu, tivisa Vaegipta leswaku mina HOSI N'wini wa hinkwaswo ndzi ni rito eka vona leri nge:

₅“Lava nga ta hlaseriwa swin'we ni Vaegipta i Vaetiyopiya, ni va le Putu, ni va le Ludu, ni vanhu va tinxaka tin'wana, ni va le Kubu, ni vanhu lava humaka etikweni leri ndzi endleke ntwanano na rona.

₇“Tiko ra Egipta ri ta hundzuka mananga lama chavisaka ku tlula mananga man'wana; miti ya rona yi ta va marhumbi lama chavisaka ku tlula man'wana. ₈Siku ndzi nga ta hisa tiko ra Egipta ni ku tshova matimba ya lava va ri pfunaka, hinkwavo va ta tiva leswaku HOSI Xikwembu, hi mina! ₉Hi siku rero, ndzi ta rhuma vanhu va famba hi mabyatso, va ya tshukisa va le Etiyopiya; kutani vona va ta tsemeka nhlana, esikwini leri ra ku herisiwa ka Vaegipta. Hakunene, siku ra kona, ra ta!

₁₀“Mina HOSI N'wini wa hinkwaswo ndzi ri: Ndzi ta lerisa Nebukadnetsara hosi ya le Babilona ku ya phangha rifuwo ra tiko ra Egipta; ₁₁yena ni masocha ya yena, va nga vanhu va tihanyi letikulu, ndzi ta va tisa leswaku va hlasela tiko ra Egipta, va dlaya vanhu lavo tala, ku sala mintsumbu ntsena etikweni. ₁₂Ndzi ta phyisa nambu wa Nilo, ndzi nyiketa tiko emavokweni ya vanhu lavo homboloka; ndzi ta tirhisa vanhu vambe leswaku va herisa tiko ra kona ni hinkwaswo leswi nga ka rona; ndzi vula sweswo mina HOSI.

₁₃“Mina HOSI N'wini wa hinkwaswo ndzi vurisa sweswo ndzi ri: Ndzi ta herisa swikwembu swa hava swa Vaegipta, ndzi faya swifaniso swa swikwembu swa le Nofu. Tiko ra Egipta a ri nga ha vi ni murhangeri, kutani ndzi ta ri vangela ku chava. ₁₄Ndzi ta ri hundzula mananga ematlhelweni ya le Patroso, ndzi hisa muti wa Sowani, ndzi ba ni muti wa Teba; ₁₅ndzi ta chululela vukari bya mina ehenhla ka Sini, rona khokholo va Vaegipta, ndzi herisa ni mavuthu ya le Teba. ₁₆Ndzi ta hisa tiko ra Egipta, va le Sini va ta tshombonyoka hi ku twa ku vava; rirhangu ra muti wa No ri ta fayiwa, va le Nofu va ta xaniseka masiku hinkwawo. ₁₇Majaha ya le Ono ni ya le Pi-Besete ma ta dlawa hi matlhari, lavan'wana hinkwavo va ta yisiwa evukhumbini. ₁₈Siku ndzi nga ta wisa mfumo wa tiko ra Egipta, va le Tahapanese va ta va exinyamini, kutani matimba lawa Vaegipta va tidzunisaka ha wona ma ta hela; tiko hinkwaro ri ta khubumetiwa hi xinyami, vaaki va rona va ta yisiwa evukhumbini. ₁₉Loko ndzi ta va ndzi bile Vaegipta hi mukhuva lowu, va ta tiva leswaku HOSI Xikwembu, hi mina!”

₂₀Hi lembe ra vu-11 hi ri evukhumbini, hi siku ra vu-7 ra n'hweti yo rhanga, HOSI Xikwembu xi vulavula na mina xi ku: ₂₁“Wena Ezekiele, tiva leswaku ndzi tshovile voko ra Faro hosi ya Egipta, kutani a ri boheleriwanga; hikokwalaho ri nga ka ri nga holi, naswona leswi ri nga boheleriwangiki, a ri nga ha tlheli ri kuma matimba yo tamela matlhari. ₂₂Mina HOSI N'wini wa hinkwaswo, ndzi ri ndzi lwa na Faro hosi ya le Egipta; ndzi ta n'wi tshova mavoko hi mambirhi ka wona, kutani tlhari leri a ri tameleke, ndzi ta ri wisela hansi. ₂₃Ndzi ta hangalasa Vaegipta ematikweni layo tala, va ya tshama etindhawini to hambana-hambana. ₂₄Ndzi ta tiyisa mavoko ya hosi ya le Babilona, ndzi n'wi tamerisa tlhari ra mina, kambe Faro yena ndzi ta n'wi tshova mavoko. Ú ta konya emahlweni ka hosi ya le Babilona ku fana ni munhu loyi a boxiweke timbanga leto chavisa. ₂₅Ndzi ta tiyisa mavoko ya hosi ya le Babilona, kambe mavoko ya Faro wona ma ta debya. Siku ndzi nga ta teka tlhari ra mina ndzi ri tamerisa hosi ya le Babilona, yena ú ta tlakusa voko a ba Vaegipta, kutani va ta tiva leswaku HOSI Xikwembu, hi mina. ₂₆Ndzi ta hangalasa Vaegipta ematikweni layo tala, va ya tshama etindhawini to hambana-hambana, kutani va ta tiva leswaku HOSI Xikwembu, hi mina!”