Xikwembu xi katekisa Yakobo eBetele
1Xikwembu xi ku ka Yakobo: “Sweswi, suka u ya eBetele, u ya tshama kona. Kwale Betele, u ta aka alitari, u akela Xikwembu lexi humeleleke eka wena loko u ri karhi u baleka makwenu Esawu.” 2Hiloko Yakobo a byela va ndyangu wa yena ni hinkwavo lava a a ri na vona a ku: “Cukumetani swikwembu swa vamatiko leswi nga xikarhi ka n'wina, mi tlhela mi tibasisa mi ambala swiambalo swin'wana, 3kutani hi ta suka hi famba hi ya eBetele leswaku ndzi ya aka alitari kona, ndzi akela Xikwembu lexi xi ndzi hlamuleke loko ndzi ri eku xanisekeni, xi tlhela xi va na mina hinkwako lomu ndzi yeke kona.” 4Kutani va nyika Yakobo swikwembu hinkwaswo swa vamatiko leswi a va ri na swona, va n'wi nyika ni swingwavila leswi a swi ri entindleveni ta vona. Hiloko Yakobo a ya swi celela ehansi ka murhi wa nkuhlu lowu a wu ri kwale kusuhi ni muti wa Xikeme.
5Kutani va khoma ndlela va famba, kutani Xikwembu xi endla leswaku vanhu va miti leyi a yi va rhendzerile matlhelo hinkwawo va khomiwa hi ku chava, va tsandzeka ku hlongorisa vana va Yakobo. 6Kutani Yakobo ni vanhu hinkwavo lava a a ri na vona va ya fika eLuzi (hileswaku Betele), etikweni ra Kanana. 7Laha Luzi, Yakobo a aka alitari a yi thya vito ra Eli-Betele (hileswaku: “Xikwembu-xa-Betele”), hikuva hi kona laha Xikwembu xi tikombiseke eka yena loko a ri karhi a baleka makwavo Esawu. 8Debora mutirheli wa Rhaveka a lova, kutani va n'wi lahla ehansi ka murhi wa nkuhlu edzongeni ra muti wa Betele, hikokwalaho murhi lowu va wu thya vito ra Aloni-Bakuti (hileswaku: “Nkuhlu-wa-swirilo”).
9Loko Yakobo a ta a huma hi le Padani-Aramu, Xikwembu xi tlhela xi humelela eka yena, xi n'wi katekisa. 10Xikwembu xi ku ka Yakobo: “Vito ra wena hi wena Yakobo, kambe vito leri, a wu nga ha vitaniwi ha rona, u ta vitaniwa hi ra Israele.” Kutani ko va loko Yakobo a thyiwile vito ra Israele. 11Kutani Xikwembu xi ku: “Hi mina Xikwembu-xa-matimba-hinkwawo. Tswalanani mi andza, mi va tiko. Eka wena ku ta huma vanhu va matiko layo tala, hambi ti ri tihosi ti ta huma eka wena. 12Tiko leri ndzi ri nyikeke Abrahama na Isaka, ndzi ta ri nyika wena; tiko leri, ndzi ku nyika rona, wena ni vatukulu va wena lava nga ta sala va hanya endzhaku ka wena.” 13Kutani Xikwembu xi tlhandluka xi suka laha a xi vulavula na Yakobo kona. 14Hiloko Yakobo a yimisa ribye ra xitsundzuxo endhawini yoleyo, a tlhela a chela vhinyo ya magandzelo ehenhla ka ribye leri, a chela ni mafurha ehenhla ka rona. 15Ndhawu leyi Yakobo a a ri ka yona loko Xikwembu xi vulavula na yena, a yi thya vito ra Betele (hileswaku: “Yindlu-ya-Xikwembu”).
Ta ku lova ka Rahele
16Kutani va suka eBetele va ya emahlweni ni riendzo. Loko va ha ri kulenyana ni muti wa Efrata, nkarhi wa Rahele wa ku tintshunxa wu fika, kutani switlhavi swa ku veleka swi n'wi tela hi matimba. 17Loko a ri karhi a tintshunxa, sungukati yi ku ka yena: “Tiyisela, u kumile n'wana un'wana wa mufana.” 18Rahele a a ri kusuhi ni ku fa, kutani loko a ri karhi a hlala, a thya n'wana loyi vito ra Benoni (hileswaku: “N'wana-wa-ku-vaviseka-ka-mina”), kambe tata wa yena a n'wi thya vito ra Benjamini (hileswaku: “N'wana-wa-voko-ra-xinene”). 19Kutani Rahele a fa, a lahliwa endleleni yo ya le Efrata (hileswaku: “Betlehema”), 20kutani Yakobo a yimisa ribye ra xitsundzuxo ehenhla ka sirha ra Rahele. Ribye leri, ninamuntlha ra ha ri kona, ri komba laha sirha ra Rahele ri nga kona. 21Yakobo a ya emahlweni ni riendzo ra yena, a ya fika a dzima ntsonga wa yena loko a hundzile xihondzo xa Edere. 22Loko Yakobo a ha tshama endhawini leyi, Rhuveni a ya a ya etlela na Biliha nsati lontsongo wa tata wa yena. Mhaka leyi, yi fikile etindleveni ta Yakobo.
Ta vana va Yakobo
Yakobo a a ri ni vana va xinuna va 12. 23Vana va Leya hi lava: Rhuveni (yena mativula ya Yakobo), na Simiyoni, na Levhi, na Yuda, na Isakara, na Zebuloni. 24Vana va Rahele hi lava: Yosefa na Benjamini. 25Vana va Biliha nandza wa Rahele hi lava: Dani na Neftali. 26Vana va Zilipa nandza wa Leya hi lava: Gadi na Asere. Lava hi vona vana va Yakobo lava velekiweke ePadani-Aramu.
27Kutani Yakobo a ya fika eka tata wa yena Isaka eMamre le Kiriyata-Araba (hileswaku: “Hebroni”), laha Abrahama na Isaka a va luverile kona. 28Enkarhini lowu, Isaka a a ri ni malembe ya 180, 29kutani Isaka a tietlelela a ri ni malembe yo tala swinene, a landza va ka vona. Kutani vana va yena Esawu na Yakobo va n'wi lahla.
