Hosiya 5

₁Twanani mhaka leyi, n'wina vaprista!

Yingisani, n'wina vaaki va tiko ra Israele!

Rhiyani ndleve, n'wina vafumi va tiko!

Nandzu wu dya n'wina,

hikuva le Mispa mi tihundzurile mintlhamu,

ni ritavala leri andlariweke entshaveni ya Taboro.

₂Le Xitimi va cerile rindzi ri ya ri enta,

kambe ndzi ta va ba hinkwavo!

₃Va ka Efrayimi ndza va tiva,

ndzi nga ka ndzi nga kohliwi hi va tiko ra Israele;

sweswi mi endleke vunghwavava n'wina va ka Efrayimi,

tiko ra n'wina ra Israele ri nyamile.

₄Swiendlo swa vanhu lava swi va sivela

ku tlhelela eka Xikwembu xa vona.

Moya wa vunghwavava wu va nghenile hi matimba,

kutani a va ha vuli nchumu hi HOSI.

₅Ku tikurisa ka vanhu va tiko ra Israele ka va mangalela,

milandzu ya va ka Efrayimi yi ta va khugula va wa,

va tiko ra Yuda na vona va ta wa swin'we ni va ka Efrayimi.

₆Va ta teka swifuwo leswikulu ni leswitsongo,

va famba va lava HOSI Xikwembu,

kambe va nga ka va nga xi kumi;

HOSI Xikwembu xi tihambanisile na vona.

₇Vanhu lava a va tshembekanga eka HOSI Xikwembu,

hikuva va kumile vana hi vuhunguki,

kutani ku nga ri khale va ta herisiwa,

vona ni masimu ya vona.

₈Chayani nanga eGibeya,

eRhama banani mhalamhala,

yi mbvungunyiseni le Beta-Avene!

Mi fikeriwile, n'wina va ka Benjamini!

₉Siku va ka Efrayimi va tshinyiwaka,

tiko ra vona ri ta hundzuka marhumbi;

leswi ndzi swi vulaka,

swi ta humelela exikarhi ka tinyimba ta Israele.

₁₀Varhangeri va Yuda va tiendlile

vahundzuluxi va mindzilekana;

ndzi ta chululela vukari bya mina

ehenhla ka vona ku fana ni mati.

₁₁Va ka Efrayimi va tshikeleriwa,

timhaka ti dya vona,

hikuva va tinyiketele ku landzelela

leswi nga pfuniki nchumu.

₁₂Hikokwalaho ndzi ta hundzuka xilondza eka va ka Efrayimi,

eka va tiko ra Yuda, ndzi ta fana ni vuvabyi byo borisa marhambu.

₁₃Va ka Efrayimi va vonile vuvabyi bya vona,

na vona va ka Yuda va vona timbanga ta vona,

kutani va ka Efrayimi va rhuma vanhu va ya eAsiriya,

va ya kombela ku pfuniwa eka hosi leyikulu.

Kambe hosi leyi a yi swi koti ku mi horisa,

ni timbanga ta n'wina, a yi ti koti,

₁₄hikuva ndzi ta fana ni nghala loko ndzi yela va ka Efrayimi,

eka va ka Yuda ndzi ta fana ni xinghalana.

Mina hi xiviri xa mina ndzi ta va phatlulela,

ndzi va rhwala ndzi famba na vona, ku pfumaleka wo va lamulela.

₁₅Ndzi ta suka ndzi famba ndzi tlhelela laha ndzi tshamaka kona,

va ta kondza va tivona nandzu, kutani va famba va ndzi lava;

va ta ndzi lava loko va ri ekhombyeni.