Esaya 61

₁Moya wa HOSI N'wini wa hinkwaswo wu le ka mina,

hikuva ú ndzi hlawurile

ku ya byela swisiwana emahungu lamanene.

U ndzi rhumile ku ya pfuxela lava heleke matimba,

ni ku tivisa lava nga vukhumbini leswaku va ta ntshunxiwa,

ni ku byela lava nga khotsweni leswaku va ta huma.

₂HOSI Xikwembu xa hina xi ndzi rhumile

ku twarisa lembe ra xona ra ku tsetselela vanhu,

ni siku ra ku va hlulela valala, ni ro chavelela hinkwavo lava rilaka.

₃Xi ndzi rhumile ku ya miyeta lava rilaka eSiyoni,

ndzi va nyika harhi ya swiluva ematshan'wini ya nkuma,

ni mafurha ya ntsako leswaku va nga ha rili,

ndzi va ambexa ku dzuneka ematshan'wini ya moya lowu tsaneke.

Kutani va ta vuriwa “Minkuhlu-ya-ku-lulama”,

leyi byariweke hi HOSI Xikwembu leswaku xi ta dzunisiwa.

₄Va ta pfuxa miti leyi fayeteriweke khale yi hundzuka rhumbi,

va ta yi lulamisa, va yi aka hi vuntshwa.

₅N'wina Vaisraele mi ta riseriwa swifuwo

hi vanhu lava humaka ematikweni man'wana, a va nga tshami ni le hansi;

swi-ta-swi-famba swi ta mi rimela masimu ya mavele ni ya vhinya.

₆Mi ta vuriwa vaprista va HOSI Xikwembu xa hina,

vanhu va ta ku mi malandza ya xona;

rifuwo ra vanhu va matiko ri ta dyiwa hi n'wina,

kutani mi ta tinyungubyisa hi xuma xa vona.

₇Tingana ta n'wina ni ku xanisiwa ka n'wina swi ta hela;

mi ta tshama etikweni ra n'wina mi tsakile,

kutani rifuwo ra n'wina ri ta tlula lera khale kambirhi;

mi ta va ni ntsako lowu nga heriki.

₈HOSI Xikwembu xi ri:

“Mina HOSI, ndzi rhandza ku lulama;

lava tekelaka van'wana swa vona ni ku endla leswo homboloka, ndza va venga.

Vanhu va mina, a ndzi nga va tsoni hakelo ya vona,

ndzi ta endla na vona ntwanano lowu nga ta va kona hilaha ku nga heriki.

₉Vana ni vatukulu va vona va ta tiviwa

hi vanhu va matiko hinkwawo;

hinkwavo lava va nga ta va vona va ta swi tiva

leswaku i vanhu lava mina HOSI ndzi nga va katekisa.”

₁₀Ndzi ta titsakela swinene eka HOSI Xikwembu xanga,

moya wanga wu ta xi tlangela,

hikuva matimba ya xona ya ku ndzi ponisa i xiambalo xa mina,

ni ntirho wa xona wa ku ndzi lwela i nceka lowu ndzi tifunengetaka ha wona.

Ndzi tsaka kukota muteki la tikhavisaka hi swiluva,

kukota mutekiwa la tibombisaka hi vuhlalu bya nkoka.

₁₁HOSI N'wini wa hinkwaswo ú ta endla leswaku ku lulama ni ku dzuneka

swi humelela emahlweni ka vanhu va matiko hinkwawo,

tani hileswi misava yi mirisaka swimila,

ni mintanga yi hlukisaka leswi byariweke eka yona.