Ta Abimeleke loko a vekiwa ku va hosi
1Abimeleke n'wana Yerubaali a ya eXikeme laha mana wa yena a a huma kona, a fika a byela vakokwa wa yena hinkwavo, a ku: 2“Vutisani vinyi va muti wa Xikeme hinkwavo mi ku ka vona: ‘Xana mi tsakela yini, ku fumiwa hi vana hinkwavo va Yerubaali va 70, kumbe ku fumiwa hi un'we xana?’ Mi fanele ku tsundzuka leswaku mina ndzi velekiwile hi n'wina.” 3Hiloko vakokwa wa Abimeleke va ya va ya n'wi vulavulela ni vavanuna va Xikeme hinkwavo hi tlhelo ra mhaka leyi, kutani vavanuna va Xikeme va hlawula ku rhangeriwa hi Abimeleke, hikuva a va ku: “I wa ka hina!” 4Kutani va teka mali ya tisilivhere ta 70 endlwini ya Baala-Beriti va nyika Abimeleke, kutani yena a hakela ha yona vavanuna vo ka va nga pfuni nchumu, vo pfumala xichavo, lava a va n'wi tirhela. 5Kutani a ya le Ofira emutini wa tata wa yena, a fika a dlayetela vamakwavo wa yena va 70 ehenhla ka ribye rin'we, va nga vana va Yerubaali. Loyi a poneke exikarhi ka vona i Yotamu, yena lontsongo eka vona hinkwavo, hikuva a a tumberile. 6Vinyi va muti wa Xikeme ni va ximutana xa Beta-Milo va hlengeletana hinkwavo, kutani va ya eribyeni ra vugandzeri enkuhlwini, va ya veka Abimeleke ku va hosi.
Ta ntsheketo wa Yotamu
7Kuteloko Yotamu a twa mhaka leyi, a tlhandluka a ya enhlohlorhini ya ntshava ya Gerizimi, a fika a huwelela swinene, a ku:
“N'wina vavanuna va Xikeme, ndzi yingiseni,
loko mi lava leswaku Xikwembu xi mi yingisa!
8Siku rin'wana, mirhi yi huma
ku ya tivekela hosi ya yona,
kutani yi ku ka murhi wa mutlhwari:
‘Hi kombela leswaku u hi fuma.’
9Kambe murhi wa mutlhwari wu hlamula leyin'wana wu ku:
‘Xana ndzi nga tshika ku humesa mafurha ya mina
lama tirhisiwaka ku xixima swikwembu ni vanhu,
kutani ndzi ya risa mirhi, xana?’
10Kutani mirhi yi ku ka murhi wa nkuwa:
‘Tana wena, u ta hi fuma.’
11Kambe murhi wa nkuwa wu hlamula leyin'wana wu ku:
‘Xana ndzi nga tshika ku humesa mihandzu ya mina leyinene,
ni ku nandziha ka yona,
kutani ndzi ya risa mirhi, xana?’
12Kutani mirhi yi ku ka murhi wa vhinya:
‘Tana wena, u ta hi fuma.’
13Kambe murhi wa vhinya wu hlamula leyin'wana wu ku:
‘Xana ndzi nga tshika ku humesa vhinyo ya mina
leyi tsakisaka swikwembu ni vanhu,
kutani ndzi ya risa mirhi, xana?’
14Kutani mirhi hinkwayo yi ku ka ximudyana xa mitwa:
‘Tana wena, u ta hi fuma.’
15Kutani ximudyana xa mitwa xi hlamula mirhi leyin'wana xi ku:
‘Loko hakunene mi ndzi hlawula ku va hosi ya n'wina,
tanani mi ta tumbela endzhutini wa mina;
kambe loko mi nga ndzi hlawuli hi timbilu ta n'wina hinkwato,
ku ta pfurha ndzilo wu huma ka mina,
wu herisa ni mirhi ya kedari entshaveni ya Lebanoni.’ ”
16Yotamu a ya emahlweni a ku: “Xana leswi mi vekeke Abimeleke ku va hosi, mi swi endlile hi timbilu ta n'wina hinkwato mi nga kanakani xana? Xana mi n'wi tsundzukile Yerubaali ni ndyangu wa yena, mi nkhensa leswi a mi endleleke swona, xana? 17Tata wa mina a nga tsetselelanga vutomi bya yena, kambe ú mi lwerile a mi kutsula emavokweni ya Vamidiyani. 18Namuntlha hi leswi, mi pfukele ndyangu wa tatana, mi dlayetela vana va yena va xinuna va 70 ehenhla ka ribye rin'we, mi heta hi ku teka Abimeleke, n'wana wa nsati lontsongo, mi n'wi veka ku va hosi ya vanhu va muti wa Xikeme hi leswi yena a nga xaka ra n'wina. 19Swilo leswi mi swi endleke Yerubaali ni ndyangu wa yena namuntlha, loko mi swi endlile hi timbilu ta n'wina hinkwato mi nga kanakani, tsakani na Abimeleke wa n'wina, na yena a a tsake na n'wina! 20Kambe loko swi nga ri tano, ku ta pfurha ndzilo wu huma eka Abimeleke, wu herisa vanhu va muti wa Xikeme ni va ximutana xa Beta-Milo; ni le ka vanhu va muti wa Xikeme ni va ximutana xa Beta-Milo, ku ta huma ndzilo wu ya herisa Abimeleke.” 21Kutani Yotamu a baleka a tsutsumela eBera, a ya tshama kona hi ku chava makwavo Abimeleke.
Ta ku fuma ka Abimeleke
22Abimeleke ú fumile malembe manharhu etikweni ra Israele. 23Kutani Xikwembu xi byala moya lowo biha exikarhi ka Abimeleke ni vakulukumba va muti wa Xikeme, kutani va sungula ku hundzukela Abimeleke. 24Mhaka leyi yi humelerile leswaku tihanyi leti Abimeleke a ti endleke hi ku halata ngati ya vamakwavo, va nga vana va Yerubaali va 70, ti rihiseriwa ehenhla ka yena ni le henhla ka vavanuna va Xikeme lava n'wi seketeleke. 25Kutani vavanuna va Xikeme va veka vanhu etinhlohlorhini ta tintshava leswaku va tumbelela Abimeleke, kutani va sungula ku tekela vahundzi-va-ndlela swilo swa vona. Mhaka leyi yi fika etindleveni ta Abimeleke.
26Gaali n'wana Ebede a rhurha ni va ka vona, va ya tshama eXikeme, kutani vavanuna va muti lowu va sungula ku tshemba yena. 27Kutani va suka va ya hlengeleta mihandzu ya vhinya emasin'wini ya vona, va yi pyaxa, va endla nkhuvo, va ya wu dyela endlwini ya xikwembu xa vona, va nwa va ri karhi va sandza Abimeleke. 28Gaali n'wana Ebede a ku: “Xana Abimeleke wa kona o va mani, hi nga ta kala hi n'wi tirhela, hina vanhu va Xikeme, xana? Yena n'wana Yerubaali ni ndhuna yakwe Zebulu, xana khale a va nga tirheli va ka Hamoro tata wa Xikeme, xana? Kutani mhaka ya leswaku hina hi n'wi tirhela yi huma kwihi xana? 29Loko a swo endleka leswaku ndzi va murhangeri wa vanhu lava, Abimeleke a ndzi ta n'wi hlongola, ndzi ku ka yena: ‘Kurisa vuthu ra wena, u huma hi ta lwa!’ ”
30Loko Zebulu ndhuna ya muti wa Xikeme a twa marito ya Gaali n'wana Ebede, a kariha swinene. 31Kutani a rhuma vanhu va nyengeleta va ya byela Abimeleke, va ku: “Gaali n'wana Ebede ni va ka vona va nghenile haleno Xikeme, kutani va le ku hlohleteleni ka vanhu leswaku va lwa na wena. 32Kutani wena ni vavanuna lava u nga na vona, mi fanele ku ngungumela nivusiku, mi ya va tumbelela enhoveni. 33Nimpundzu loko dyambu ra ha ku huma, mi hatla mi nghena mi hlasela muti. Kutani loko yena ni vavanuna lava a nga na vona va mi hlanganisa va lwa na n'wina, va endleni leswi mi nga ta swi kota.”
34Kutani Abimeleke ni vavanuna hinkwavo lava a a ri na vona va pfuka nivusiku va kongoma eXikeme, va fika va avana hi mintlawa ya mune, va tumbelela muti lowu. 35Gaali n'wana Ebede a suka a ya yima enyangweni ya muti, kutani Abimeleke ni vavanuna lava a a ri na vona va huma lomu a va tumberile kona. 36Loko Gaali a vona vavanuna lava, a ku ka Zebulu: “Languta! Ku ta vavanuna, va rhelela va huma etinhlohlorhini ta tintshava.” Zebulu a hlamula a ku: “Wena u teka mindzhuti leyi u yi vonaka ya tintshava u yi fanisa ni vanhu.” 37Gaali a engeta a ku: “Languta! Ku ta vavanuna, va rhelela va suka exivindzini xa ntshava; ntlawa wun'wana wu ta hi tlhelo ra Nkuhlu wa Mungoma.” 38Hiloko Zebulu a ku ka Gaali: “Xana u lo tsemeka nomo xana? A hi wena a wu ku: ‘Abimeleke wa kona o va mani, hi nga ta kala hi n'wi tirhela’ xana? Vanhu lava a wu va sandza, hi lava! Huma, u ya lwa na vona.” 39Kutani Gaali a huma, a rhangerile vavanuna va Xikeme, a ya lwa na Abimeleke. 40Hiloko Abimeleke a yela Gaali, kambe yena a suka a tsutsuma, kutani Abimeleke a n'wi hlongorisa. Vavanuna lavo tala va Xikeme va tlhaviwa va sala va lo n'wálálálá, ku ya fika enyangweni ya muti. 41Kutani Zebulu a hlongola Gaali ni va ka vona, va suka emutini wa Xikeme. Abimeleke yena a a tshama le Aruma.
42Siku leri tlhandlamaka, vavanuna va Xikeme va huma va ya enhoveni, kutani mhaka leyi yi ya fika etindleveni ta Abimeleke. 43Kutani Abimeleke a huma ni vavanuna va yena, a fika a va avanyisa hi mintlawa minharhu, va tumbelela vavanuna va Xikeme enhoveni. Loko Abimeleke a tlakusa mahlo, o vona vavanuna va Xikeme va ri karhi va ta, kutani a va yela, a fika a va hlasela. 44Kutani Abimeleke a tsutsuma ni ntlawa lowu a a ri na wona, va ya yima enyangweni ya muti, mintlawa mimbirhi leyin'wana yona yi ri karhi yi tsutsumela lava a va ri enhoveni, yi ya va hlasela. 45Siku rero hinkwaro, Abimeleke a lwa ni muti wa Xikeme, a dlayetela vaaki va wona, a wu teka, a tlhela a wu mbundzumuxa, a haxa ni munyu.
46Loko vanhu hinkwavo va Xihondzo-xa-Xikeme va twa mhaka leyi, va suka va ya nghena ekhokholweni ra tempele ya Eli-Beriti. 47Mhaka ya ku hlengeletana ka vanhu hinkwavo va Xihondzo-xa-Xikeme yi ya fika etindleveni ta Abimeleke, 48kutani a teka xihloka, a tlhandluka ni vavanuna lava a a ri na vona, va ya entshaveni ya Salimoni, a fika a tsema rihlampfu, a ri tlhandleka ekatleni, kutani a byela vavanuna hinkwavo lava a a ri na vona, a ku: “Leswi mi ndzi voneke ndzi endla swona, hatlisani mi swi endla na n'wina.” 49Hiloko un'wana ni un'wana wa vavanuna lava a tsema rihlampfu, kutani va landzelela Abimeleke, va fika va khegetela mahlampfu ekhokholweni, va ma lumeka. Kutani vanhu hinkwavo va Xihondzo-xa-Xikeme, vavanuna ni vavasati vo lava ku ringana 1 000, va fela ekhokholweni.
Ta ku fa ka Abimeleke
50Kutani Abimeleke a ya a ya hlasela muti wa Tebese, a wu teka. 51Kambe emutini lowu a ku ri ni xihondzo xo tiya, kutani vanhu hinkwavo va muti, vavanuna ni vavasati, va tsutsuma va ya nghena eka xona, va tipfalela, va khandziya ni le lwangwini ra xona. 52Kutani Abimeleke a ya exihondzweni, a ya hlasela lava a va ri ka xona. Loko a tshinela enyangweni ya xona a lava ku xi hisa, 53wansati un'wana a hoxa ribye ra ku sila, ri fika ri ba Abimeleke, ri n'wi faya nhloko. 54Kutani Abimeleke a vitana jaha leri a ri n'wi rhwalela matlhari, a ku ka rona: “Humesa banga ra wena, u ndzi dlaya, hikuva a ndzi lavi leswaku vanhu va ku, ndzi dlele hi wansati!” Kutani jaha ra kona ri n'wi tlhava, a fa. 55Loko vavanuna va Israele va vona leswaku Abimeleke ú file, va hangalaka, un'wana ni un'wana a kongoma emutini wa yena.
56Leyi hi yona ndlela leyi Xikwembu xi rihiseleke ha yona vugevenga lebyi Abimeleke a byi endleke tata wa yena hi ku dlaya vamakwavo va 70. 57Naswona Xikwembu xi vangela vanhu va Xikeme ku xaniseka, va riha mintirho ya vona leyo biha, hilaha Yotamu n'wana Yerubaali a a vurile hakona loko a va rhuketela.
