Yuditi 14

₁Kavaloko Yuditi a ku ka vona: “Ndzi yingiseni vamakwerhu. Tekani nhloko leyi, mi yi hayeka erirhangwini ra muti. ₂Nimpundzu tinhenha hinkwato ta n'wina a ti hlome matlhari ni ku huma emutini. Hlawulani mufambisi wa mavuthu ya tona, onge hiloko mi lava ku ngirimelela erivaleni laha Vaasiriya va goveke kona, kambe mi nga yi kona. ₃Vaasiriya va ta hloma matlhari, va nghena emixaxeni, va pfuxa tindhuna ta mavuthu ya vona. Tindhuna na tona ti ta tsutsumela entsongeni wa Holofani, kambe a va nga n'wi kumi. Kutani va ta sungula ku chava, va baleka emahlweni ka n'wina. ₄N'wina ni Vaisraele van'wana hinkwavo mi ta va hlongorisa mi va dlaya loko va ri karhi va baleka. ₅Kambe mi nga si endla leswi hinkwaswo, ndzi tiseleni Muamoni Akiyoro loyi Holofani a a n'wi rhumele eka hina ku ta a ta dlayiwa la, a ta a ta vona loyi a sandzeke vanhu va Israele.”

₆Kavaloko vanhu va Betuli va ya vitana Akiyoro loyi a a ri endlwini ya Uziya. Loko a fika ni ku vona nhloko ya Holofani emavokweni ya un'wana wa vavanuna lava a va ri kona enhlengeletanweni, a wa hi mombo, a titivala. ₇Loko va n'wi yimisa, a tlhela a ya wela emilengeni ya Yuditi, a nkhinsama emahlweni ka yena, a ku: “U fanele ku tlangeriwa emintsongeni hinkwayo ya Yuda. Tinxaka hinkwato leti ti nga ta twa vito ra wena ti ta rhurhumela hi ku chava. ₈Sweswi, ndzi byele leswi u swi endleke emasikwini lama hundzeke.”

Kavaloko Yuditi a rungulela Akiyoro emahlweni ka vanhu hinkwavo hinkwaswo leswi a swi endleke, ku sukela siku ra ku huma ka yena eBetuli ku fika nkarhi wa yena wo vuya a ta vulavula na vona. ₉Loko a hetile ku vulavula, vanhu va tsaka ngopfu, va ba minkulungwana hinkwako-nkwako emutini wa vona. ₁₀Loko Akiyoro a vona hinkwaswo leswi Xikwembu xa Israele xi swi endleke, a tinyiketa a pfumela eka xona, kutani a yimbisiwa, a tihundzula Muisraele. Kutani vatukulu va yena i Vaisraele ku fika ninamuntlha.

₁₁Hi matakuxa Vayuda va hayeka nhloko ya Holofani erirhangweni ra Betuli, kutani vavanuna hinkwavo va vona va hloma matlhari, va huma hi mintlawa, va ya eswiphandzeni swa le tintshaveni. ₁₂Loko Vaasiriya va va vona, va rhumela rito eka varhangeri va mavuthu ya vona. Varhangeri lava va ya eka tindhunankulu ni le ka vafambisi ni le ka valanguteri va vona hinkwavo. ₁₃Va fika ni le ntsongeni wa Holofani, kutani va ya byela mulanguteri wa swilo swa yena hinkwaswo, va ku: “Pfuxa hosi ya hina, hikuva mahlonga ma tiyimiserile ku ngirimela, ma ta lwa na hina leswaku ma herisiwa.”

₁₄Kavaloko Baguwa a ya ndzhawuta enyangweni ya ntsonga, hikuva a a ehleketa leswaku Holofani a a etlele na Yuditi. ₁₅Kambe loko ku nga twali nhlamulo, a pfula nyangwa a nghena, a tshinela emubedweni wa Holofani, kutani a kuma ntsumbu wa yena wu lo lákáhlá ehenhla ka xitshamo xa milenge, nhloko ya yena yi tsemiwile yi nga ha ri kona. ₁₆Hiloko Baguwa a sungula ku huwelela, a rila, a konya, a kolola, a handzula swiambalo swa yena. ₁₇Kutani a tsutsumela entsongeni laha Yuditi a a tshama kona, kambe loko a nga n'wi kumi, a huma a tsutsumela eka Vaasiriya, a tlakusa rito a ku: ₁₈“Mahlonga ma hi kanganyisile! Wansati un'we wa Muheveru ú tisile tingana eka yindlu ya hosi Nebukadnetsara! Vonani, ntsumbu wa Holofani hi lowu laha hansi, ni nhloko ya yena yi tsemiwile, a ya ha ri kona.” ₁₉Loko varhangeri va mavuthu ya Vaasiriya va twa leswi, va tshuka ngopfu, va handzula swiambalo swa vona, kutani ku huwelela ka vona ni ku rila ka vona ku twakala hinkwako-nkwako emixaxeni.