Yohane 3

₁A ku ri ni un'wana wa Vafarisi loyi a va ku i Nikodema; a a ri un'wana wa tindhuna ta Vayuda. ₂Siku rin'wana, ú tile eka Yesu ni vusiku, a fika a ku: “Mufundhisi, ha swi tiva leswaku u mudyondzisi la humaka eka Xikwembu, hikuva a ku na munhu la nga endlaka mahlori lawa u ma endlaka, loko Xikwembu xi nga ri na yena.” ₃Yesu a n'wi hlamula, a ku: “Ndzi tiyisisile ndzi ri ka wena, a ku na munhu la nga vonaka Mfumo wa Xikwembu, loko a nga tlhelanga a tswariwa ra vumbirhi.” ₄Nikodema a ku ka yena: “Loko munhu a dyuharile, swi nga endlekisa ku yini ku tlhela a tswariwa xana? Xana a nga swi kota ku vuyela endzeni ka mana wa yena, a tlhela a tswariwa ra vumbirhi xana?” ₅Yesu a hlamula, a ku: “Ndzi tiyisisile ndzi ri ka wena, loko munhu a nga tswariwi hi mati ni Moya, a nga ka a nga ngheni eMfun'weni wa Xikwembu. ₆Nyama yi tswala swa nyama; kambe Moya wu tswala swa moya. ₇U nga hlamali loko ndzi te ka wena, swa fanela leswaku mi tlhela mi tswariwa ra vumbirhi. ₈Moya wu hungela lomu wu rhandzaka kona, kutani u twa mpfumawulo wa wona, kambe a wu tivi lomu wu humaka kona, ni lomu wu yaka kona. Swi tano ni ka hinkwavo lava tswariweke hi Moya wa Xikwembu.”

₉Nikodema a n'wi hlamula, a ku: “Swilo leswi swi nga endlekisa ku yini xana?” ₁₀Yesu a n'wi hlamula, a ku: “U mudyondzisi la tivekaka wa Israele, kambe xana timhaka leti a wu ti tivi xana? ₁₁Ndzi tiyisisile ndzi ri ka wena, hi vulavula hi leswi hi swi tivaka, naswona hi veka vumbhoni bya leswi hi swi voneke; kambe a mi amukeri vumbhoni bya hina. ₁₂Leswi mi nga pfumeriki loko ndzi mi byela hi swa laha misaveni, xana mi ta pfumerisa ku yini loko ndzi mi byela hi swa le matilweni xana? ₁₃A ku na munhu loyi a tshamaka a tlhandlukela ematilweni, loko a nga ri loyi a xikeke hi le matilweni, yena N'wana-wa-Munhu. ₁₄Ku fana na leswi Muxe a tshamaka a hayeka nyoka emananga, N'wana-wa-Munhu na yena ú ta fanela ku hayekiwa hi mukhuva wolowo, ₁₅ku endlela leswaku un'wana ni un'wana la pfumelaka eka yena, a kuma vutomi lebyi nga heriki.”

₁₆Hikuva Xikwembu xi rhandzile misava swonghasi, xi ko xi nyika N'wana wa xona la nga un'we, leswaku un'wana ni un'wana la pfumelaka ka yena, a nga lovi, kambe a va ni vutomi lebyi nga heriki. ₁₇Xikwembu a xi rhumanga N'wana wa xona emisaveni ku ta avanyisa misava, kambe a ku ri ku endlela leswaku misava yi ta ponisiwa ha yena.

₁₈Loyi a pfumelaka eka N'wana, a nga avanyisiwi; kambe la nga pfumeriki ú avanyisiwile ni sweswi, hikuva a nga pfumelanga eka N'wana wa Xikwembu loyi a nga un'we eka xona. ₁₉Ku avanyisiwa ku ta hi mhaka leyi: Hileswaku ku vonakala ku tile emisaveni, kambe vanhu va rhandzile munyama ku tlula ku vonakala, hikuva mintirho ya vona a yi ri leyo biha. ₂₀Un'wana ni un'wana la endlaka leswo biha, ú venga ku vonakala, kutani a nga ti eku vonakaleni, hi ku chava leswaku mintirho ya yena yi nga ta humela erivaleni. ₂₁Kambe loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.

₂₂Endzhaku ka sweswo, Yesu a ya ni vadyondzisiwa va yena etikweni ra Yudiya, kutani a xwa kona masikunyana a ri na vona, a khuvula vanhu. ₂₃Yohane na yena a a khuvula le Enoni, kusuhi na Salime, hikuva a ku ri ni mati layo tala kona; vanhu a va ya ka yena, va ya khuvuriwa. ₂₄Enkarhini wolowo Yohane a a nga si pfaleriwa ekhotsweni.

₂₅Kutani ku humelela ku kanetana exikarhi ka vadyondzisiwa va Yohane ni Muyuda un'wana, emhakeni ya swa ku basisiwa. ₂₆Hiloko va ta eka Yohane, va ku ka yena: “Vona Mufundhisi, munhu loyi a wu ri na yena entsungeni wa Yordani, loyi u nga vula vumbhoni ehenhla ka yena, wa karhi wa khuvula na yena, kutani hinkwavo va khitikana va ya eka yena.” ₂₇Yohane a hlamula, a ku: “Munhu a nga ka a nga kumi xa nchumu, loko a nga nyikiwanga xona hi Tilo. ₂₈N'wina hi n'wexe mi timbhoni ta mina leswaku ndzi te: ‘A hi mina Mesiya, kambe ndzi rhumiwile ku n'wi bulela ndlela.’ ₂₉N'winyi wa mutekiwa, i muteki; nxangwana ya muteki leyi yimaka yi yingisa muteki loyi, yi tsaka swinene loko yi twa rito ra yena; hikokwalaho sweswi ku tsaka ka mina ku hetisekile. ₃₀Yena ú fanele ku ya a kula, mina ndzi ya ndzi tsongahala.”

₃₁Loyi a humaka ehenhla, ú le henhla ka hinkwavo; loyi a humaka emisaveni, i wa misava, kutani ú vulavula hi swa misava; loyi a humaka etilweni, ú le henhla ka hinkwavo. ₃₂Yena ú vula vumbhoni bya leswi a swi voneke ni ku swi twa, kambe a ku na loyi a amukelaka vumbhoni bya yena. ₃₃Munhu la amukelaka vumbhoni bya yena, ú tiyisa leswaku Xikwembu xa tshembeka. ₃₄Loyi a rhumiweke hi Xikwembu, ú vula marito ya Xikwembu, hikuva Xikwembu a xi pimi loko xi nyika Moya wa xona. ₃₅Tatana ú rhandza N'wana, kutani ú vekile swilo hinkwaswo emavokweni ya yena. ₃₆Loyi a pfumelaka eka N'wana, ú ni vutomi lebyi nga heriki; loyi a nga yingisiki N'wana, a nga ka a nga kumi vutomi, kambe vukari bya Xikwembu byi tshame henhla ka yena.