Yobo 1

₁Khale, etikweni ra Usi, a ku ri ni munhu wo lulama wa mahanyelo lamanene, loyi a va ku i Yobo; munhu loyi a a tirhela Xikwembu, a fularhela leswo biha. ₂A a ri ni vana va 7 va xinuna ni vanharhu va xisati. ₃A a fuwile ngopfu: A a ri ni tinyimpfu ta 7 000, ni tikamela ta 3 000, ni swipano swa 500 swa tihavi, ni timbhongolo ta mantswele ta 500, naswona malandza ya yena a ma tele ngopfu; hikokwalaho a a tiveka ku tlula vanhu hinkwavo va matiko ya le vuxeni.

₄Vana va Yobo va xinuna a va tolovele ku rhambana, va endla minkhuvo hi masiku yo hambana-hambana, va rhamba ni vamakwavo lavanharhu va xisati leswaku va ta va na vona eku dyeni ni le ku nweni. ₅Loko masiku ya nkhuvo wo karhi ma herile, Yobo a a tala ku vitana vana va yena leswaku a ta va basisa; hi siku rero a a hubuta, a ya humesa magandzelo lama hisiwaka, a humesela un'wana ni un'wana wa vana lava, hikuva a a ku: “Vana va mina va nga va va dyoherile Xikwembu, va xi rhuketela emiehleketweni ya vona.” Yobo a a endlisa sweswo minkarhi hinkwayo.

₆Siku rin'wana swivumbiwa swa le tilweni swi hlangana ehubyeni ya HOSI Xikwembu; na yena Sathana a a ri exikarhi ka swona. ₇Kutani HOSI Xikwembu xi vutisa Sathana xi ku: “U huma kwihi ke?” Sathana a hlamula a ku: “A ndzi ri karhi ndzi rhendzeleka emisaveni, ndzi valanga hala ni hala.” ₈HOSI Xikwembu xi ku ka Sathana: “Xana u vonile nandza wa mina Yobo xana? A ku na la fanaka na yena emisaveni. I munhu wo lulama wa mahanyelo lamanene; wa ndzi tirhela, a fularhela leswo biha!” ₉Sathana a hlamula HOSI Xikwembu a ku: “Yobo a nga ku tirheli ntsena-ntsena, wena Xikwembu, ₁₀hikuva wa n'wi sirhelela matlhelo hinkwawo, yena ni muti wa yena ni swilo swa yena hinkwaswo. U n'wi katekisile emintirhweni ya yena, kutani rifuwo ra yena ri andzile ngopfu etikweni. ₁₁Kambe loko wo tlakusa voko ra wena, u khumba leswi a nga na swona, ú ta ku rhuketela erivaleni.” ₁₂HOSI Xikwembu xi ku ka Sathana: “Hinkwaswo leswi Yobo a nga na swona, ndzi ku nyiketa swona, kambe yena u nga tshuki u n'wi khumba.” Kutani Sathana a suka emahlweni ka HOSI Xikwembu.

₁₃Siku rin'wana, vana va Yobo va xinuna ni va xisati a va ri ni nkhuvo emutini wa hosi ya vona, va ri karhi va dya swakudya va nwa ni vhinyo. ₁₄Kavaloko ku fika nandza un'wana eka Yobo, a ku ka yena: “Tihavi a ti ri eku rimeni, ni timbhongolo a ti ri karhi ti dya kwala kusuhi. ₁₅Kutani ku fika vanhu va le Xeba, va phangha swifuwo hinkwaswo, va dlaya ni malandza ya wena; ku lo pona mina ntsena ndzi ku tivisaka timhaka leti.” ₁₆Loko nandza loyi a ha vulavula, ku humelela un'wana, a ku: “Tilo ri bile tinyimpfu ni varisi va tona, ri herisa hinkwaswo; ku lo pona mina ntsena ndzi ku tivisaka timhaka leti.” ₁₇Loko nandza loyi a ha vulavula, ku fika un'wana, a ku: “Vakalediya va tile va ri mintlawa minharhu, va teka tikamela va famba na tona, va dlaya ni malandza ya wena; ku lo pona mina ntsena ndzi ku tivisaka timhaka leti.” ₁₈Loko nandza loyi a ha vulavula, ku fika un'wana, a ku: “Vana va wena va xinuna ni va xisati a va ri enkhubyeni, va ri karhi va dya swakudya va nwa ni vhinyo emutini wa hosi ya vona, ₁₉kutani ku humelela bubutsa lerikulu ri ta hi le mananga, ri wisa makhumbi ya yindlu, yona yi khubumeta vana lava, kutani va fisa sweswo; ku lo pona mina ndzi ku tivisaka timhaka leti.”

₂₀Kavaloko Yobo a suka a yima, a handzulela swiambalo swa yena, a byewula ni misisi, kutani a nkhinsama a khongela, ₂₁a ku:

₂₂Emakhombyeni lawa hinkwawo, Yobo a nga dyohanga kumbe ku lumbeta Xikwembu.