Yobo 29

₂“Mawaku loko ingi ndzi nga tlhelela exiyin'weni xa mina xa khale,

enkarhini lowu Xikwembu a xa ha ndzi hlayisa,

₃loko rivoni ra xona ra ha ndzi voningela,

ni loko xa ha ndzi fambisa nivusiku hi ku vonakala ka xona!

₄Eminkarhini ya kona, a ndza ha tiyile swinene,

Xikwembu a xi ri nakulorhi, xi sirhelela muti wa mina.

₅Lowa-matimba-hinkwawo a a yima na mina,

ndzi rhendzeriwa hi vana va mina.

₆Ntswamba a ndzi hlamba ha wona onge i mati,

hambi ma ri masimu ya le makwandzasini a ma ndzi nyika mafurha layo tala.

₇Loko ndzi huma ekaya ndzi ya ehubyeni

ndzi ya tshama endhawini ya mina,

₈majaha a ma ndzi nyizela loko ma ndzi vona,

lavakulu a va ndzi xixima va chaya bayethe.

₉Tindhuna a ti nga ha vulavuli,

a ti siva milomo ya tona, ti miyela.

₁₀Tinganakana a ti chava ku tlakusa marito,

a ti hundzuka timbheveve.

₁₁Lava twaka ta mina ni lava va ndzi vonaka,

a va ndzi tlangela, va ku, minkateko yi ndzi fanerile,

₁₂hikuva a ndzi pfuna swisiwana leswi rilaka,

ndzi pfuna ni lava pfumalaka vatswari kumbe vahlayisi.

₁₃Vanhu lava poneke ku fa, a va ndzi tlangela,

tinoni a ti tsaka hi mhaka ya mina.

₁₄A ndzi ambele ku lulama, ndzi funengele kona,

ku yingisa nawu, a swi ri jasi ni xihuku eka mina.

₁₅Lava feke mahlo, a ndzi va komba ndlela,

ndzi fambisa ni lava nga swilema.

₁₆A ndzi ri tatana eka swisiwana,

ni lava ndzi nga va tiviki, a ndzi kambisisa timhaka ta vona.

₁₇A ndzi faya tinhlaya ta lavo homboloka,

ndzi va vutlela leswi va swi lumeke.

₁₈“A ndzi ku, ndzi ta fela mutini wa mina,

ndzi ri ni masiku yo ringana ni sava hi ku tala,

₁₉ndzi fana ni murhi wo simekiwa kusuhi ni mati,

lowu welaka hi mberha vusiku hinkwabyo.

₂₀A ndzi ku, ndzi ta tshama ndzi ri la dzunekaka,

ndzi fana ni socha leri tshamaka ri hlomile.

₂₁“Khale vanhu a va miyela va ndzi yingisa,

va langutela mina ku va tsundzuxa.

₂₂Loko ndzi vulavurile, a va nga ha engeteli nchumu;

marito ya mina a ma va titimeta timbilu,

₂₃a va ma amukela hi mandla mambirhi,

va tsaka kukota murimi la vonaka mpfula ya ximun'wana.

₂₄Loko va hela mbilu, a ndzi va komba xinakulobye,

nghohe ya mina leyi tsakeke a yi va tiyisa nhlana.

₂₅A ndzi ri murhangeri wa vona, ndzi va komba tindlela,

ndzi fana ni hosi exikarhi ka vanhu va yona,

kumbe muchaveleri wa lava rilaka.”