Yobo 39

₁“Xana wa wu tiva nkarhi lowu

timbavala ti mithaka ha wona xana?

U xiyile loko ntswele ya mhunti yi khomiwa hi switlhavi swo veleka, ke?

₂Tin'hweti ta ku tika ka yona, u ti hlayile ke,

ni siku ra yona ro veleka, wa ri tiva xana,

₃ri nga leri yi pavalalaka ha rona,

yi kuma ximhuntana ke?

₄Ximhuntana xexo xi tikulela emananga,

kutani xi hambana ni mana wa xona, xi nga ha vuyi!

₅“I mani la nyikeke timangwa ntshunxeko wa tona,

ti ntshunxiwe hi mani mapindzi ya tona ke?

₆Nhova, ndzi yi endle muti wa tona,

etikweni ra makwandzasi, ti le kaya.

₇A ti na mhaka ni nkitsikitsi wa miti,

a ti khahliwi hi munhu, hikuva a ti fuyiwanga.

₈Madyelo ya tona ma le tintshaveni,

ti rhendzeleka kona ti ri karhi ti lava-lava swa rihlaza.

₉“Xana tinyarhi ti nga pfumela ku tirhisiwa hi wena,

ti nga xwa vusiku etshangeni ra wena ke?

₁₀Xana u nga ti tlhandleka joko, ti ku rimela,

kumbe u nga ti kokisa rihlampfu ro faya mabuwu xana?

₁₁Leswi ti nga ni matimba lamakulu, xana u nga tshemba ku tirheriwa ha tona,

loko ntirho wu ku tikela xana?

₁₂U nga languteli tinyarhi ku vuya ni mavele ya wena;

ti nge ma hlengeleti exivuyeni!

₁₃“Yimbhu yi tlharamula timpapa yi tsakile,

kambe tinsiva ta kona i ta xiharhi xo kala tintswalo!

₁₄Loko yimbhu yi tshikela mandza, yi ma tshika ehansi,

ma kufumetiwa hi dyambu emisaveni.

₁₅Yi rivala leswaku ma nga tshuka ma kandziyiwa hi vanhu,

ma phyandlasiwa hi swiharhi swa nhova.

₁₆Yimbhu yi kurisa mavondlo ya yona hi tihanyi, onge a hi vana va yona;

hambi yi tikarhatela mahala, a yi na mhaka na swona,

₁₇hikuva Xikwembu xi yi tsonile vutlhari,

a xi yi avelanga ku twisisa.

₁₈Kambe loko yi pfuka yi tsutsuma,

yi hleka tihanci ni vagadi va tona.

₁₉“Xana hanci, hi wena u yi nyikaka matimba,

kumbe ku yi mirisela ntshiva enhan'wini ke?

₂₀Hi wena u yi thamukisaka kukota njiya ke?

Ya tikurisa, yi tshukisa vanhu hi ku rila ka yona.

₂₁Yi phandza misava enkoveni, yi tlalamba hi matimba,

kutani yi tsutsumela enyimpini.

₂₂A yi chavi nchumu, a yi kanakani,

yi kongoma ematlharini yi nga tlheleli endzhaku.

₂₃Ematsheveni ya yona, ku twala vuketleketle bya miseve enkotlotweni,

ku vonaka ni matlhari yo vangama.

₂₄Loko yi twa mhalamhala, a yi tshamiseki,

ya hiseka, yi paletela misava.

₂₅Yi hlamula mhalamhala yi ku: ‘Aháà!’

yi nuheta nyimpi ya ha ri kule,

yi twa ku lerisa ka vafambisi, ni huwa ya mavuthu.

₂₆“Xana khuhunu ri hahisiwa hi vutlhari bya wena,

hi wena u ri tlharamuxaka timpapa ri languta edzongeni xana?

₂₇Xana koti ri lerisiwa hi wena ku haha ri ya henhla,

ri ya aka xisaka etintshaveni xana?

₂₈Ri tiakela vutshamo emaribyeni,

ri tumbela emakocokocweni ya kona.

₂₉Ri rhalarhala ri lava swo dya,

mahlo ya rona ma tlhava kule.

₃₀Mavondlo ya rona, ri ma nwisa ngati,

laha ku nga ni mintsumbu, a ri kali.”