Yobo 4

₂“Loko ho va ni rito eka wena, hi ta ku karhata ke?

Ntsena, ku miyela a swi endleki!

₃Wa swi tiva, u khongoterile lava tala,

lava karheleke, u va nyikile matimba.

₄Marito ya wena ma pfuxile lava a va lava ku wa,

vanhu lava tsaneke, u va tiyisile.

₅Kambe sweswi makhombo ma ku telaka, u hela matimba,

sweswi ma ku khumbaka, u le ku chaveni!

₆Xana vukhongeri bya wena ni mintirho ya wena leyo lulama,

a swi ku tiyisi, swi ku nyika ku tshemba xana?

₇“Tsundzuka: Munhu la nga riki na nandzu, a nge lovi,

la lulameke, a nge susiwi emisaveni.

₈Mina ndzi vone leswi:

Lava byalaka leswo biha ni maxangu, va tshovela swona.

₉Vukari bya Xikwembu bya va herisa,

byi hunga kukota bubutsa, byi va susa.

₁₀Tinghala leto leva ta miyetiwa,

Xikwembu xi ti gula meno;

₁₁hikokwalaho a ta ha dlayi nchumu ti fa hi ndlala,

vana va tona va hangalasiwa.”

“Mahungu ma fikile ka mina ndzi ri exihundleni,

ndzi hleveriwa wona endleveni.

₁₃Enkarhini lowu vanhu va etleleke nivusiku,

mina ndzi kombiwile swivono leswo hlamarisa;

₁₄kutani ndzi khomiwa hi ku chava,

miri wa mina hinkwawo wu rhurhumela.

₁₅Xilo xin'wana xo fana ni moya xi ndzi ba xikandza xi hundza,

swirho swa mina hinkwaswo swi khoma hi xirhami.

₁₆Xilo xa kona xi yima,

kambe ndzi nga koti ku twisisa xivumbeko xa xona;

ndzi vona ndzhuti wa xona ntsena;

ku rhanga ku ku whíí, kutani ndzi twa rito leri nge:

₁₇‘Xana munhu a nga tivula la tengeke, la nga riki na xidyoho,

emahlweni ka Xikwembu Muendli wa yena ke?

₁₈Xikwembu xi nge tshembi hambi ma ri malandza ya xona,

ni tintsumi ta xona, xi ti vona nandzu.

₁₉Loko swi ri tano, xi nga tshembisa ku yini munhu wa nyama,

la endliweke hi ntshuri wa misava,

la nga phyandlasiwaka kukota nsumbha, xana?

₂₀Munhu hambi o vona ku xa ka rona,

ku pela ka rona a nga ha ku voni;

ú lovela makumu,

a nga ha tsundzukiwi hi munhu ni un'we.

₂₁Vutomi bya vanhu byi tsemiwa ku fana ni ngoti,

va fa va nga twisisanga nchumu!’ ”