Yonasi 4

₁Sweswo a swi tsakisanga Yonasi nikutsongo; swi n'wi hlundzukisile, ₂kutani a khongela HOSI Xikwembu a ku: “HOSI, xana a ndzi vulanga loko ndza ha ri ekaya xana? Ndzi ringete ku swi sivela, loko ndzi balekela eTarxixi, hikuva a ndzi swi tiva leswaku u Xikwembu lexi tsetselelaka vanhu ni ku va twela vusiwana, lexi hlwelaka ku kariha, lexi teleke tintswalo, lexi tlhelaka emakungwini ya xona yo twisa vanhu ku vava. ₃Sweswi HOSI, ndza ku kombela, teka moya wa mina, hikuva eka mina ku hanya swi tlula hi ku fa.” ₄HOSI Xikwembu xi hlamula xi ku: “Xana u vona swi lulamile ku hlundzuka ke?” ₅Kutani Yonasi a huma emutini, a ya tshama evuxeni bya wona, a tidzimela xintsongana kona, a wisa endzhutini wa xona, a yimela ku vona leswi swi nga ta wela muti wa Ninivha.

₆Kutani HOSI Xikwembu xi lerisa ximudyana ku mila hi le tlhelo ka Yonasi ni ku n'wi endlela ndzhuti enhlokweni, xi n'wi rhulisa eku xanisekeni ka yena. Yonasi a tsaka swinene hi mhaka ya ximudyana lexi. ₇Kambe hi mahlamba-ndlopfu ya siku leri tlhandlamaka, Xikwembu xi lerisa xivungu ku dya timitsu ta ximudyana lexi, kutani xi oma. ₈Loko dyambu ri tlakukile, Xikwembu xi hungisa moya wo hisa ngopfu wa vuxa, kutani dyambu ri ba nhloko ya Yonasi, ku kondza loko a lava ku titivala. Hiloko a kombela ku fa, a ku: “Eka mina, ku hanya swi tlula hi ku fa.” ₉Kambe Xikwembu xi n'wi vutisa xi ku: “Xana u vona swi lulamile ku hlundzukisiwa hi mhaka ya ximudyana xana?” “Ina, ndzi vona swi lulamile ku hlundzuka”, ku hlamula Yonasi, “ni ku fa ndzi nga fa!” ₁₀Hiloko HOSI Xikwembu xi ku: “Ximudyana lexi u xi twelaka vusiwana, a wu xi byalanga, a wu xi kurisanga; xi tumbulukile hi vusiku byin'we, lebyi tlhandlamaka a xi byi vonanga. ₁₁Kutani mina ke? Xana a ndzi nga fanelanga ku wu twela vusiwana muti lowukulu lowu wa Ninivha xana, lowu nga ni vanhu vo tlula 120 000 lava nga tiviki ku hlawula leswinene eka leswo biha? Naswona wu ni swifuwo leswo tala!”