Yoxuwa 1

₁Loko Muxe nandza wa HOSI Xikwembu a lovile, HOSI Xikwembu xi vulavula na Yoxuwa n'wana Nuni loyi a a tirhela Muxe, xi ku ka yena: ₂“Nandza wa mina Muxe ú file, kutani sweswi suka ni Vaisraele lava hinkwavo mi pela nambu lowu wa Yordani, mi ya nghena etikweni leri ndzi va nyikaka rona. ₃Ndhawu yin'wana ni yin'wana leyi mi nga ta hundza hi le ka yona, ndzi mi nyikile yona hilaha ndzi tshembiseke Muxe hakona. ₄Tiko ra n'wina ri ta sukela emananga ri ya ta hi le ntshaveni ya Lebanoni ri ya fika ni le nambyeni lowukulu wa Yufrata, ri katsa ni tiko ra Vahiti hinkwaro ku ya fika eLwandle ra Mediteraniya evupeladyambu. ₅Evuton'wini bya wena hinkwabyo a ku nga vi na munhu loyi a nga ta ku hlula; ndzi ta va na wena ku fana ni leswi ndzi veke na Muxe; a ndzi nga ku fularheli, naswona a ndzi nga ku tshiki u ri wexe. ₆U fanele ku tiya, u va ni xivindzi, hikuva hi wena u nga ta fikisa vanhu lava etikweni leri ndzi tshembiseke vatata wa vona hi ku hlambanya leswaku ndzi ta va nyika rona ri va ndzhaka ya vona. ₇Mhaka leyikulu, u fanele ku tiya, u va ni xivindzi; naswona u landzelela milawu hinkwayo leyi Muxe nandza wa mina a ku leriseke yona; u nga tshuki u tlula ni wun'we wa yona, leswaku hinkwako lomu u nga ta va kona, u ta kateka eswilweni hinkwaswo. ₈Buku leyi ya Nawu u nga tshuki u hambana na yona, u fanele ku yi anakanya vusiku ni nhlekanhi leswaku u ta ka u nga tluli ni xin'we xa leswi tsariweke eka yona; kutani u ta humelela, ni swilo swa wena swi ta ku fambela kahle. ₉Tsundzuka leswi ndzi ku leriseke swona: Tiya, u va ni xivindzi; u nga chavi nchumu, u nga heli matimba, hikuva mina HOSI Xikwembu xa wena ndzi ta va na wena hinkwako lomu u nga ta ya kona.”

₁₀Kutani Yoxuwa a lerisa varhangeri va Vaisraele a ku ka vona: ₁₁“Rhendzelekani ni mixaxa mi byela vanhu mi ku: ‘Longani timbuva ta n'wina, hikuva endzhaku ka masiku manharhu mi ta pela nambu lowu wa Yordani, mi ya nghena etikweni leri HOSI Xikwembu xa n'wina xi mi nyikaka rona, mi ri teka ri va ra n'wina.’ ”

₁₂Kutani Yoxuwa a byela va ka Rhuveni ni va ka Gadi ni hafu ya nyimba ya va ka Manase, a ku ka vona: ₁₃“Tsundzukani marito lawa Muxe nandza wa HOSI Xikwembu a mi byeleke wona, loko a te: ‘HOSI Xikwembu xa n'wina xi ta mi nyika tiko leri ri va ndhawu leyi mi nga ta wisa eka yona.’ ₁₄Vasati va n'wina, ni swihlangi swa n'wina, ni swifuwo swa n'wina swi ta sala haleno ntsungeni wa Yordani, etikweni leri Muxe a mi nyikeke rona; kambe masocha ya n'wina hinkwawo ma fanele ku hloma matlhari, ma famba ni vamakwavo ma ya va pfuna ₁₅ku kondza HOSI Xikwembu xi wisisa vamakwenu ku fana na n'wina; kutani na vona va ta teka tiko leri HOSI Xikwembu xa n'wina xi va nyikaka rona; hi kona n'wina mi nga ta tlhelela etikweni leri mi nyikiweke rona, kutani tiko leri Muxe nandza wa HOSI Xikwembu a mi nyikeke rona hi tlhelo ra le vuxeni bya nambu wa Yordani ri ta va ndzhaka ya n'wina.” ₁₆Kutani vona va hlamula Yoxuwa va ku: “Hinkwaswo leswi u hi lerisaka swona hi ta swi endla, ni lomu u hi rhumaka kona hinkwako hi ta ya. ₁₇Hi ta ku yingisa etimhakeni hinkwato ku fana na leswi Muxe hi n'wi yingisiseke swona; ho navela ntsena leswaku HOSI Xikwembu xa wena xi va na wena ku fana ni leswi a xi ri na Muxe! ₁₈Un'wana ni un'wana loyi a nga ta tlula swileriso swa wena, a nga yingisi leswi u n'wi byelaka swona, u ta dlayiwa. Mhaka leyikulu, u fanele ku tiya, u va ni xivindzi!”