Yoxuwa 14

₁Leyi i ndzhaka leyi Vaisraele va averiweke yona etikweni ra Kanana hi muprista Eliyazara na Yoxuwa n'wana Nuni ni varhangeri va mindyangu ya tinyimba ta Vaisraele. ₂Ndzhaka ya vona va va averile hi ku tirhisa vuhlolotwana, hilaha HOSI Xikwembu xi leriseke Muxe hakona leswaku a avela tinyimba ta Israele ta 9 ni hafu. ₃Tinyimba timbirhi ni hafu Muxe ú ti nyikile ndzhaka ya tona entsungeni wa nambu wa Yordani, kambe Valevhi vona a nga va nyikanga ndzhaka. ₄Va ka Yosefa a va ri ni tinyimba timbirhi, yi nga ya ka Manase ni ya ka Efrayimi. Va ka Levhi, Muxe a nga va tsemelanga xiphemu xa vona etikweni, kambe ú lo va nyika ntsena miti yo tshama eka yona, ni madyelo ya swifuwo swa vona leswikulu ni leswitsongo. ₅Vaisraele va avile tiko hilaha HOSI Xikwembu xi leriseke Muxe hakona.

₆Loko va ha ri eGiligala, va nyimba ya ka Yuda va ya eka Yoxuwa; kutani Kalebe n'wana Yefune lowa Mukenizi a ku ka Yoxuwa: “Ndza tshemba wa ha tsundzuka leswi HOSI Xikwembu xi leriseke Muxe munhu wa xona eKadexe-Bariniya hi tlhelo ra mina na wena. ₇Loko Muxe nandza wa HOSI Xikwembu a ndzi rhuma ndzi sukela eKadexe-Bariniya leswaku ndzi ta valanga tiko, a ndzi ri ni malembe ya 40. Leswi ndzi nga tlhela ndzi ya n'wi vikela swona, a wu ri ntiyiso lowu heleleke. ₈Kambe vamakwerhu lava a ndzi fambile na vona va vuyile va nyamisa vanhu timbilu, kasi mina ndzi tinyiketile ku landza HOSI Xikwembu. ₉Kutani siku rero Muxe a ndzi tshembisa hi ku hlambanya a ku: ‘Tiko leri u famba-fambeke eka rona, ri ta va ndzhaka ya wena ni vana va wena hilaha ku nga heriki, hikuva wena u tinyiketile ku landza HOSI Xikwembu xa mina.’ ₁₀Kunene HOSI Xikwembu xi ndzi hlayisile ndzi hanya hilaha xi tshembiseke hakona. Ku sukela loko xi byerile Muxe marito lawa, enkarhini lowu Vaisraele a va ri emananga, swi endla malembe ya 45. Sweswi mina ndzi ni malembe ya 85, ₁₁kambe ni namuntlha ndza ha tiyile ku fana ni siku leri Muxe a ndzi rhumeke ha rona; ndza ha ri ni matimba yo huma ndzi ya lwa nyimpi ku fana ni le ku sunguleni. ₁₂Kutani sweswi, tiko leri ra laha magangeni, leri HOSI Xikwembu xi vulavuleke ha rona, ndzi nyike rona. U swi twile leswaku Vaanaka va tshama eka rona emitini leyikulu ya makhokholo; kumbexana HOSI Xikwembu xi ta va na mina ndzi kota ku va hlongola va suka, hilaha xi vuleke hakona.”

₁₃Kutani Yoxuwa a katekisa Kalebe n'wana Yefune, a n'wi nyika muti wa Hebroni wu va ndzhaka ya yena. ₁₄Hikokwalaho, ni namuntlha muti wa Hebroni wa ha ri ndzhaka ya Kalebe n'wana Yefune lowa Mukenizi, hikuva ú tinyiketile ku landza HOSI Xikwembu xa Israele. ₁₅Khale muti lowu wa Hebroni a wu vuriwa Kiriyata-Araba. (Araba a a ri munhu wo xiximeka swinene exikarhi ka Vaanaka.) Kutani ku va ni ku rhula etikweni.