Luka 24

₁Hi siku ra Sonto dyambu ri nga si huma, vavasati va ya esirheni, va tamele mirhi ya risuna leyi va yi lunghiseke. ₂Va kuma ribye ri vumbuluxiwele kule ni sirha. ₃Kambe loko va nghena, a va kumanga ntsumbu wa Hosi Yesu. ₄Va ku va ha hlamala ha swona, vavanuna vambirhi va tshuka va humelela eka vona, va ri ni swiambalo leswi hatimaka. ₅Loko vavasati va ha chavile ngopfu ni ku languta hansi hi mhaka ya gome, vavanuna va ku ka vona: “Hikwalaho ka yini mi lava la hanyaka exikarhi ka vafi xana? ₆A nga kona la, kambe ú pfukile eku feni. Tsundzukani hilaha a nga vulavula na n'wina hakona, loko a ha ri eGaleliya, ₇loko a te: ‘N'wana-wa-Munhu ú fanele ku nyiketiwa emavokweni ya vadyohi, a vambiwa, kutani ú ta pfuka hi siku ra vunharhu.’ ” ₈Va tsundzuka marito ya yena, ₉kutani va suka esirheni, va ya rungula timhaka leti hinkwato eka lava khume na un'we ni ka van'wana hinkwavo. ₁₀Vavasati lava, a va ri va Mariya wa Magadala, na Yohana, na Mariya mana wa Yakobo; kutani vona ni van'wana lava a va ri na vona, va vikela vaapostola timhaka teto. ₁₁Kambe marito lawa a va ma teka ma ri ya ku vungunya, va nga ma pfumeli. [ ₁₂Loko a ri yena Petro a suka, a tsutsumela esirheni; kuteloko a korhamile a hlometela, a vona tinguvu ntsena, kutani a tlhelela ekaya, a ri karhi a hlamala hi leswi humeleleke.]

₁₃Hi siku rero, vambirhi va vona, a va ya emutini lowu vuriwaka Emawusi; vukule bya wona na Yerusalema, a byi ringana mpfhuka wa 12 km. ₁₄A va vulavula swin'we hi timhaka hinkwato leti humeleleke. ₁₅Va ku va ha vulavula ha tona va ti kanela, Yesu hi xiviri xa yena a va tshinelela, a famba na vona. ₁₆Kambe mahlo ya vona a ma siveriwa, va nga n'wi tivi. ₁₇Kutani a ku ka vona: “Hi tihi timhaka leti mi vulavulaka ha tona endleleni ke?” Hiloko vona va yima va ri ni gome. ₁₈Un'wana loyi a va ku i Keleyopasi, a hlamula, a ku: “Exikarhi ka lava endzeke eYerusalema, xana hi wena u ri wexe la nga tiviki timhaka leti humeleleke kona hi masiku lawa ke?” ₁₉A ku ka vona: “Hi tihi xana?” Va ku ka yena: “Ta Yesu wa Nazareta, loyi a a ri muprofeta wa matimba emintirhweni ne ku vulavuleni, emahlweni ka Xikwembu ne mahlweni ka tiko hinkwaro; ₂₀vaprista lavakulu ni vakulukumba va hina va n'wi nyiketile leswaku a avanyiseriwa rifu, kutani va n'wi vambile. ₂₁Loko hi ri hina, a hi tshembile leswaku hi yena loyi a nga ta kutsula Israele; hambiswiritano, namuntlha i siku ra vunharhu timhaka leti ti humelerile. ₂₂Kunene vavasati van'wana va ka hina va hi hlamarisile ngopfu; va yile esirheni nimpundzu swinene, ₂₃kutani a va kumanga ntsumbu wa yena; va vuyile, va vula leswaku va vonile mahlori ya tintsumi leti nga te: ‘Wa hanya.’ ₂₄Van'wana va ka hina va yile esirheni, va kumile swi ri tano, hilaha vavasati va vuleke hakona; kambe yena, a va n'wi vonanga.”

₂₅Kutani a ku ka vona: “Yo! vanhu lava nga twisisiki, va timbilu leti hlwelaka ku kholwa hinkwaswo leswi vuriweke hi vaprofeta! ₂₆Xana a swi nga faneri leswaku Mesiya a twisiwa ku vaviseka koloku, a tlhela a nghena eku kwetsimeni ka yena ke?” ₂₇Kutani a va hlamusela hilaha timhaka ta yena ti nga vuriwa eMatsalweni hinkwawo hakona, ku sungula hi Muxe ku yisa eka vaprofeta hinkwavo.

₂₈Kakuloko va fika kusuhi ni muti lowu va yaka eka wona, a endla onge ú hundzela emahlweni. ₂₉Kutani va n'wi sindzisa va ku: “Xwana na hina, hikuva ri ya eku peleni, ni vusiku bya tshinela.” Kutani a nghena, a ya tshama na vona. ₃₀Kakuloko va ri eku dyeni, a teka xinkwa, a nkhensa, kutani a phema, a va nyika. ₃₁Hiloko mahlo ya vona ma pfuleka, kutani va n'wi tiva; kambe yena a va siya a nyamalala. ₃₂Kutani va byelana, va ku: “Hikwalaho ka yini timbilu ta hina ti nga pfurhanga endzeni ka hina, loko a vulavula na hina endleleni, a hi pfuletela Matsalwa xana?”

₃₃Kutani hi nkarhi wolowo va suka, va tlhelela eYerusalema, va ya kuma lava khume na un'we, va hlengeletanile na van'wana, ₃₄va ri karhi va rungulelana va ku: “Hakunene Hosi yi pfukile eku feni, naswona yi tikombile eka Simoni.” ₃₅Kutani na vona va Emawusi va rungula leswi swi nga va humelela endleleni, ni hilaha va n'wi tiveke hakona, eku phemeni ka xinkwa.

₃₆Va ku va ha vulavula, Yesu a yima exikarhi ka vona, yena hi xiviri, kutani a ku ka vona: “Ku rhula a ku ve na n'wina!” ₃₇Va khomiwa hi ku chava lokukulu, va ehleketa leswaku va vona xipuku. ₃₈A ku ka vona: “Xana mi chavisiwa ha yini, hikwalaho ka yini mi ri ni ku kanakana etimbilwini ta n'wina ke? ₃₉Vonani swandla swa mina ni milenge ya mina! Hi mina hi xiviri xa mina. Ndzi khomeni mi ndzi ringetela. Xipuku a xi na nyama ni marhambu, kasi mina ndzi na swona, hilaha mi swi vonaka hakona.” [ ₄₀Loko a vurile sweswo, a tlhela a va komba swandla swa yena ni milenge ya yena.] ₄₁Kutani leswi eku tsakeni ne ku hlamaleni ka vona a va ha kanakana, a ku ka vona: “Xana mi ni swakudya kwala ke?” ₄₂Vona va n'wi nyika xikwavi xa nhlampfi lexi oxiweke; ₄₃a xi amukela, a dya emahlweni ka vona.

₄₄Kutani a ku ka vona: “Hi tona timhaka leti ndzi nga mi tivisa tona, loko ndza ha ri na n'wina, loko ndzi te: ‘Hinkwaswo leswi tsariweke ehenhla ka mina eNawini wa Muxe ni ka Vaprofeta, ni ka Tipisalema, swi fanele ku hetiseka.’ ” ₄₅Kavaloko a pfula miehleketo ya yona leswaku va twisisa Matsalwa. ₄₆Kutani a ku ka vona: “Matsalwa ma vurisile ma te: ‘Mesiya ú ta twisiwa ku vaviseka, a tlhela a pfuka eku feni hi siku ra vunharhu. ₄₇Kutani, hi vito ra yena, timhaka ta ku hundzuka ni ta ku rivaleriwa swidyoho ti ta twarisiwa ematikweni hinkwawo, ku sungula hi le Yerusalema.’ ₄₈N'wina mi timbhoni ta timhaka leti. ₄₉Loko a ri mina, ndzi ta mi rhumela leswi Tata wa mina a mi tshembiseke swona. Kambe n'wina tshamani kwala mutini, ku fikela loko mi funengetiwa hi matimba ya le henhla.”

₅₀Kutani a va yisa ehandle ka muti, a ya fika na vona kusuhi na Betaniya, kutani a tlakusa mavoko, a va katekisa. ₅₁Loko a ri karhi a va katekisa, a avana na vona [a tlakuriwa, a ya etilweni]. ₅₂Kutani vona [loko va n'wi nhinsamerile], va tlhelela eYerusalema hi ku tsaka lokukulu. ₅₃Kutani a va ri eTempeleni masiku hinkwawo, va ri karhi va dzunisa Xikwembu.