Matewu 9

₁Kavaloko Yesu a nghena ebyatsweni, a tlhela a pela lwandle, a ya emutini wa ka rikwavo. ₂Kutani va tisa ka yena munhu wo khwanyala swirho, a lo lákáhlá evuhlakeni. Loko Yesu a vona ku pfumela ka vona, a ku ka lowo khwanyala swirho: “Tiyisa mbilu n'wananga, u rivaleriwile swidyoho swa wena.” ₃Vatsari van'wana va anakanya etimbilwini ta vona, va ku: “Munhu loyi ú sandza Xikwembu!” ₄Yesu, hi ku tiva miehleketo ya vona, a ku: “Hikwalaho ka yini mi ehleketa leswo biha etimbilwini ta n'wina? ₅Xana ku olova yini, ku vula leswaku: ‘U rivaleriwile swidyoho swa wena’, kumbe ku vula: ‘Pfuka u famba’ xana? ₆Sweswi tivani leswaku N'wana-wa-Munhu ú ni matimba laha misaveni ku rivalela vanhu swidyoho.” Kutani a ku ka loyi a khwanyaleke swirho: “Pfuka, u teka vuhlaka bya wena, u ya ekaya.” ₇Hiloko yena a pfuka, a ya ekaya. ₈Loko mintshungu yi vona sweswo, yi khomiwa hi ku chava, kutani yi dzunisa Xikwembu lexi nga nyika matimba layo tano eka vanhu.

₉Loko Yesu a sukile kwalaho, a ya emahlweni, kutani a vona munhu loyi a va ku i Matewu a tshamile endlwini ya ndzuvo. A ku ka yena: “Ndzi landze!” Kavaloko Matewu a suka a yima a n'wi landza.

₁₀Kuteloko Yesu a tshamile eswakudyeni endlwini, valuvisi lavo tala ni vadyohi va fika, va tshama na yena eswakudyeni kun'we ni vadyondzisiwa va yena. ₁₁Loko Vafarisi va swi vona, va ku ka vadyondzisiwa va yena: “Xana Mudyondzisi wa n'wina ú dyela yini ni valuvisi ni vadyohi ke?” ₁₂Loko Yesu a swi twa, a ku ka vona: “Lava tsakeke emirini, a va lavi n'anga, kambe yi laviwa hi lava vabyaka.

₁₃“Yanani, mi ya dyondza rito leri nge: ‘Ndzi tsakela tintswalo, ku nga ri magandzelo.’ Hikuva a ndzi tanga ku ta vitana lava lulameke, kambe vadyohi.”

₁₄Enkarhini wolowo vadyondzisiwa va Yohane va ta ka yena va ku: “Swi endlisa ku yini leswaku hina ni Vafarisi hi tala ku titsona swakudya, kasi vadyondzisiwa va wena vona va nga titsoniki ke?” ₁₅Yesu a ku ka vona: “Xana tinxangwana ta muteki ti nga rila loko muteki a ha ri na tona ke? Kambe masiku ma ta ta, lawa muteki a nga ta susiwa eka tona; hi kona ti nga ta titsona swakudya. ₁₆A ku na munhu la rhungelaka xitiva lexintshwa engubyini ya khale, hikuva xitiva xa kona xi ta handzula nguvu, kutani ku handzuka ka kona ku ta ya ku engeteleka. ₁₇Naswona vanhu a va cheli vhinyo leyintshwa eminkwameni ya khale ya madzovo, hikuva loko va endlisa sweswo, minkwama yi ta handzuka, kutani vhinyo yi halaka, na yona minkwama yi onhaka; kambe vhinyo leyintshwa va yi chela eminkwameni leyintshwa, kutani swi hlayiseka hi vumbirhi bya swona.”

₁₈Loko a ha vulavula na vona hi timhaka teto, ku fika un'wana wa varhangeri va sinagoga, a n'wi nkhinsamela a ku: “N'wana wa mina wa wanhwanyana wa ha ku fa sweswi, kambe wa nga ta, u ta n'wi tlhandleka mavoko, kutani ú ta tlhela a hanya.” ₁₉Hiloko Yesu a suka a n'wi landza, kun'we ni vadyondzisiwa va yena.

₂₀Kambe a ku ri ni wansati loyi a a vabya hi vuvabyi bya ngati, a vabyile malembe ya 12; a ta hi ku nyandlamela hi le ndzhaku ka Yesu, a khumba makumu ya nguvu ya yena; ₂₁hikuva a a te embilwini ya yena: “Loko ndzi nga khumba nguvu ya yena ntsena, ndzi ta hanyisiwa.” ₂₂Yesu a hundzuluka, kutani loko a n'wi vona, a ku ka yena: “Tiyisa mbilu n'wananga, ku pfumela ka wena ku ku hanyisile.” Ku sukela enkarhini wolowo, wansati loyi a va la hanyeke.

₂₃Kutani loko Yesu a fika emutini wa murhangeri ni loko a vona lava chayaka switiringo ni ntshungu lowu pfilunganeke, ₂₄a ku ka vona: “Sukani, hikuva wanhwanyana a nga fanga, ú lo etlela.” Kutani va n'wi hleka. ₂₅Kambe loko ntshungu wu humeseriwe handle, Yesu a nghena a khoma wanhwanyana hi voko, yena a pfuka. ₂₆Mahungu ya mhaka yoleyo ma twakala etikweni rero hinkwaro.

₂₇Loko Yesu a sukile kwalaho ni ku hundzela emahlweni, lavo-fe-mahlo vambirhi va n'wi landza, va ri karhi va huwelela va ku: “N'wana Davhida, hi twele vusiwana.” ₂₈Kuteloko a nghenile ndlwini, lavo-fe-mahlo va ta eka yena, kutani Yesu a ku ka vona: “Xana ma pfumela leswaku ndzi nga mi pfuna ke?” Va ku ka yena; “Ina Hosi!” ₂₉Hiloko a khumba mahlo ya vona, a ku: “Mi ta endleriwa hilaha mi pfumelaka hakona.” ₃₀Kutani mahlo ya vona ma pfuleka. Yesu a va laya ngopfu, a ku: “Tivoneleni leswaku swi nga tshuki swi tiviwa hi munhu!” ₃₁Kambe loko va humile, va ya vulavula hi yena etikweni rero hinkwaro.

₃₂Loko va ri karhi va huma, ku tisiwa munhu wa mbheveve, la nga ni demona. ₃₃Kuteloko demona ri hlongoriwile, lowa mbheveve a vulavula. Kutani mintshungu yi hlamala, yi ku: “Mhaka leyo tano a yi si vonaka exikarhi ka Vaisraele.” ₃₄Kambe Vafarisi va ku: “Ú hlongola mademona hi matimba ya hosi ya mademona.”

₃₅Kutani Yesu a rhendzeleka ni miti hinkwayo ni swimitana hinkwaswo, a ri karhi a dyondzisa emasinagogeni ya vona, a twarisa Evhangeli ya Mfumo, a hanyisa hinkwavo lava xanisiwaka hi mavabyi ya tinxaka-xaka. ₃₆Loko a vona mintshungu ya vanhu, a va twela vusiwana, hikuva a va karhele, va tshamile ehansi, va fana ni tinyimpfu leti nga riki na murisi. ₃₇Hiloko a ku ka vadyondzisiwa va yena: “Ntshovelo i wukulu, kambe vatirhi a va talanga. ₃₈Hikokwalaho, khongelani N'wini wa ntshovelo, leswaku a rhuma vatirhi eku tshoveleni ka yena.”