Mikiya 5

₁“Kambe mi ta rhanga mi tixekelela

mi rila nkosi,

n'wina vaaki va Yerusalema lava tshembaka matlhari,

hikuva valala va ta mi rhendzela,

va khoma mufumi wa Israele, va n'wi ba tinhlaya hi nhonga.”

₂HOSI Xikwembu xi ri:

“Wena Betlehema wa Efrata,

hi wena lontsongo exikarhi ka miti ya va ka Yuda,

kambe eka wena ndzi ta tilavela loyi a nga ta fuma Vaisraele;

vatata wa yena va hanyile ka wena ku sukela khale swinene.”

₃Hikokwalaho, ku tshikiwa ka vona ku ta hela

siku leri wansati la tikeke a velekaka n'wana wa mufana,

kutani Vaisraele lava nga sala evukhumbini,

va ta vuya karikwavo.

₄Murhangeri loyi a taka, ú ta fuma tiko a tiyile,

a komba matimba ni ku twala ka HOSI Xikwembu xa yena.

Vaisraele va ta va va tshamisekile,

hikuva ú ta va la chavisekaka emisaveni hinkwayo;

₅hi yena la nga ta tisa ku rhula.

Loko Vaasiriya va tshuka va nghenile etikweni ra hina,

va kandziya entsindza,

hi ta rhuma vavanuna va 7 kumbe 8 lava nga ta lwa na vona,

va va varisi ni varhangeri va hina;

₆va ta hlula Asiriya, tiko ra va ka Nimrodo,

va ri fuma hi matlhari.

Loko Vaasiriya va ringeta ku nghena etikweni ra hina,

murhangeri wa hina ú ta hi lwela.

₇Hinkwavo lava nga masalela ya va ka Yakobo,

vona lava rhendzeriweke hi vanhu va matiko layo tala,

va ta fana ni mberha leyi humaka eka HOSI Xikwembu,

kumbe swimpfulana leswi hlukisaka byanyi,

swi nga lerisiwanga hi munhu,

leswi swi ngo tinela swi nga komberiwanga hi munhu.

₈Va ka Yakobo lava saleke exikarhi ka vamatiko,

va rhendzeriwa hi vanhu lavo tala,

va ta fana ni nghala exikarhi ka swiharhi swa nhova,

kumbe n'wana wa nghala entlhambini wa tinyimpfu;

laha va taka ha kona, va ta bvanyangeta ni ku phatlulela,

ku ri hava munhu loyi a va sivelaka.

₉N'wina Vaisraele, mi ta ba valala va n'wina

mi va herisa hinkwavo.

₁₀HOSI Xikwembu xi ri:

“Enkarhini wolowo, ndzi ta herisa tihanci ta n'wina

ni makalichi ya n'wina ya nyimpi.

₁₁Ndzi ta herisa miti leyi nga tikweni ra n'wina,

ndzi mbundzumuxa ni makhokholo ya n'wina hinkwawo.

₁₂Vungoma ndzi ta byi herisa exikarhi ka n'wina,

kutani a mi nga ha vi na vanyamusoro.

₁₃Ndzi ta herisa swikwembu swa n'wina swa swifaniso,

ndzi herisa ni maribye ya vukhongeri bya hava,

kutani a mi nga ha nkhinsameli

swilo leswi endliweke hi mavoko ya n'wina.

₁₄Timhandze ta Axera xikwembukazi, ndzi ta ti simula ti suka exikarhi ka n'wina,

ndzi mbundzumuxela ni miti ya n'wina.

₁₅Vanhu va matiko lama aleke ku ndzi yingisa,

ndzi ta va hlundzukela ndzi va karihela, ndzi tirihisela eka vona.”