Tinhlayo 20

₁Hi n'hweti yo sungula, ntshungu hinkwawo wa Vaisraele wu fika emananga ya Sini, kutani wu ya tshama eKadexe. Laha hi kona Meriyamu a nga fela kona, a tlhela a lahliwa kona.

₂Laha Vaisraele a va govile kona, a ku ri hava mati. Kutani va hlengeletana, va dzumadzumela Muxe na Aroni. ₃Kutani Vaisraele va holovela Muxe va ku ka yena: “A swi ta antswa loko a hi lo tifela na hina, nkarhi lowu vamakwerhu va nga fa ha wona emahlweni ka Ntsonga wa HOSI. ₄Xana hikwalaho ka yini mi hi tisile laha mananga, hina ntshungu wa HOSI, leswaku hi ta fela kona, hina ni swifuwo swa hina, xana? ₅Xana mi hi humesele yini etikweni ra Egipta, mi hi tisa endhawini yo bihisa leswi xana? Ndhawu leyi a yi na ndzimo, kumbe mihandzu yo fana ni makuwa, kumbe ya vhinya, kumbe ya magrenada; hambi ma ri mati yo nwa, ku hava!” ₆Kutani Muxe na Aroni va suka laha ntshungu a wu hlengeletanile kona, va ya enyangweni ya Ntsonga lowo Hlawuleka, va fika va tiwisela hansi hi mimombo. Hiloko ku vonakala ka HOSI Xikwembu ku humelela eka vona.

₇Kutani HOSI Xikwembu xi ku ka Muxe: ₈“Teka nhonga ya wena, kutani wena ni makwenu Aroni mi hlengeleta ntshungu, mi lerisa ribye emahlweni ka wona leswaku ri humesa mati; leyi hi yona ndlela leyi u nga ta humesa mati ha yona eribyeni, u nyika ntshungu, wu nwa ni swifuwo swa wona.” ₉Kutani Muxe a suka emahlweni ka HOSI Xikwembu a tamele nhonga hilaha xi n'wi leriseke hakona; ₁₀a famba na Aroni, va ya hlengeleta ntshungu emahlweni ka ribye.

Kutani Muxe a ku ka vona: “Yingisani n'wina vatiarisi ndzin'wina! Xana ma tshemba leswaku hi nga mi humesela mati eribyeni leri xana?” ₁₁Hiloko Muxe a tlakusa voko ra yena, a ba ribye kambirhi hi nhonga; kutani ku huma mati, ma tele swinene; ntshungu wu nwa ni swifuwo swa wona. ₁₂Kutani HOSI Xikwembu xi ku ka Muxe na Aroni: “Mi nga ka mi nga va fikisi Vaisraele etikweni leri ndzi va nyikeke rona, hikuva a mi ndzi tshembanga, mi arile ku va komba matimba ya mina layo hlawuleka.” ₁₃Lawa hi wona mati ya Meriba (hileswaku “ya mholovo”), laha Vaisraele va holoveleke HOSI Xikwembu kona, kutani xona xi tikomba exikarhi ka vona leswaku hi xona Xikwembu lexi chavisekaka ngopfu.

₁₄Kutani Muxe a rhuma vanhu va suka eKadexe, va ya eka hosi ya Edomu, va fika va ku: “Vamakwenu Vaisraele va vula sweswo va ri: ‘Ku tikeriwa ka hina hinkwako, ma ku tiva; ₁₅Mi tiva ni hilaha vatata wa hina va nga ya etikweni ra Egipta hakona; ni nkarhi lowu hi tshameke wona le Egipta, ma wu tiva leswaku wu lehile swinene; naswona ma swi tiva leswaku Vaegipta va hi xanisile ngopfu, hina ni vatata wa hina. ₁₆Kuteloko hi yisile xirilo xa hina eka HOSI Xikwembu, xi hi hlamurile, xi hi rhumela ntsumi, yi ta hi humesa etikweni ra Egipta; kutani sweswi hi kwala Kadexe, muti lowu nga ndzilekaneni wa tiko ra n'wina. ₁₇Hi kombela ku tsemakanya hi kwala tikweni ra n'wina. Loko ku ri emasin'wini ni le mitangeni, a hi nga ngheni, hambi mati manene exihlobyeni, a hi nga nwi; hi ta famba ntsena hi gondzo lerikulu, hi nga rhendzeleki, ku kondza hi huma etikweni ra n'wina.’ ” ₁₈Kambe hosi ya Edomu yi hlamula yi ku: “A hi swi lavi leswaku mi tsemakanya hi le tikweni ra hina; loko mo ringeta, hi ta mi tela ni matlhari!” ₁₉Kutani Vaisraele va ku ka hosi ya Edomu: “Hi ta famba hi gondzo lerikulu; loko hina ho tshuka hi nwa mati ya tiko ra n'wina, kumbe loko ku nwa swifuwo swa hina, hi ta hakela; hina a hi kombeli swin'wana, ho kombela ntsena ku tsemakanya hi le tikweni ra n'wina.” ₂₀Kambe hosi ya Edomu yi ku: “Ku tsemakanya kona, mi nga ka mi nga tsemakanyi!” Hiloko hosi ya Edomu yi huma ni mavuthu ya yona ya matimba, va ya tlherisa Vaisraele. ₂₁Hi mukhuva lowu, hosi ya Edomu yi sivela Vaisraele ku tsemakanya hi le tikweni ra yona, kutani vona va tlhelela endzhaku, va hambana ni Vaedomu.

₂₂Ntshungu hinkwawo wa Vaisraele wu suka eKadexe, wu famba wu ya fika entshaveni ya HOSI. ₂₃Loko va ri kona, endzilekaneni wa tiko ra Edomu, HOSI Xikwembu xi ku ka Muxe na Aroni: ₂₄“Aroni ú ta fa a landza vatata wa yena; a nga ka a nga ngheni etikweni leri ndzi ri nyikeke Vaisraele, hikuva mi arile xileriso xa mina loko mi ri le Meriba. ₂₅Teka Aroni ni n'wana wa yena Eliyazara, u tlhandluka na vona, mi ya entshaveni ya Hori; ₂₆u fika u hluvula Aroni swiambalo swa vuprista, u ambexa n'wana wa yena Eliyazara; Aroni yena ú ta fela kwala ntshaveni, a landza vatata wa yena.”

₂₇Muxe a endla hilaha HOSI Xikwembu xi n'wi leriseke hakona: Va tlhandlukela entshaveni ya Hori, ntshungu hinkwawo wa Vaisraele wu ri karhi wu swi vona. ₂₈Kutani Muxe a hluvula Aroni swiambalo swa vuprista, a ambexa n'wana wa yena Eliyazara; hiloko Aroni a tifela kwale henhla ka ntshava. Muxe na Eliyazara va rhelela va suka entshaveni. ₂₉Kakuloko Vaisraele va vona leswaku Aroni ú lovile, hinkwavo va n'wi rila masiku ya 30.