Tinhlayo 9

₁Eka lembe ra vumbirhi loko Vaisraele va humile etikweni ra Egipta, hi n'hweti yo sungula, HOSI Xikwembu xi vulavula na Muxe emananga ya Sinayi, xi ku: ₂“Byela Vaisraele leswaku va endla nkhuvo wa Paseka hi nkarhi wa wona lowu vekiweke. ₃Siku leri vekiweke, leri mi nga ta endla nkhuvo ha rona, i ra vu-14 ra n'hweti leyi, hi minkarhi ya madyambu, mi wu endla hi ku landza milawu ya wona hinkwayo ni swiboho swa wona hinkwaswo.” ₄Kutani Muxe a byela Vaisraele leswaku va endla nkhuvo wa Paseka. ₅Kutani Vaisraele va endla nkhuvo wa Paseka emananga ya Sinayi hi siku ra vu-14 ra n'hweti yo sungula, hi minkarhi ya madyambu, va tirha hinkwaswo leswi HOSI Xikwembu xi leriseke Muxe, va nga siyi nchumu.

₆Hi siku rero, ku vile ni vanhu van'wana lava a va nga fanelanga ku endla nkhuvo wa Paseka, hi mhaka ya leswi a va tinyamisile hi ku khumba ntsumbu. Kutani va ya eka Muxe na Aroni, ₇va fika va ku ka Muxe: “Hi nyamile hileswi hi khumbeke ntsumbu; kutani hikwalaho ka yini mhaka leyi yi hi sivela ku humesa gandzelo ra HOSI Xikwembu swin'we ni Vaisraele lavan'wana, hi nkarhi wa rona lowu vekiweke, xana?” ₈Muxe a va hlamula a ku: “Yimani ku kondza ndzi twa leswi HOSI Xikwembu xi nga ta ndzi lerisa swona, hi tlhelo ra n'wina.”

₉HOSI Xikwembu xi ku ka Muxe: ₁₀“Tivisa Vaisraele mhaka leyi: Loko un'wana wa n'wina kumbe un'wana wa vatukulu va n'wina a tinyamisile hi ku khumba ntsumbu, kumbe loko a endzile ekule, wa ha ta ndzi tlangela hi ku endla nkhuvo wa Paseka. ₁₁Vanhu vo tano va ta wu endla eka n'hweti leyi tlhandlamaka, hi siku ra vu-14, hi minkarhi ya madyambu; nyama ya xifuwo xa Paseka va ta yi dya ni xinkwa xo-ke-comela, ni matsavu lama bavaka. ₁₂Ku nga tshuki ku va ni leswi va nga ta swi siyela mundzuku, naswona va nga tshuki va faya marhambu ya kona. Va ta endla nkhuvo wa Paseka hi ku landza milawu ya wona. ₁₃Kambe loko munhu a basile, naswona a nga endzanga, kutani a tshika ku endla nkhuvo wa Paseka, munhu wo tano ú fanele ku hlongoriwa erixakeni ra ka vona, hikuva ú ta va a nga humesanga gandzelo ra mina HOSI hi nkarhi lowu vekiweke. Tlhandlakambirhi ú ta dlawela swidyoho swa yena. ₁₄Loko munhu wa le handle loyi a luveleke eka n'wina, a navela ku ndzi tlangela mina HOSI hi ku dya nkhuvo wa Paseka, a nga wu endla hi ku landza milawu ni swiboho swa wona. Mi fanele ku tirhisa nawu wun'we eka munhu wa rixaka ra Israele, ni le ka munhu wa le handle loyi a luveleke erixakeni ra Israele.”

₁₅Hi siku leri Ntsonga lowu nga ni Areka ya Ntwanano wu yimisiweke ha rona, papa ri wu khubumeta; nivusiku a ri fana ni ndzilo, ri funengeta Ntsonga dyambu ri kondza ri xa. ₁₆Masiku hinkwawo a swi ri tano: Ntsonga a wu khubumetiwa hi papa, leri nivusiku a ri fana ni ndzilo. ₁₇Nkarhi hinkwawo loko papa ri suka ehenhla ka Ntsonga, Vaisraele a va suka na vona, kutani laha papa ri fikaka ri yima kona, a va gova kona. ₁₈Vaisraele a va suka ni ku gova hi ku landza xileriso xa HOSI Xikwembu. Loko papa ra ha funengetile Ntsonga, a va tshama laha va goveke kona. ₁₉Vaisraele a va hlayisa xileriso xa HOSI Xikwembu; a va nga suki, hambiloko papa ri funengeta Ntsonga nkarhi wo leha. ₂₀Nkarhi wun'wana papa a ri funengeta Ntsonga masiku ma nga ri mangani (Vaisraele a va tshama laha va goveke kona hi ku lerisiwa hi HOSI Xikwembu; va tlhela va suka hi ku lerisiwa hi xona). ₂₁Nkarhi wun'wana papa a ri khubumeta Ntsonga ku sukela nimadyambu ku fikela nimixo; kutani loko papa ri suka nimixo, na vona Vaisraele a va suka; kambe loko ri ya emahlweni ni ku khubumeta Ntsonga siku leri tlhandlamaka ni vusiku bya kona, Vaisraele a va suka nkarhi lowu a ri suka ha wona. ₂₂Vaisraele a va tshama laha va goveke kona, va nga suki, hambiloko papa ri khubumeta Ntsonga ri tshama masiku mambirhi, kumbe n'hweti, kumbe ku tlula n'hweti; kambe loko papa ri suka, na vona a va suka. ₂₃Vaisraele a va hlayisa nawu wa HOSI Xikwembu hilaha xi leriseke Muxe hakona: A va gova hi ku lerisiwa hi HOSI Xikwembu, va suka hi ku lerisiwa hi xona.