Swivuriso 10

N'wana la tlhariheke, ú tsakisa tata wa yena,

kambe la tiarisaka i nhlomulo eka mana wa yena.

₂Xuma lexi kumiweke hi tindlela to homboloka a xi pfuni nchumu,

kambe ku lulama swi ponisa vutomi bya munhu.

₃HOSI Xikwembu a xi tshiki lowo lulama a sika,

kambe xi tsona lavo biha leswi va swi navelaka.

₄Ku tshama hi mavoko swi chela vusiwana,

migingiriko yona ya fumisa.

₅N'wana wa miehleketo, ú huma a ya pfuna eku tshoveleni,

kasi la salaka a etlele, ú nyumisa vatswari.

₆Minkateko yi wela lowo lulama,

kambe ku vulavula ka lovo homboloka ku fihla tihanyi.

₇Munhu wo lulama wa nkhensiwa, a nga rivariwi,

kasi vito ra lowo homboloka ra bola.

₈Munhu wa miehleketo wa twa loko a tsundzuxiwa,

kambe xihanya-nomo xona xi ta ya eku loveni.

₉Ku hanya eku tshembekeni i ku hanya eku hlayisekeni,

kambe loyi tindlela ta yena ti gombonyokeke, ú ta kumiwa.

₁₀Munhu la tshunyetaka hi tihlo, ú pfuxa minkitsikitsi,

kambe la nga chaviki ku tshinya van'wana, ú tisa ku rhula.

₁₁Marito ya munhu la lulameke i xihlovo xa vutomi,

kambe ku vulavula ka lavo homboloka ku fihla tihanyi.

₁₂Rivengo ri pfuxa madzolonga,

kambe rirhandzu ri endla leswaku vanhu va rivalelana.

₁₃Enon'wini wa la twisisaka, ku huma marito ya vutlhari,

kambe la nga ehleketiki swinene, wo fanela hi nkhavi.

₁₄Lavo tlhariha va tihlayisela vutivi,

kambe loko xiphukuphuku xi jakatseka, khombo ri le kusuhi.

₁₅Khokholo ra n'wankumi i rifuwo ra yena,

kasi swisiwana swi herisiwa hi vusweti bya swona.

₁₆Hakelo ya munhu la lulameke i vutomi,

kasi lowo homboloka ú dya mihandzu ya xidyoho.

₁₇Loyi a twaka ku byeriwa, ú khome ndlela ya vutomi,

kasi ma-ka-tindleve wa lahleka.

₁₈Munhu la fihlaka rivengo, ú hemba ngopfu,

la lumbetaka van'wana, i xiphunta.

₁₉Ku tata marito, swi vanga swihoxo,

kambe loyi a kotaka ku tikhoma, ú ni mianakanyo leyinene.

₂₀Marito ya munhu wo lulama i silivhere leyo saseka,

kasi miehleketo ya lavo homboloka a yi pfuni nchumu.

₂₁Leswi humaka enon'wini wa munhu wo lulama i swakudya swa lavo tala,

kambe swiphukuphuku swi ticelela masirha hi ku ka swi nga ehleketi.

₂₂Minkateko ya HOSI Xikwembu yi fumisa vanhu,

ku tikarhata ka munhu ku nga ka ku nga yi engeteli.

₂₃Xiphunta xi hungasa hi ku endla swa manyala,

kasi munhu la twisisaka ú hungasa hi mintirho ya vutlhari.

₂₄Lowo biha ú teriwa hi swilo leswi a swi chavaka ngopfu,

kambe lavo lulama va nyikiwa leswi va swi navelaka.

₂₅Loko ku hundza bubutsa, lavo homboloka a va sali,

kambe lavo lulama, vona va sala va lo tíkítìkì!

₂₆Lolo ri dyisa loyi a ri rhumaka embitsi,

ku fana ni loko munhu a nwa ntsuvi, kumbe a tlunyiwa hi musi.

₂₇Munhu la chavaka HOSI Xikwembu ú engeteleriwa masiku ya ku hanya,

kambe lavo homboloka va hatla va hundza emisaveni.

₂₈Ku tshemba ka lavo lulama ku hela hi ntsako,

kambe leswi lavo homboloka va swi langutelaka, swi helela empfhukeni.

₂₉HOSI Xikwembu i khokholo ra munhu la tshembekeke,

kambe xi herisa lava dyohaka.

₃₀Munhu wo lulama a nga ka a nga rhurhisiwi,

kambe lavo homboloka va ta susiwa etikweni.

₃₁Enon'wini wa munhu wo lulama ku huma marito ya vutlhari;

loyi a vulavulaka mavunwa, ú ta tsemiwa ririmi.

₃₂Munhu la lulameke ú vulavula leswi nga swona,

kasi lavo homboloka va vulavula mavunwa ntsena.