Swivuriso 20

₁Vhinyo ya sandzisa, byalwa byi vanga huwa,

hinkwavo lava yengiwaka hi swona, a va tlharihanga.

₂Loko hosi yi karihile, yi chavisa ku fana ni nghala leyi bongaka,

loyi a yi hlundzukisaka, ú tivangela rifu.

₃Munhu la tikhomaka loko va n'wi pfuka, wa xiximiwa,

swiphukuphuku swona swi tshamela ku lwisa van'wana.

₄Munhu la lolohaka ku rima hi nguva ya kona,

a nge tshoveli nchumu, hambi o swi lava.

₅Makungu ya mbilu i xidziva xa mati,

lama nga kiwaka ntsena hi munhu wo twisisa.

₆Va tele vanhu lava tivulaka lavo tshembeka,

kambe loyi hakunene a tshembekeke, wa kala swinene.

₇Munhu wo lulama loyi a endlaka leswi lulameke,

ú siyela vana va yena ndzhaka ya minkateko.

₈Hosi leyi tshameke exiluvelweni xo avanyisa,

yi kota ku hatla yi vona loyi a nga ni nandzu.

₉Xana ú kona loyi a nga vulaka a ku: “Mbilu ya mina yi basile,

ndzi tengile, a ndza ha ri na swidyoho!” xana?

₁₀Ku xavisela vanhu xilo xin'we hi mimpimo yo hambana,

HOSI Xikwembu xa swi venga.

₁₁Hambi a ri n'wana, u ta n'wi tiva hi swiendlo swa yena,

ú ta tikomba loko a tengile, a ri la lulameke.

₁₂Ndleve leyi twaka, ni tihlo leri vonaka,

swi endliwile hi HOSI Xikwembu hinkwaswo.

₁₃U nga rhandzi vurhongo, hikuva u nga tichela vusiwana,

tshama u pfule mahlo, kutani u ta dya u xurha.

₁₄Muxavi ú ri: “U ndzi dlele, a swi xaveki!”

kambe loko a suka kwalaho, ú sungula ku tibuma.

₁₅Nsuku ni swilo swo bomba, a hi ku tala ka swona,

kambe marito ya vutivi i xuma lexi kalaka swinene.

₁₆Loko munhu a tiboha ku hakela milandzu ya loyi a nga n'wi tiviki, a a tekeriwe xiambalo;

loko a tshembisa ku hakelela vanhu vambe eswikweleti, a a humese xo khomela ha xona.

₁₇Munhu a nga va a tiphina hi swakudya swo kumiwa hi vukanganyisi,

kambe emakumu, ú ta twa wonge ú lo dya sava.

₁₈Makungu ma tiya hi switsundzuxo,

ni nyimpi yi lwiwa hi swiletelo swa vutlhari.

₁₉Munhu wa gubya, ú paluxa swihundla,

hikokwalaho, hambana ni munhu wo phyaphyarha ngopfu.

₂₀Munhu loyi a rhuketelaka tata wa yena kumbe mana wa yena,

rivoni ra yena ri ta timeka exinyamini lexikulu.

₂₁Ndzhaka leyi u yi vutlaka kunene,

eku heteleleni yi nge ku tiseli minkateko.

₂₂Loko munhu a ku endla leswo biha, u nga tshuki u ku: “Ndzi ta rihisa!”

Yimela HOSI Xikwembu, xona xi ta ku pfuna.

₂₃Ku xavisela vanhu xilo xin'we hi mimpimo yo hambana, HOSI Xikwembu xa swi venga,

ku tirhisa mimpimo leyi nga riki yona, a swi laveki.

₂₄HOSI Xikwembu hi xona xi kombaka munhu endlela,

hikuva yena a nga ku tivisa ku yini lomu a yaka kona xana?

₂₅Swi ni khombo ku tsutsumela ku vula, u ku: “Xilo lexi, ndzi xi nyiketa HOSI Xikwembu!”

kutani endzhaku u hundzuluxa miehleketo, eka leswi u tiboheke swona hi ku hlambanya.

₂₆Lavo homboloka, hosi leyi tlhariheke ya va peperha,

kutani yi va sila hi ribye.

₂₇Ripfalo ra munhu, i rivoni ra HOSI Xikwembu,

leri voningaka hinkwako endzeni ka yena.

₂₈Hosi leyi nga ni tintswalo ni ku tshembeka, yi ta hlayiseka,

vuhosi bya yona byi ta tiyisiwa hi leswo lulama.

₂₉Lavantshwa va bomba hi matimba ya vona,

lava dyuhaleke va tinyungubyisa hi timpfi.

₃₀Nkhavi lowu twisaka ku vava, wu susa leswo biha,

nhonga ya tlharihisa.