Swivuriso 28

₁Lowo homboloka, ú tsutsuma hambiloko a nga hlongorisiwi hi munhu,

kasi lavo lulama, a va chavi nchumu, va fana ni nghala.

₂Loko ku tshuka ku humelela mpfilumpfilu etikweni, lava lavaka vurhangeri, va tele,

kambe loko ku ri ni un'we wo tlhariha la nga ni miehleketo, tiko ri ta kuma ku rhula nkarhi wo leha.

₃Xisiwana xa mulanguteri, lexi xanisaka swisiwana-kulobye,

xi fana ni mpfula ya ximbhembhe, leyi herisaka swakudya.

₄Loko u tlula nawu, u dzunisa lavo homboloka,

kasi loko u wu hlayisa, a wu yimi na vona.

₅Vanhu vo biha timbilu, a va tivi leswi lulameke,

kambe lava gandzelaka HOSI Xikwembu, va swi tiva swinene.

₆Xisiwana lexi hanyaka hi ku tshembeka,

xi tlula n'wankumi loyi a nga ni mikhuva yo biha.

₇N'wana la hlayisaka nawu, ú tlharihile,

kasi loyi a tolovelaneke ni lava makolo, ú khomisa tata wa yena tingana.

₈Munhu loyi a engetelelaka rifuwo ra yena hi ku lava ntswalo wa mali leyi a yi lombiseke,

rifuwo rero, ú ri hlengeletela loyi a nga ni tintswalo eka swisiwana.

₉Loyi a pfalaka tindleve, a nga lavi ku twa nchumu hi nawu,

HOSI Xikwembu na xona, a xi nga twi swikhongelo swa yena.

₁₀Munhu loyi a kucetelaka lavo lulama ku endla leswo biha, ú tivangela khombo.

Vanhu lava nga riki na xisandzu, vona va ta dya ndzhaka ya leswinene.

₁₁N'wankumi a nga tivona a tlharihile,

kambe xisiwana xi ta swi vona leswaku munhu loyi a nga tlharihanga.

₁₂Loko lowo lulama a vekiwa ku va hosi, nkhuvo wa kona wu tsakisa ngopfu,

kasi loko ku vekiwa lowo homboloka, vanhu va suka va ya tumbela.

₁₃Loyi a fihlaka swidyoho swa yena, a nge humeleli,

kasi loyi a swi vulaka, kutani a hambana na swona, ú ta kuma tintswalo.

₁₄Ku katekile munhu loyi a chavaka HOSI Xikwembu minkarhi hinkwayo;

kambe loyi a tinonon'hwisaka, ú ta wela ekhombyeni.

₁₅Munhu wo homboloka la fumaka tiko ra swisiwana,

ú chavisa kukota nghala leyi bongaka kumbe xinkankanka lexi mpfhumpfhaka.

₁₆Murhangeri wo pfumala ku twisisa, ú andzisa maxangu,

kasi loyi a alaka ku xaviwa, ú andzisa masiku ya yena ya ku hanya.

₁₇Loyi a tirhwexeke nandzu hi ku dlaya un'wana,

ú ta tshamela ku baleka a kondza a fa, ku nga vi na loyi a n'wi pfunaka!

₁₈Munhu loyi a tshembekeke endleleni ya yena, ú ta hlayiseka,

kasi loyi a lavaka ku famba hi tindlela timbirhi hi nkarhi wun'we, ú ta hatla a wa.

₁₉Munhu loyi a rimaka, ú ta dya a xurha,

kambe loyi a landzelelaka leswi nga pfuniki nchumu, ú ta va xisiwana lexikulu.

₂₀Loyi a tshembekaka, ú ta kateka ngopfu,

kambe loyi a lavaka ku fuma hi siku rin'we, a nge poni, ú ta biwa.

₂₁Ku ya hi nghohe, kumbe ku hambukisa timhaka, hi mhaka ya ku xaviwa hi swakudyanyana,

a swi sasekanga.

₂₂Munhu wo tsonana, ú tsutsumela rifuwo,

kambe a nga swi tivi leswaku vusiwana byi n'wi kongomile.

₂₃Loyi a nga chaviki ku tshinya van'wana, eku heteleleni, ku ta tsakeriwa yena

ku tlula munhu wa marito yo tsokombela.

₂₄N'wana la tekelaka vatswari va yena swilo swa vona,

kutani a ku: “Sweswo a hi xidyoho!”

i munghana wa swigevenga.

₂₅La nga ni makolo, ú vanga madzolonga,

kasi munhu loyi a tshembaka HOSI Xikwembu, ú ta dya a xurha.

₂₆Loyi a titshembaka ngopfu, i xiphunta,

kasi loyi a fambaka evutlharini, yena ú ta pona.

₂₇La nyikaka swisiwana, a nge pfumali swa le mandleni,

kambe la alaka ku swi pfuna, vanhu va ta n'wi rhuketela ngopfu.

₂₈Loko lowo homboloka a vekiwa ku va hosi, vanhu va suka va ya tumbela,

kambe loko a lova, lavo lulama va tlhela va engeteleleka.