Pisalema ya 10

₁We HOSI, u yimele yini ekule xana?

Eminkarhini ya mahlomulo, u tifihlela yini xana?

₂Eku tikuriseni ka vona, lavo homboloka va sala swisiwana endzhaku.

Va phasise hi mano lawa va ma lukeke!

₃Munhu lowo homboloka ú tibumabuma hi ku navela ka yena loku biheke,

a nga kolwi ku bindzula, a rhuketela ni ku sandza HOSI.

₄Eku tikuriseni ka yena, lowo homboloka a nga ehleketi ku lava HOSI;

miehleketo ya yena hinkwayo yi ri: “Xikwembu a xi kona!”

₅Leswi a swi endlaka swi tshama swi ri karhi swi nyuka;

ku avanyisa ka wena HOSI, ku le henhla ngopfu, laha yena a nga ku voniki;

valala va yena wa va nyefula.

₆Hi mbilu, ú ri: “A ku na lexi xi nga ta ndzi wisa;

khombo ri nga ka ri nga ndzi weli, ni siku ni rin'we.”

₇Nomo wa yena wu tele nhlambha, ni vumbabva, ni marito lama chavisaka;

eku vulavuleni ka yena, ú haxa manyala ni vubihi.

₈Ú tumbelela vanhu kusuhi ni miti,

ú tshamela ku dlaya lava nga onhangiki nchumu.

₉Mahlo ya yena ma xiyaxiya lava tsaneke;

ú bvutama a nga voniwi, ku fana ni nghala exihlahleni xa yona;

ú tumbelela ku bvanyangeta swisiwana,

a swi khoma, a swi kokela eritavaleni ra yena;

₁₀a bvutama, a kasa;

lava tsaneke, ú va bvanyangeta hi matimba.

₁₁Hi mbilu, ú ri: “Xikwembu a xi na mhaka,

a xi languti, xi nga ka xi nga swi voni.”

₁₂Pfuka, we Hosi; komba matimba ya wena, we Xikwembu!

U nga tshuki u rivala lava xanisekaka.

₁₃Lowo homboloka ú sandzela yini Xikwembu,

ú vulela yini hi mbilu, a ku:

“Xi nga ka xi nga ndzi vutisi nchumu,” xana?

₁₄Kasi wena wa swi vona;

ina, maxangu ni mahlomulo wa ma vona,

u tiyimisele ku lwela swisiwana.

Hikokwalaho, lava tsaneke va tinyiketa eka wena,

lava pfumalaka vatswari, va kuma ku pfuneka eka wena.

₁₅Tshova matimba ya lavo homboloka ni ya vadyohi,

hlongola ku homboloka ka vona, ku kondza ku nga ha vonaki.

₁₆HOSI yi fuma hilaha ku nga heriki,

vamatiko va ta susiwa etikweni ra yona.

₁₇We HOSI, u yingisa ku kombela ka lava xanisekaka,

u pfuxa matimba ya vona, u va rhiyela ndleve,

₁₈u yima ni lava pfumalaka vatswari, u lwela ni lava xanisiwaka,

leswaku vanhu va misava leyi, va nga ha engeti va va karhata.