Pisalema ya 112

₁Dzunisani HOSI!

Ku katekile munhu loyi a chavaka HOSI Xikwembu,

la rhandzaka ku endla leswi xi lerisaka swona.

₂Vana va yena va ta chaviseka etikweni,

vatukulu va munhu loyi wo lulama va ta kateka.

₃Emutini wa yena ku ni ndzalo ni rifuwo,

a nga tshiki ku hanana.

₄Eminkarhini ya makhombo, munhu loyi ú famba eku vonakaleni,

ú ni tintswalo, ú twela vusiwana, a hi ku lulama ka yena!

₅Swi sasekile loko munhu a tiva ku hanana ni ku lomba van'wana;

la endlaka sweswo, ú hlayisa swilo swa yena hi ndlela leyi nkhensekaka.

₆Munhu wo lulama a nga tsekatsekisiwi hi nchumu,

vanhu a va nga n'wi rivali ni siku ni rin'we.

₇Makungu layo biha a ma n'wi tshukisi,

ú tiyile hikuva ú tshemba HOSI Xikwembu.

₈Mbilu ya yena a yi kanakani, a yi chavi nchumu,

a kondza a vona ku hluriwa ka valala va yena.

₉A nga karhali ku humesa swilo swa yena, a pfuna vapfumari ha swona;

a nga tshiki ku hanana;

hikokwalaho matimba ya yena ma ta ya ma kula, a xiximiwa hi vanhu.

₁₀Lavo homboloka va swi vona, kutani va kariha,

va mpfhumpfhela lavo lulama, kambe va hela ntamu,

makungu ya vona ma helela empfhukeni.