Pisalema ya 116

₁Ndzi rhandza HOSI Xikwembu,

hikuva xa ndzi yingisa loko ndzi rila eka xona.

₂Leswi xi ndzi twaka,

ndzi ta xi khongela vutomi bya mina hinkwabyo.

₃Mapindzi ya rifu a ma ndzi tsondzerile.

A ndzi vona sirha ri ahlamile,

ndzi khomiwa hi gome ni nhlomulo.

₄Kutani ndzi vitana HOSI Xikwembu,

ndzi ku ka xona: “We HOSI,

ndza ku kombela, ndzi lamulele!”

₅HOSI Xikwembu xa hina xi ni vunene,

xi tsetselela vanhu, xi va twela vusiwana,

₆xi hlayisa ni vanhu va xiyimo xa le hansi.

A ndzi herile matimba, kambe xi ndzi ponisile.

₇Sweswi ndzi ni ku rhula,

hikuva HOSI Xikwembu xi ndzi katekisile ngopfu.

₈We Xikwembu, u ndzi vutlile emavokweni ya rifu,

u ndzi surile mihloti,

a wu pfumelanga leswaku ndzi rheta ndzi wa.

₉Hikokwalaho ndzi ta famba emahlweni ka wena,

emisaveni ya lava hanyaka.

₁₀A ndzi tshiki ku ku tshemba,

hambileswi ndzi pfaka ndzi vula leswaku ndzi le khombyeni lerikulu,

₁₁ndzi pfaka ndzi lan'wa

ndzi vula leswaku vanhu hinkwavo va hemba.

₁₂Xana ndzi nga nkhensa HOSI ha yini,

hikuva minkateko ya yona hinkwayo yi le henhla ka mina!

₁₃Ndzi ta khongela HOSI Xikwembu lexi xi ndzi poniseke,

ndzi ri karhi ndzi xi humesela magandzelo ya swakunwa.

₁₄Ndzi ta hetisisa leswi ndzi tiboheke ku swi humesela HOSI,

vanhu va yona hinkwavo va ri karhi va ndzi vona.

₁₅Eka HOSI Xikwembu, rifu ra loyi a xi khongelaka

a hi mhaka leyitsongo.

₁₆We HOSI, ndzi nandza wa wena,

na yena mana wa mina a a ri nandza wa wena.

A ndzi bohiwile, kambe sweswi ndzi ntshunxiwile.

₁₇Hikokwalaho ndzi ta ku humesela magandzelo ya ku nkhensa,

ndzi khongela wena.

₁₈Ndzi ta hetisisa leswi ndzi tiboheke ku swi humesela HOSI,

vanhu va yona hinkwavo va ri karhi va ndzi vona,

₁₉ndzi ri exivaveni xa Tempele ya yona,

exikarhi ka wena, we muti wa Yerusalema.

Dzunisani HOSI!