Pisalema ya 118

₁Tlangelani HOSI, hikuva yi ni vunene,

rirhandzu ra yona a ri na ku hela.

₂Vaisraele a va vule sweswo va ku:

“Rirhandzu ra yona hi leri nga heriki.”

₃Va ka Aroni a va vule va ku:

“Rirhandzu ra yona hi leri nga heriki.”

₄Lava chavaka HOSI, a va vule va ku:

“Rirhandzu ra yona hi leri nga heriki.”

₅Loko ndzi ri khombyeni, ndzi huwelerile eka HOSI Xikwembu,

kutani xi yingisile xikhongelo xa mina xi ndzi ntshunxa.

₆A ndzi chavi nchumu, hikuva HOSI Xikwembu xi na mina,

xana munhu a nga ndzi endla yini xana?

₇HOSI Xikwembu xi yima na mina, xi ndzi nyika vapfuni,

ndzi ta vona ku hluriwa ka lava va ndzi vengaka.

₈Ku tumbela eka HOSI Xikwembu,

swi tlula ku tshemba munhu wa misava leyi.

₉Ku tumbela eka HOSI Xikwembu,

swi tlula ku tshemba vanhu va swiyimo swa le henhla.

₁₀Vanhu hinkwavo va matiko a va ndzi rhendzerile,

kambe hi vito ra HOSI, ndzi va hlurile.

₁₁A va ndzi rhendzerile matlhelo hinkwawo,

kambe ndzi va hlurile hi vito ra HOSI.

₁₂Va ndzi hlengerile kukota tinyoxi,

kambe va hatle va nyamalala, onge i ndzilo wa mavivi.

Ndzi va hlurile hi vito ra HOSI.

₁₃A va lava ku ndzi wisela hansi va ndzi kandziyela,

kambe HOSI Xikwembu xi ndzi lamulerile.

₁₄HOSI Xikwembu hi xona xi ndzi tiyiseke, xi ndzi lwela,

ndzi ponisiwile hi xona.

₁₅Twanani huwa ya ntsako leyi humaka emintsongeni ya lavo lulama;

va ri: “HOSI Xikwembu xi tirhile hi matimba ya xona,

₁₆HOSI Xikwembu xi hlurile,

xi tirhile hi matimba ya xona!”

₁₇A ndzi nga fi,

ndzi ta hanya leswaku ndzi twarisa mintirho ya HOSI Xikwembu.

₁₈Xi ndzi bile ngopfu,

kambe a xi pfumelanga leswaku ndzi fa.

₁₉Ndzi pfuleleni tinyangwa ta lavo lulama,

hikuva ndzi lava ku nghena ha tona eTempeleni,

ndzi ya tlangela HOSI Xikwembu.

₂₀Leyi hi yona nyangwa yo ya eka xona,

lavo lulama va nghena ha yona!

₂₁We HOSI, ndza ku nkhensa,

hikuva u ndzi hlamurile, u ndzi ponisa.

₂₂Ribye leri nyenyiweke hi vaaki,

ri hundzukile ribye lerikulu ra yinhla.

₂₃Swilo leswi swi endliwe hi HOSI,

i mhaka leyi hlamarisaka loko hi yi languta.

₂₄Leri i siku leri vekiweke hi HOSI,

a hi tlangeleni, hi tiphina ha rona.

₂₅We HOSI, ha ku kombela, hi ponise!

Ha kombela we HOSI, hi katekise!

₂₆A ku katekisiwe munhu la taka hi vito ra HOSI.

Hi mi navelela minkateko hi ri eTempeleni ya yona.

₂₇HOSI i Xikwembu, xa hi voninga.

Endlani nkuvo mi longoloka mi khomile switluka, ku kondza mi ya fika etimhondzweni ta alitari.

₂₈Xikwembu xa mina hi wena, ndzi ta ku tlangela,

U Xikwembu xa mina, ndzi ta ku twarisa.

₂₉Nkhensani HOSI, hikuva yi ni vunene,

rirhandzu ra yona hi leri nga heriki.