Pisalema ya 13

₁We HOSI, xana u ta ndzi rivala ku fikela rini xana? Ku ta va hilaha ku nga heriki ke?

U ta ndzi fularhela ku fikela rini xana?

₂Xana ndzi ta va ni gome emoyeni ku fikela rini,

ni nhlomulo lowu ndzi nga na wona embilwini masiku hinkwawo wu ta hela rini xana?

Xana valala va mina va ta tidzunisa hi ku va

ehenhla ka mina ku fikela rini xana?

₃We HOSI Xikwembu xanga, languta u ndzi hlamula;

sivela mahlo ya mina ku khomiwa hi vurhongo bya rifu,

₄leswaku nala wa mina a nga tshuki a ku: “Ndzi n'wi hlurile.”

Hambi va ri lava lwaka na mina, va nga tshuki va tsakisiwa

hi ku khuguka ka mina.

₅Kambe mina ndzi tshembile tintswalo ta wena leto tshembeka,

mbilu ya mina yi ta tsaka hikuva u ta ndzi ponisa.

₆Ndzi ta yimbelela ndzi dzunisa HOSI,

hikuva yi ndzi endlerile leswinene.