Pisalema ya 20

₁HOSI Xikwembu a xi ku hlamule hi siku ra khombo,

vito ra Xikwembu xa Yakobo a ri ku sirhelele!

₂A xi ku rhumele ku pfuniwa loku humaka eTempeleni,

ni ku seketeriwa loku humaka eSiyoni!

₃A xi tsundzuke tinyiko hinkwato leti u ti humeseke,

xi amukela ni magandzelo ya wena lama hisiwaka!

₄A xi ku nyike leswi u swi navelaka embilwini,

xi katekisa makungu ya wena hinkwawo!

₅Hi ta ba minkulungwana hi tlangela ku hlula ka wena,

hi yimisa mijeko ya hina hi vito ra Xikwembu xa hina.

HOSI Xikwembu a xi ku nyike hinkwaswo leswi u swi kombelaka!

₆Sweswi ndza swi tiva

leswaku HOSI Xikwembu xi ta pfuna Muhlawuriwa wa xona;

xi ta n'wi hlamula xi ri eTempeleni ya xona ya le matilweni,

xi n'wi nyika ku hlula valala hi matimba lamakulu ya voko ra xona ra xinene.

₇Van'wana va titshembela makalichi, van'wana tihanci,

kambe hina hi titshembela vito ra HOSI Xikwembu xa hina.

₈Va ta hela matimba, va wa,

kambe hina hi ta yima hi ku tsèrhè!

₉We HOSI, nyika mufumi wa tiko matimba yo hlula!

Hi hlamule, siku hi rilaka eka wena.