Pisalema ya 40

₁Ndzi languterile HOSI Xikwembu ndzi nga heli mbilu,

kutani xi tshinerile kusuhi xi ta yingisa ku huwelela ka mina.

₂Xi ndzi humesile ekheleni leri chavisaka,

endzhopeni leyi dlayaka;

xi ndzi yimisile ehenhla ka ribye,

xi ndzi basisela tindlela.

₃Enon'weni wa mina xi nghenisile risimu lerintshwa

leri dzunisaka xona Xikwembu xa hina;

vanhu lavo tala va ta swi vona, kutani va ta chava,

va sungula ku tshemba HOSI Xikwembu.

₄Ku katekile munhu loyi a tshembaka HOSI Xikwembu,

loyi a nga twananiki ni lava tikurisaka,

a hambana ni lava landzelelaka swikwembu swa hava.

₅We HOSI Xikwembu xanga, u andzisile mintirho ya wena leyo hlamarisa,

ni makungu ya wena ehenhla ka hina.

Ku hava munhu loyi a nga ringanisiwaka na wena,

mintirho ya wena ndzi nge yi vuli hinkwayo, i ntsandza-vahlayi!

₆Wena a wu lavi timhamba ni magandzelo,

kambe u ndzi nyika tindleve leti twaka;

magandzelo lama hisiwaka ni timhamba to

susa swidyoho a wu swi tsakeli.

₇Kutani ndzi ri: “Vona, hi mina loyi!

Ebukwini ya Nawu ku tsariwile leswi swi ndzi khumbaka.

₈We Xikwembu xanga, ndzi tsakela ngopfu ku endla ku rhandza ka wena,

nawu wa wena wu le mbilwini ya mina.”

₉Ntshungu lowukulu ndzi wu tivisile mahungu yo tsakisa

ya leswaku u hi ntshunxile;

We HOSI, wa swi tiva swinene

leswaku a ndzi miyelanga.

₁₀Mhaka ya leswaku u hi ntshunxile, a ndzi yi endlanga xihundla,

ndzi tivisile vanhu leswaku u muponisi la tshembekaka;

ntshungu lowukulu a ndzi wu fihlelanga

rirhandzu ni ku tshembeka ka wena.

₁₁We HOSI, u nga tshiki ku ndzi komba tintswalo,

ndzi funengete hi rirhandzu ni ku tshembeka ka wena.

₁₂Ndzi rhendzeriwe hi makhombo layo tala ngopfu;

swidyoho swa mina swi ndzi kumile swi ndzi pfale ni mahlo,

swi tlula ni misisi ya mina hi ku tala,

kutani ndzi hela matimba.

₁₃We HOSI, wa nga ndzi lamulela,

hatlisa u ta ndzi pfuna we HOSI.

₁₄Lava ringetaka ku ndzi khoma va ndzi dlaya,

va nyumise hinkwavo u va khomisa tingana;

lava tsakaka loko ndzi ri ekhombyeni,

va tlherise u va tsongahata.

₁₅Lava va ndzi hlekaka va ku: “Aháà! Aháà!”

va chavise, u va khomisa tingana.

₁₆Hinkwavo lava taka eka wena, va tate hi ntsako;

lava tsakelaka ntirho wa wena wa ku ponisa,

a va hambe va ku: “HOSI Xikwembu i Xikwembu lexikulukumba!”

₁₇Hambileswi ndzi nga xisiwana, ndzi pfumalaka swa le mandleni,

N'wini wanga a nga ndzi rivali.

We Xikwembu xanga, u mupfuni ni muponisi wa mina,

hatlisa u ta ndzi pfuna.